ວັນຈັນມື້ນີ້ ປະທານາທິບໍດີ ສະຫະລັດ ທ່ານ ບາຣັກ ໂອບາມາ ຈະເດີນທາງໄປລັດ ອາລາສກາ ເພື່ອພົບປະກັບປະຊາຊົນ ແລະ ກ່າວຄຳປາໄສໃນກອງປະຊຸມ ເຊິ່ງມີເຈົ້າໜ້າທີ່ຈາກ ສະຫະລັດ ແລະ ຕ່າງປະເທດ, ບັນດານັກວິທະຍາສາດ ແລະ ປະຊົນໃນທ້ອງຖິ່ນເຕົ້າໂຮມກັນເພື່ອຫາລືກ່ຽວກັບ ຜົນກະທົບຂອງສະພາບ ປ່ຽນແປງຂອງອາກາດ ໃນພາກພື້ນຂົ້ວໂລກເໜືອ.
ອີງຕາມທຳນຽບຂາວ, ເປົ້າໝາຍຂອງກອງປະຊຸມ Glacier, ແມ່ນເພື່ອເສີມຄວາມລະມັດລະວັງກ່ຽວກັບ ຜົນກະທົບຂອງອຸນຫະພູມທີ່ສູງຂຶ້ນໃນຂົ້ວໂລກເໜືອ ວ່າມີຜົນຕໍ່ທົ່ວໂລກແນວໃດ ແລະ ປະຊາຊົນສາມາດເຮັດຫຍັງເພື່ອຕອບສະໜອງໄດ້ແດ່.
ບັນຫາແມ່ນຈຸດສຳຄັນຂອງການປາໄສປະຈຳອາທິດຂອງທ່ານ ໂອບາມາ, ໃນລະຫວ່າງການທີ່ທ່ານກ່າວວ່າ ປະຊາຊົນຊາວ ອາລາສກາ ແມ່ນກຳລັງປະສົບກັບບັນຫາໄຟໄໝ້ປ່າຫຼາຍຂຶ້ນ ແລະ ກວ້າງຂວາງອອກໄປ, ເຊິ່ງເຮັດໃຫ້ນ້ຳກ້ອນເສື່ອມຄຸນນະພາບລົງ, ເຊິ່ງເຮັດ ຊາຍຝັ່ງ ບາງບ່ອນເຈື່ອນໄວທີ່ສຸດໃນໂລກ, ແລະ ພະຍຸກໍເພີ່ມສູງຂຶ້ນກວ່າເກົ່າໃນຂະນະທີ່ນ້ຳກ້ອນເປື່ອຍ.
ກະຊວງການຕ່າງປະເທດ ສະຫະລັດ ເປັນຜູ້ຈັດກອງປະຊຸມໃນວັນຈັນມື້ນີ້, ແລະ ໄດ້ກ່າວວ່າ ກອງປະຊຸມນີ້ບໍ່ມີສາຍພົວພັນໂດຍກົງກັບການເຈລະຈາຂອງ ອົງການສະຫະປະຊາຊາດ ໃນທ້າຍຂອງປີນີ້ເພື່ອສ້າງແຜນການຜູກມັດເພື່ອຈັດການກັບບັນຫາ ສະພາບອາກາດປ່ຽນແປງ, ເຊິ່ງການເຈລະຈາດັ່ງກ່າວຈະຊ່ວຍ “ຜັກດັນໃຫ້ມີການຕັດສິນໃຈທາງດ້ານການເມືອງ ເພື່ອປະຕິບັດຕາມທີ່ໄດ້ປາຖະໜາໄວ້.”
ໃນກອງປະຊຸມດັ່ງກ່າວຈະລວມມີບັນຫາຂອງ ການຮ່ວມມືດ້ານວິທະຍາສາດ, ພະລັງງານທົດແທນ, ເສີມສ້າງການຕອບຮັບໃນເວລາສຸກເສີນ ແລະ ປ້ອງກັນການຫາປາທີ່ບໍ່ຖືກຕ້ອງຕາມກົດໝາຍໃນທະເລ ອາກຕິກ.
ທ່ານ ໂອບາມາ ໄດ້ກ່າວວ່າ ທ່ານຫວັງວ່າຈະເຂົ້າຮ່ວມໃນການປະຊຸມກັບປະຊາຊົນຊາວ
ອາລາສກາ ເພື່ອເຈລະຈາກ່ຽວກັບການທີ່ປະເທດຊາດ ຈະສາມາດເປັນ “ຜູ້ນຳໂລກໃນດ້ານສະພາບປ່ຽນແປງຂອງອາກາດ” ນີ້ ໄດ້ແນວໃດ ແລະ ຊ່ວຍເຫຼືອການພະຍາຍາມຮ່ວມກັນເພື່ອຮັບມືກັບໄພຂົ່ມຂູ່ກ່ອນທີ່ມັນຈະຊ້າເກີນໄປ.
ບັນດານັກວິທະຍາສາດໄດ້ເຕືອນວ່າ ການປ່ອຍໃຫ້ອຸນຫະພູມໂລກສູງຂຶ້ນຫຼາຍກວ່າ 2 ອົງສາ Celsius ຢູ່ເໜືອລະດັບຂອງຍຸກອຸດສະຫະກຳ ຈະນຳມາສະພາບອາກາດທີ່ຮ້າຍແຮງ ແລະ ລະດັບນ້ຳທະເລສູງຂຶ້ນ ເຊິ່ງຈະສົ່ງຜົນກະທົບຕໍ່ປະຊາກອນໃນທົ່ວໂລກ.
ການເຈລະຈາຂອງອົງການ ສະຫະປະຊາຊາດ ໃນນະຄອນຫຼວງ ປາຣີ ຈະດຳເນີນໄປເປັນເວລາສອງອາທິດ ເລີ່ມຕົ້ນໃນວັນທີ 30 ພະຈິກ ພ້ອມດ້ວຍເປົ້າໝາຍໃນການສ້າງແຜນການ ເພື່ອຮັກສາອຸນຫະພູມໃນລະດັບທີ່ສາມາດຄວບຄຸມໄດ້ ພ້ອມດ້ວຍການວາງເປົ້າໝາຍອອກໃຫ້ແຕ່ລະປະເທດເພື່ອເຮັດໃຫ້ສຳເລັດ. ແຜນການດັ່ງກ່າວນັ້ນ, ຖ້າຕົກລົງກັນໄດ້, ກໍຈະມີຜົນບັງຄັບໃຊ້ໃນປີ 2020.
Your browser doesn’t support HTML5
Obama Climate Change