ປະທານາທິບໍດີສະຫະລັດ ທ່ານ ບາຣັກ ໂອບາມາ ແລະບັນດາຜູ້ນຳຂອງປະເທດອ່າວເປີ ເຊຍ ໄດ້ພົບປະກັນ ທີ່ນະຄອນ Riyadh ເພື່ອຊອກຫາທາງ ທີ່ຈະສາມາດເຮັດວຽກຮ່ວມ ກັນ ຢ່າງໃກ້ຊິດຫຼາຍຂຶ້ນ ເພື່ອໃຫ້ມີສະຖຽນລະພາບໃນພາກຕາເວັນອອກກາງ ເອົາຊະນະກຸ່ມລັດອິສລາມ ແລະ ກຸ່ມ al-Qaida ແລະຮັບມືກັບ ການສ້າງຄວາມບໍ່ທຸ່ນທ່ຽງຂອງອິ ຣ່ານ ໃນຂົງເຂດ.
ທ່ານໂອບາມາ ແລະສະມາຊິກ 6 ປະເທດ ຂອງສະພາການຮ່ວມມືໃນເຂດອ່າວເປີເຊຍ ຫຼື GCC ໄດ້ໄຂກອງປະຊຸມສຸດຍອດນຶ່ງມື້ ໃນວັນພະຫັດມື້ນີ້ ດ້ວຍການທີ່ຈະເພັ່ງເລັງໃສ່ ຄວາມວຸ້ນວາຍທາງການເມືອງ ແລະການຕໍ່ສູ້ກັນໃນຊິເຣຍ ເຢເມນ ອິຣັກ ແລະລີເບຍ.
ສະພາການຮ່ວມມືໃນເຂດອ່າວເປີເຊຍ ຫຼື (GCC) ແມ່ນບັນດາສະມາຊິກ 6 ປະເທດ ຊຶ່ງຮວມທັງ Saudi Arabia, Kuwait, the United Arab Emirates, Qatar, Bahrain ແລະ Oman.
ສະຫະລັດ ແມ່ນໄດ້ກົດດັນ ໃຫ້ມີການເພັ່ງເລັງທີ່ຂະຫຍາຍກວ້າງອອກໄປອີກ ຕໍ່ຂໍ້ສະຫຼຸບທາງການເມືອງ ແລະການສູ້ລົບທາງສາສະໜານັ້ນ ໜ້ອຍລົງ ໂດຍສະເພາະ ໃນປະເທດ ເຊັ່ນເຢເມນ ແລະຊິເຣຍ ບ່ອນທີ່ ການຍຸຕິການສູ້ລົບກັນນັ້ນ ໄດ້ມີຜົນບັງຄັບໃຊ້ ແລະວ່າ ມັນຍັງບອບບາງແລະບໍ່ໜັກແໜ້ນເທື່ອ.
ແຕ່ວ່າບາງປະເທດໃນເຂດອ່າວເປີເຊຍເຊັ່ນ Saudi Arabia ມອງເຫັນຄວາມຮຸນແຮງທາງສາສະໜານັ້ນແມ່ນໄພຂົ່ມຂູ່ທາງດ້ານຄວາມໝັ້ນຄົງທີ່ສູງສຸດ. ນອກຈາກ Saudi Arabia ບັນດາພາຄີຂອງສະພາ GCC ທີ່ຮວມມີ Kuwait ສະຫະລັດອາຣັບ Emirates Qatar Bahrain ແລະ Oman.
ລັດຖະມົນຕີປ້ອງກັນປະເທດສະຫະລັດ Ash Carter (ຂວາ) ຂຶ້ນຖະແຫຼງການຕໍ່ບັນດາລັດຖະມົນຕີການຕ່າງປະເທດ ໃນ Riyadh, Saudi Arabia, 20 ເມສາ, 2016.
ຫຼັງຈາກປະຊຸມເລື້ອງຄວາມວຸ້ນວາຍໃນຂົງເຂດແລ້ວ ກຸ່ມດັ່ງກ່າວ ຍັງໄດ້ປຶກສາຫາຊ່ອງ ທາງ ເພື່ອທີ່ຈະຕໍ່ສູ້ ແລະຮັບມື ກັບກຸ່ມລັດອິສລາມ ແລະກຸ່ມ al-Qaida.
ສະຫະລັດ ແລະບັນດາປະເທດຕາເວັນຕົກຫຼາຍປະເທດ ມອງເຫັນພວກກຸ່ມກໍ່ການຮ້າຍນີ້ວ່າ ເປັນໄພຂົ່ມຂູ່ທີ່ຮ້າຍແຮງສຸດຕໍ່ໂລກ ແລະຊຸກຍູ້ໃຫ້ມີການປະສານງານຮ່ວມ ຈາກບັນ ດາປະເທດອາຣັບ ໃນຄວາມພະຍາຍາມເພື່ອປາບປາມກຸ່ມດັ່ງກ່າວ.
ຈາກຊ້າຍຫາຂວາ, ຮອງນາຍົກລັດຖະມົນຕີ Oman ທ່ານ Fahd bin Mahmoud al-Said, ປ. ສະຫະລັດ Barack Obama, ພະຣາຊາ Saudi Arabia ແລະ ພະຣາຊາ Bahrain - Hamad bin Isa al Khalifa ທີ່ພະຣຊດຊະວັງ Diriyah ໃນ Riyadh, Saudi Arabia, 21 ເມສາ, 2016.
ກອງປະຊຸມຮອບສຸດທ້າຍແມ່ນຮວມທັງການສົນທະນາ ກ່ຽວກັບເລື້ອງອິຣ່ານ ແລະການສ້າງ ຄວາມບໍ່ທຸ່ນທ່ຽງຂອງປະເທດດັ່ງກ່າວຢູ່ໃນຂົງເຂດ.
ເຕຫະຣານ ໄດ້ໜູນຫຼັງກຸ່ມກະບົດ Houthi ໃນເຢເມນ ບ່ອນທີ່ Saudi Arabia ໄດ້ທຳ ການ ປະຕິບັດງານທາງທະຫານ ຕໍ່ກຸ່ມກະບົດ Houthi ໃນທີ່ນັ້ນ.
ທ່ານ Hussein Ibish ນັກວິເຄາະ ທີ່ເປັນນັກວິຊາການອະວຸໂສຂອງສະຖາບັນປະເທດ ອາຣັບ ເຂດອ່າວເປີເຊຍ ທີ່ນະຄອນຫຼວງວໍຊິງຕັນ ໄດ້ກ່າວວ່າ ທ່ານ ໂອບາມາ ຈະນຳໃຊ້ກອງປະຊຸມສຸດຍອດ ດັ່ງກ່າວນີ້ ເພື່ອຄ້ຳປະກັນ ຄູ່ພາຄີໃນອ່າວເປີເຊຍ ເຖິງຄວາມໝາຍໝັ້ນຕັ້ງໃຈຂອງສະຫະລັດ ຕໍ່ຄວາມໝັ້ນຄົງໃນຂົງເຂດ ແລະເອົາບາດກ້າວທີ່ເຂັ້ມແຂງຂຶ້ນ ຕໍ່ອິຣ່ານ.