ປະທານາທິບໍດີສະຫະລັດທ່ານບາຣັກ ໂອບາມາ ກ່າວໃນຄຳປາໄສປະຈຳສັບປະດາຂອງ ທ່ານໃນວັນເສົາມື້ນີ້ວ່າ ຍັງບໍ່ມີກຸ່ມກໍ່ການຮ້າຍໃດໆເທື່ອປະສົບຄວາມສຳເລັດໃນການໄດ້ ຮັບອຸບປະກອນນິວເຄລຍ ຫຼືສາມາດຜະລິດລະເບີດ ທີ່ໃຊ້ວັດຖຸ ທີ່ມີກຳມັນຕະພາບລັງສີ ແຕ່ກຸ່ມກໍ່ການຮ້າຍອາລກາອີດາ ເຄີຍພະຍາຍາມມາແລ້ວ.
ປະທານາທິບໍດີໂອບາມາໄດ້ກ່າວຄຳປາໄສຂອງທ່ານ ຈາກການປະຊຸມສຸດຍອດວ່າດ້ວຍ ຄວາມໝັ້ນຄົງດ້ານນິວເຄລຍບ່ອນທີ່ພວກຜູ້ນຳຂອງໂລກໄດ້ມາເຕົ້າໂຮມກັນເພື່ອປຶກສາ ຫາລື ໃນສິ່ງທີ່ທ່ານໂອບາມາກ່າວວ່າ ເປັນນຶ່ງໃນໄພຂົ່ມຂູ່ ທີ່ໃຫຍ່ທີ່ສຸດ ຕໍ່ຄວາມໝັ້ນຄົງ ຂອງໂລກ ນັ້ນກໍຄືກຸ່ມກໍ່ການຮ້າຍສາມາດໄດ້ຮັບອາວຸດທີ່ມີອະນຸພາບຮ້າຍແຮງ.
ທ່ານໂອບາມາ ກ່າວວ່າ ການດຳເນີນຄວາມພະຍາຍາມຂອງໂລກ ທີ່ຈະຍຸຕິບໍ່ໃຫ້ພວກກໍ່ ການຮ້າຍ ແລະກຸ່ມອື່ນໆ ນຳໃຊ້ອາວຸດນິວເຄລຍນັ້ນ ແນ່ນອນຍັງບໍ່ທັນສຳເລັດເສັດສິ້ນ ເທື່ອ.
ທ່ານໂອບາມາ ມ້ວນທ້າຍກອງປະຊຸມສຸດຍອດ ວ່າດ້ວຍຄວາມໝັ້ນຄົງດ້ານນິວເຄລຍ ທີ່ ນະຄອນຫຼວງວໍຊິງຕັນໃນວັນສຸກວານນີ້ໂດຍກ່າວວ່າພວກຜູ້ນຳຂອງໂລກໄດ້ສ້າງຄວາມ ກ້າວໜ້າ ທີ່ສຳຄັນ ແລະຢ່າງມີຄວາມໝາຍ ໃນຮອບຫົກປີທີ່ຜ່ານມາໃນການຄຸ້ມຄອງວັດ ຖຸນິວເຄລຍໃຫ້ມີຄວາມປອດໄພ.
ທ່ານກ່າວວ່າ ວັດຖຸທີ່ສາມາດນຳໄປສ້າງອາວຸດໄດ້ 150 ລູກເວລານີ້ມີຄວາມປອດໄພບໍ່ ໃຫ້ພວກກໍ່ການຮ້າຍ ເຂົ້າໄປເຖິງໄດ້. ແຕ່ຂະນະດຽວກັນ ທ່ານກໍກ່າວວ່າ ຄັງອາວຸດນິວ ເຄລຍຢູ່ໃນບາງປະເທດ ພວມມີການຂະຫຍາຍຕົວ ແລະການເກັບສະສົມ ທາດປລູໂຕ ນຽມພວມເພີ້ມທະວີຂຶ້ນ.
ທ່ານໂອບາມາກ່າວວ່າ ທ່ານແລະຜູ້ນຳຂອງ 50 ກວ່າປະເທດໃນໂລກທີ່ໂຮມຊຸມນຸມກັນ ຢູ່ນະຄອນຫລວງວໍຊິງຕັນ ແມ່ນເຫັນພ້ອມນຳກັນທີ່ຈະເສີມຄວາມເຂັ້ມແຂງເພີ້ມຕື່ມ ໃຫ້ ແກ່ສະຖານທີ່ນິວເຄລຍຕ່າງໆບໍ່ໃຫ້ຖືກໂຈມຕີທາງອິນເຕີແນັດແລະປັບປຸງໃນການແບ່ງ ປັນຂໍ້ມູນສືບລັບ ເພື່ອສືບຕໍ່ໃຫ້ເປັນທີ່ແນ່ນອນວ່າ ວັດຖຸທີ່ເປັນອັນຕະລາຍຮ້າຍແຮງດັ່ງ ກ່າວນີ້ ບໍ່ໄດ້ຕົກໄປຢູ່ໃນກຳມືຂອງພວກກໍ່ການຮ້າຍຕ່າງໆເຊັ່ນກຸ່ມລັດອິສລາມເປັນຕົ້ນ.
ທ່ານໂອບາມາ ກ່າວວ່າ ມີສິບກວ່າປະເທດ ໄດ້ທຳລາຍທາດຢູເຣນຽມທີ່ກັ່ນແລ້ວ ໃນລະ ດັບສູງແລະທາດປລູໂຕນຽມທີ່ມີຢູ່ທັງໝົດຂອງຕົນຊຶ່ງເປັນອົງປະກອບທີ່ຈຳເປັນໃນການສ້າງອາວຸດນິວເຄລຍນັ້ນ.
Your browser doesn’t support HTML5
Nuclear Security Summit