ປະທານາທິບໍດີສະຫະລັດ ທ່ານບາຣັກ ໂອບາມາ ພວມຢູ່ໃນລະຫວ່າງການເດີນທາງໄປຍັງ
ເກົາຫຼີໃຕ້ ເພື່ອເຂົ້າຮ່ວມກອງປະຊຸມສຸດຍອດນິວເຄລຍ ໃນອາທິດໜ້າ. ທ່ານໄດ້ອອກເດີນ
ທາງຈາກກຸງວໍຊິງຕັນ ໂດຍເຮືອບິນປະຈຳຕຳແໜ່ງປະທານາທິບໍດີ Air Force One ໃນ
ຕອນເຊົ້າມືດຂອງວັນເສົາມື້ນີ້.
ທ່ານໂອບາມາຈະໄປຮ່ວມພວກຜູ້ນຳຂອງໂລກ 50 ກວ່າທ່ານ ໃນກອງປະຊຸມສຸດຍອດທີ່
ສຳຄັນຢູ່ທີ່ກຸງໂຊລນະຄອນຫຼວງຂອງເກົາຫຼີໃຕ້. ການປະຊຸມດັ່ງກ່າວ ມີຂຶ້ນຂະນະທີ່ເກົາຫຼີ
ເໜືອນາບຂູ່ວ່າ ຈະຍຸຕິຄວາມກ້າວໜ້າທີ່ໄດ້ຮັບກ່ຽວກັບການປົດອາວຸດນິວເຄລຍດ້ວຍແຜນ
ການຍິງລູກສອນໄຟໄລຍະໄກໃນເດືອນໜ້ານີ້.
ສະຫະລັດກ່າວໃນສັບປະດາແລ້ວນີ້ວ່າ ການຍິງລູກສອນໄຟດັ່ງກ່າວຈະຍົກເລີກຂໍ້ຕົກລົງໃຫ້
ການຊ່ອຍເຫຼືອທາງດ້ານອາຫານແກ່ເກົາຫຼີເໜືອ ເພື່ອເປັນການແລກປ່ຽນ ກັບການຍຸຕິໂຄງ
ການນິວເຄລຍແລະການຍິງລູກສອນໄຟໄລຍະໄກ.
ທຳນຽບຂາວກ່າວວ່າ ທ່ານໂອບາມາຈະທຳການພົບປະ ແບບສອງຝ່າຍ ກັບຫຼາຍໆປະເທດ
ຮວມທັງການເຈລະຈາຫາລືກັບທ່ານຫູຈິນເຖົາປະທານປະເທດຈີນ. ນອກນັ້ນທ່ານໂອບາມາ
ຍັງມີແຜນການທີ່ຈະພົບປະກັບຜູ້ນຳຂອງ Kazakhstan ຣັດເຊຍ ເກົາຫຼີໃຕ້ ແລະເທີກີນຳ
ດ້ວຍ ຢູ່ຂ້າງນອກຂອງກອງປະຊຸມສຸດຍອດ.
http://www.voanews.com/templates/widgetDisplay.html?id=143856466&player=article
ຖະແຫຼງຂ່າວສະບັບນຶ່ງຂອງທຳນຽບຂາວທີ່ອອກໃນວັນສຸກວານນີ້ເວົ້າວ່າປະທານາທິບໍດີໂອ
ບາມາຍັງຈະພົບປະກັບນາຍົກລັດຖະມົນຕີປາກິສຖານ ທ່ານ Yusuf Raza Gilani ເພື່ອ
ທົບທວນເບິ່ງ ການດຳເນີນຄວາມພະຍາຍາມ ໃຫ້ການສະໜັບສະໜຸນຕໍ່ຂັ້ນຕອນການສ້າງ
ຄວາມປອງດອງຊາດພາຍໃຕ້ການນຳພາຂອງອັຟການິສຖານກັບພວກຕາລີບານ.
ນອກນັ້ນທ່ານໂອບາມາຍັງມີແຜນການທີ່ຈະເດີນທາງໄປຢ້ຽມຢາມເຂດປອດທະຫານທີ່ຕັ້ງຢູ່
ລະຫວ່າງເກົາຫຼີເໜືອແລະເກົາຫຼີໃຕ້ ພາຍໃນບໍ່ເທົ່າໃດຊົ່ວໂມງຫຼັງຈາກເຮືອບິນຂອງທ່ານລົງ
ຈອດໃກ້ໆກຸງໂຊລ ໃນຕອນເຊົ້າຂອງມື້ວັນອາທິດ.
ໃນການຖະແຫຼງຕໍ່ພວກນັກຂ່າວທາງໂທລະສັບໃນຕົ້ນອາທິດນີ້ນັ້ນຮອງທີ່ປຶກສາດ້ານຄວາມ
ໝັ້ນຄົງແຫ່ງຊາດຂອງສະຫະລັດທ່ານ Ben Rhodes ກ່າວວ່າ ຈຸດສຳຄັນໃນການໄປຢ້ຽມ
ຢາມເຂດປອດທະຫານກໍແມ່ນເພື່ອສະແດງຄວາມສະໜັບສະໜຸນຕໍ່ທະຫານອາເມຣິກັນຫຼາຍ
ກວ່າ 28,000 ຄົນທີ່ປະຈຳການຢູ່ໃນເກົາຫຼີໃຕ້ ແລະເພື່ອເນັ້ນໃຫ້ເຫັນເຖິງການເປັນພັນທະ
ມິດທາງດ້ານຄວາມປອດໄພຂອງສະຫະລັດກັບເກົາຫຼີໃຕ້.