ປະທານາທິບໍດີສະຫະລັດ ທ່ານບາຣັກ ໂອບາມາ ກ່າວວ່າ ສະຫະລັດບໍ່ໄດ້ຮູ້ຈັກແລະກໍບໍ່ມີການພົວພັນໃດໆ ໃນການພະຍາຍາມກໍ່ລັດຖະປະຫານ ທີ່ປະເທດເທີກີ ໃນອາທິດແລ້ວນີ້.
ປະທານາທິບໍດີເທີກີ ທ່ານ Recep Tayyip Erdogan ໄດ້ກ່າວຫາ ນັກສອນສາສະໜາອິສລາມທີ່ກຳລັງລີ້ໄພຢູ່ໃນສະຫະລັດ ທ່ານ Fetullah Gulen ຫຼືບໍ່ກໍພວກທີ່ເຫລື້ອມໃສ ໃນໂຕທ່ານນັ້ນວ່າ ເປັນຜູ້ຢູ່ເບື້ອງຫລັງ ການພະຍາຍາມໂຄ່ນລົ້ມລັດຖະບານເທີກີ ທີ່ປະ ສົບກັບຄວາມລົ້ມແຫລວ ເມື່ອວັນທີ 15 ກໍລະກົດຜ່ານມາ.
ຊາວເທີກີ ຍ່າງຜ່ານລົດຕຳຫຼວດ ແລະພົນລະເຮືອນ ທີ່ຖືກໄຟໄໝ້ ໃກ້ໆທຳນຽບປະທານາທິບໍດີ ທີ່ນະຄອນຫຼວງ ອັງກາຣາ.
ທ່ານໂອບາມາ ກ່າວໃນວັນສຸກວານນີ້ວ່າ ລາຍງານໃດກໍຕາມ ທີ່ກ່າວວ່າສະຫະລັດມີສ່ວນ ພົວພັນໃນການວາງແຜນໂຈມຕີນັ້ນ ແມ່ນຈະແຈ້ງບໍ່ຖືກຕ້ອງ. ທ່ານກ່າວວ່າ ທ່ານໄດ້ແຈ້ງໃຫ້ປະທານາທິບໍດີ Erdogan ຊາບໄປແລ້ວ ໃນການໂອ້ລົມ ທາງໂທລະສັບ ເມື່ອຕົ້ນອາ ທິດນີ້.
ນອກນັ້ນ ທ່ານໂອບາມາ ຍັງເວົ້າວ່າ ລັດຖະບານສະຫະລັດຫວັງວ່າ ໃນຂະນະທີ່ລາຍລະ ອຽດເປັນທີ່ຈະແຈ້ງຕື່ມຂຶ້ນກໍບໍ່ຄວນທີ່ຈະມີການຕອບຮັບເກີນຂອບເຂດທີ່ອາດຈະນຳໄປ ສູ່ການຕັດຮອນສິດເສລີພາບຂອງສ່ວນບຸກຄົນຫຼືການປາບປາມພວກນັກການເມືອງຝ່າຍຄ້ານ ຫຼືພວກນັກຂ່າວທີ່ໄດ້ສະແດງຄວາມວິຕົກກັງວົນກ່ຽວກັບລັດຖະບານ.
ກຳລັງພິເສດ ຂອງເທີກີ ພວມຢືນຍາມ ໃນພິທີສົ່ງສະການ ພວກເຄາະຮ້າຍ
ທ່ານໂອບາມາ ກ່າວຕື່ມວ່າ ການຮ້ອງຂໍ ຂອງເທີກີ ທີ່ຢາກໃຫ້ສົ່ງໂຕ ນັກສອນສາສະໜາ ຈາກເຮືອນຂອງທ່ານທີ່ລີ້ໄພຢູ່ໃນລັດ Pennsylvania ໄປໃຫ້ນັ້ນຕ້ອງໄດ້ຜ່ານຂັ້ນຕອນທາງດ້ານກົດໝາຍ ຂອງສະຫະລັດ ແລະຈະໄດ້ຮັບການອະນຸມັດ ກໍຕໍ່ເມື່ອອັງກາຣາ ສາ ມາດພິສູດໄດ້ວ່າ ທ່ານ Gulen ເປັນຜູ້ຢູ່ເບື້ອງຫຼັງການເຮັດລັດຖະປະຫານດັ່ງກ່າວ.
ໃນລະຫວ່າງການຖະແຫລງຂ່າວ ທີ່ນະຄອນຫຼວງວໍຊິງຕັນ ໃນວັນສຸກວານນີ້ ເອກອັກຄະລັດຖະທູດເທີກີປະຈຳສະຫະລັດ ທ່ານ Serdar Kilic ກ່າວວ່າ ປະເທດຂອງທ່ານກຳລັງດຳເນີນງານຮ່ວມກັບເຈົ້າໜ້າທີ່ ກະຊວງຍຸຕິທຳຂອງສະຫະລັດ ເພື່ອດຳເນີນການຂັ້ນສຸດທ້າຍກ່ຽວກັບການຮ້ອງຂໍຂອງປະເທດທ່ານເພື່ອໃຫ້ສົ່ງທ່ານ Gulen ໄປໃຫ້ທາງການເທີ ກີ ໃນວິທີທາງທີ່ເປັນການຄູ່ຄວນ ກັບຄວາມສຳພັນ ໃນການເປັນພັນທະມິດ ທີ່ໄດ້ມີການທົດສອບ ມາເປັນເວລາດົນນານ ລະຫວ່າງປະເທດທັງສອງ.
Your browser doesn’t support HTML5
In State of Emergency, Turkey’s Erdogan Focuses on Spiritual Movement