ປະທານາທິບໍດີສະຫະລັດ ທ່ານບາຣັກ ໂອບາມາ ກ່າວວ່າ ອົງການເນໂຕ້ແມ່ນແນ່ນອນມີຄວາມສຳຄັນເປັນຢ່າງຍິ່ງ ໃນຂະນະທີ່ທ່ານຊອກຫາຊ່ອງທາງເພື່ອໃຫ້ການຄ້ຳປະກັນຕໍ່ຢູໂຣບ ກ່ຽວກັບຄວາມໝັ້ນໝາຍ ຂອງສະຫະລັດ ຕໍ່ກຸ່ມພັນທະມິດດັ່ງກ່າວ ພາຍໃຕ້ ລັດຖະ ບານຂອງປະທານາທິບໍດີ Donald Trump.
ທີ່ນະຄອນຫຼວງເອເທັນ ປະເທດກຣີສ ໃນວັນອັງຄານວານນີ້ ໃນລະຫວ່າງການເດີນທາງຢ້ຽມຢາມຕ່າງປະເທດເທື່ອສຸດທ້າຍໃນນາມປະທານາທິບໍດີສະຫະລັດນັ້ນທ່ານໂອບາມາກ່າວວ່າ ອົງການເນໂຕ້ແມ່ນສະໜອງຄວາມຕໍ່ເນື່ອງເຖິງແມ່ນໃນຂະນະທີ່ມີການໂອນອຳ ນາດຂອງລັດຖະບານຢູ່ໃນສະຫະລັດ.
ກ່ຽວກັບບັນຫາຕ່າງໆ ທີ່ໄດ້ມີການຍົກຂຶ້ນມາໂດຍປະທານາທິບໍດີທີ່ຖືກເລືອກໃໝ່ ທ່ານ Donald Trump ແລະລັດຖະບານຊຸດກ່ອນໆຂອງສະຫະລັດຮວມທັງລັດຖະບານທ່ານໂອບາມາ ຜູ້ນຳຂອງສະຫະລັດແມ່ນຮຽກຮ້ອງໃຫ້ບັນດາປະເທດສະມາຊິກຂອງອົງການເນໂຕ້ໃຊ້ຈ່າຍເພີ້ມຂຶ້ນໃນດ້ານປ້ອງກັນປະເທດ.
ປະທານາທິບໍດີໂອບາມາ ແລະນາຍົກລັດຖະມົນຕີກຣີສ ທ່ານ Alexis Tsipras ພວມຖະແຫຼງຂ່າວ ຮ່ວມກັນ ທີ່ Maximos Mansion ໃນນະຄອນຫຼວງ ເອເທັນ.
ທ່ານໂອບາມາ ໄດ້ກ່າວຊົມເຊີຍກຣີສ. ທີ່ກອງປະຊຸມຖະແຫຼງຂ່າວ ຮ່ວມກັບນາຍົກລັດຖະ ມົນຕີກຣີສ ທ່ານ Alexis Tsipras ປະທານາທິບໍດີໂອບາມາໄດ້ສະແດງຄວາມຍິນດີຕໍ່ປະເທດດັ່ງກ່າວ ທີ່ໄດ້ໃຊ້ຈ່າຍຫຼາຍກວ່າຂັ້ນຕ່ຳສຸດ ກ່ຽວກັບເປົ້າໝາຍ ດ້ານປ້ອງກັນປະເທດ “ເຖິງແມ່ນໃນໄລະຍະເວລາທີ່ຫຍຸ້ງຍາກສັບສົນ” ທ່ານກ່າວວ່າ ໃນເມື່ອກຣີສ ສາມາດບັນ ລຸຄວາມໝັ້ນໝາຍຂອງຕົນຕໍ່ອົງການເນໂຕ້ໄດ້ ດັ່ງນັ້ນພັນທະມິດຂອງພວກເຮົາທຸກຄົນກໍຄວນສາມາດເຮັດໄດ້.
ກ່ອນອອກເດີນທາງຈາກທຳນຽບຂາວ ໃນວັນຈັນຜ່ານມານີ້ ທ່ານໂອບາມາກ່າວວ່າ ທ່ານ Trump ໄດ້ກ່າວ ຕໍ່ທ່ານວ່າ ທ່ານມີຄວາມສົນໃຈ ເປັນພິເສດ ໃນການທີ່ຈະ ສືບຕໍ່ຮັກສາຄວາມສຳພັນແກນກາງ ໃນຍຸດທະສາດ ຂອງອາເມຣິກາເອົາໄວ້. ທ່ານໂອບາມາ ເວົ້າວ່າ “ແລະນຶ່ງໃນຂ່າວຄາວທີ່ຂ້າພະເຈົ້ານຳໄປສະເໜີນັ້ນກໍແມ່ນຄວາມໝັ້ນໝາຍຂອງທ່ານຕໍ່ອົງການເນໂຕ້ ແລະພັນທະມິດຂ້າມມະຫາສະມຸດອັດແລນຕິກ.”
Your browser doesn’t support HTML5
Obama Europe
ປະທານາທິບໍດີ ທີ່ກຳລັງຈະພົ້ນຈາກຕຳແໜ່ງ ຂອງສະຫະລັດ ກ່າວວ່າ ທ່ານຈະແຈ້ງໃຫ້ພັນທະມິດໃນຢູໂຣບຊາບວ່າ “ຈະບໍ່ມີການອ່ອນແອລົງໃດໆໃນການຕັດສິນໃຈຂອງພວກເຮົາເມື່ອເວົ້າເຖິງຄວາມໝັ້ນໝາຍຂອງອາເມຣິກາທີ່ຈະສືບຕໍ່ຮັກສາຄວາມສຳພັນອັນເຂັ້ມ ແຂງແລະໝັ້ນຄົງກັບອົງການເນໂຕ້.”
ພວກຜູ້ນຳຢູໂຣບ ທີ່ໄດ້ພາກັນຕື່ນຕົກໃຈ ຍ້ອນຄຳເວົ້າ ຂອງທ່ານ Trump ໃນລະຫວ່າງການໂຄສະນາຫາສຽງກ່ຽວກັບຄວາມໝັ້ນໝາຍຂອງສະຫະລັດແມ່ນມີຄວາມກະຕືລືລົ້ນ ທີ່ຢາກຈະໄດ້ຮັບຄວາມກະຈ່າງແຈ້ງກ່ຽວກັບເລື້ອງນີ້.