ປະທານາທິບໍດີສະຫະລັດທ່ານບາຣັກ ໂອບາມາ ກ່າວວ່າ ການວາງລະເບີດຢູ່ ອູການດາ ທີ່ເຮັດໃຫ້ຜູ້ຄົນທີ່ກຳລັງເບິ່ງການແຂ່ງຂັນ ເຕະບານໂລກ ຮອບຊິງຊະນະເລີດທາງໂທລະພາບ 76 ຄົນເສຍຊີວິດນັ້ນ ສະແດງໃຫ້ເຫັນວ່າ ພວກກຸ່ມຫົວຕໍ່ສູ້ທີ່ມັກຄວາມຮຸນແຮງນັ້ນ ມີວິໄສທັດແຫ່ງການ ທຳລາຍລ້າງຜານແລະ ຄວາມຕາຍ ສຳລັບອາຟຣິກາ.
ໃນການໃຫ້ສຳພາດແກ່ບໍລິສັດກະຈາຍສຽງອາຟຣິກາໃຕ້ ທີ່ກຳນົດຈະອອກອາກາດໃນວັນພຸດມື້ນີ້ ປະທານາທິບໍດີໂອບາມາ ໄດ້ສົມທຽບຄວາມ ແຕກຕ່າງຂອງ ວິໄສທັດດັ່ງກ່າວ ໃສ່ກັບວິໄສທັດທີ່ຢາກໃຫ້ອາຟຣິກາມີຄວາມສາມັກຄີແລະທຳຄວາມກ້າວໜ້າທັນສະໄໝນັ້ນ. ນອກນີ້ ທ່ານຍັງເວົ້າວ່າ ການວາງລະເບີດຮ້າຍແຮງທີ່ວ່ານີ້ສະແດງໃຫ້ເຫັນວ່າ ພວກມຸສລິມຫົວຮຸນແຮງ ທີ່ອ້າງເອົາຄວາມຮັບຜິດຊອບ ບໍ່ໄດ້ຫຼິງເຫັນຜົນທີ່ຈະຕິດຕາມມາ ໃນໄລຍະຍາວ ຂະນະທີ່ພວກເຂົາ ເຮັດສົງຄາມທາງດ້ານອຸດົມການ ແລະສັງຫານຜູ້ທີ່ບໍ່ມີຄວາມຜິດ.
ກຸ່ມຫົວຮຸນແຮງ AL-SHABAB ຂອງໂຊມາເລຍກ່າວວ່າ ຕົນເປັນຜູ້ຢູ່ເບື້ອງຫຼັງ ການວາງລະເບີດໂຈມຕີ 2 ຄັ້ງທີ່ນະຄອນຫຼວງກຳປາລາ ຂອງອູການດາ. ກຸ່ມກໍ່ ການຮ້າຍກຸ່ມນີ້ທີ່ເປັນເຄືອຂ່າຍຂອງກຸ່ມອາລກາຍດາເວົ້າວ່າ ການໂຈມຕີທີ່ວ່ານີ້ ແມ່ນເພື່ອເປັນການແກ້ແຄ້ນ ຕໍ່ການປະກອບສ່ວນຂອງອູການດາ ເຂົ້າໃນກຳລັງ ຮັກສາສັນຕິພາບຂອງສະຫະພາບອາຟຣິກາ ທີ່ໃຫ້ການສະໜັບສະໜຸນ ແກ່ລັດ ຖະບານໂຊມາເລຍ ແລະການໂຈມຕີເພີ້ມຕື່ມ ຈະຕິດ ຕາມມາ.