ສື່ມວນຊົນສະຫະລັດລາຍງານວ່າ ລັດຖະບານສະຫະລັດ
ຈະບໍ່ຂົ່ມຂູ່ ທີ່ຈະດຳເນີນຄະດີອີກແລ້ວ ຕໍ່ບັນດາສະມາຊິກ
ຄອບຄົວ ຜູ້ທີ່ພະຍາຍາມຈະທຳການເຈລະຈາ ກັບພວກ
ທີ່ຈັບກຸມຊາວອາເມຣິກັນ ເປັນຕົວປະກັນ ຢູ່ຕ່າງປະເທດ
ຫຼື ຈ່າຍເງິນຄ່າໄຖ່ ເພື່ອແລກກັບການປ່ອຍຕົວ ນັ້ນ.
ຄາດກັນວ່າ ປະທານາທິບໍດີ ບາຣັກ ໂອບາມາ ຈະຜ່ອນຜັນ
ນະໂຍບາຍສະຫະລັດ ກ່ຽວກັບເລື່ອງນີ້ ໃນເວລາທ່ານເປີດເຜີຍ
ລາຍງານ ທົບທວນຄືນຢ່າງກວ້າງຂວາງ ບົດຊີ້ນຳກ່ຽວກັບເລື່ອງ
ຕົວປະກັນສະຫະລັດ ໃນວັນພຸດມື້ນີ້ ຢູ່ທີ່ທຳນຽບຂາວ ໂດຍມີ
ບັນດາຄອບຄົວຂອງຕົວປະກັນ ຢູ່ຄຽງຂ້າງຈຳນວນນຶ່ງ.
ການທົບທວນຄືນ ທີ່ໃຊ້ເວລາ 6 ເດືອນ ໄດ້ຖືກກະຕຸ້ນໃຫ້ມີຂຶ້ນ ຍ້ອນການຕຳນິຕິຕຽນຢ່າງໜັກ ຕໍ່ລັດຖະບານທ່ານໂອບາມາ ໂດຍຍາດຕິພີ່ນ້ອງຜູ້ເຄາະຮ້າຍຈຳນວນນຶ່ງ ຜູ້ທີ່ກ່າວວ່າ ພວກເຂົາເຈົ້າໄດ້ຖືກຂົ່ມຂູ່ວ່າຈະຖືກດຳເນີນຄະດີ ຖ້າພວກເຂົາເຈົ້າ ພະຍາຍາມລະດົມທຶນ ເພື່ອຈ່າຍຄ່າໄຖ່ຕົວປະກັນນັ້ນ.
ບັນດາເຈົ້າໜ້າທີ່ສະຫະລັດ ກ່າວວ່າ ມາດຕະການໃໝ່ຕ່າງໆ ແມ່ນຈະປັບປຸງໃຫ້ດີຂຶ້ນ ການປະສານງານ ແລະ ການຕິດຕໍ່ສື່ສານກັບບັນດາ ຄອບຄົວຕົວປະກັນ ແລະ ຈະຊ່ວຍອຳນວຍ ຄວາມສະດວກໃນການຕິດຕໍ່ສື່ສານ ກັບພວກລັກພາຕົວ ໃນນາມຂອງບັນດາຄອບຄົວ ທີ່ຫາທາງເອົາຕົວປະກັນ ກັບຄືນມາຢ່າງປອດໄພນັ້ນ.
ແຕ່ໂຄສົກທຳນຽບຂາວ ທ່ານ Josh Earnest ກ່າວຕໍ່ບັນດານັກຂ່າວ ໃນວັນອັງຄານວານນີ້ ວ່າ ປະທານາທິບໍດີ ຈະບໍ່ປ່ຽນແປງ ການຫ້າມ ບໍ່ໃຫ້ຍິນຍອມ ຕໍ່ຂໍ້ຮຽກຮ້ອງຂອງພວກຈັບຕົວປະກັນ.
Your browser doesn’t support HTML5
US Hostage Policy