ປະທານາທິບໍດີສະຫະລັດ ທ່ານບາຣັກ ໂອມາມາ ພ້ອມດ້ວຍທ່ານນາງ Michelle Obama ສັດຕີໝາຍເລກນຶ່ງ ພ້ອມກັບອະດີດປະທານາທິ ບໍດີ George W. Bush ແລະພັນລະຍາ ທ່ານນາງ Laura Bush ໄດ້ໄປຮ່ວມພິທີໄວ້ອາໄລໃນວັນອາທິດມື້ນີ້ ເພື່ອລະລຶກເຖິງດວງວິນຍານຂອງພວກທີ່ໄດ້ເສຍຊີວິດໄປ ໃນການໂຈມຕີຂອງພວກກໍ່ການຮ້າຍ ໃນວັນທີ 11 ເດືອນກັນຍາປີ 2001 ທີ່ອະນຸສາວະລີ September 11 ຫລືວັນທີ 11 ກັນຍາ ແຫ່ງຊາດ ຊຶ່ງຕັ້ງຢູ່ບ່ອນສູນການຄ້າໂລກເກົ່າທີ່ຖືກໂຈມຕີນັ້ນ.
ຂະນະທີ່ທ່ານຟັງຂ່າວຢູ່ນີ້ ຊຶ່ງເປັນເວລາປະມານ 8 ໂມງເຄິ່ງຕອນເຊົ້າຢູ່ວໍຊິງຕັນ ແລະ
ນິວຢອກ ບ່ອນທີ່ພິທີຈະເລີ່ມຂຶ້ນຢູ່ທີ່ອະນຸສາວະລີດັ່ງກ່າວ.
ຫລັງຈາກຈົບພິທີທີ່ນິວຢອກ ທ່ານໂອບາມາພ້ອມດ້ວຍພັນລະຍາຈະເດີນທາງໄປຍັງເມືອງ
Shanksville ລັດ Pennsylvania ເພື່ອຮ່ວມພິທີໄວ້ອາໄລຢູ່ບ່ອນທີ່ເຮືອບິນໂດຍສານ
United Airlines ຖ້ຽວບິນທີ 93 ຕົກລົງໃນລະຫວ່າງການໂຈມຕີຂອງພວກກໍ່ການຮ້າຍ
ເມື່ອ 10 ປີ ຜ່ານມານັ້ນ.
ຫລັງຈາກນັ້ນ ທັງສອງທ່ານກໍຈະເດີນທາງມາຍັງທໍານຽບຫ້າແຈ ຊຶ່ງຕັ້ງຢູ່ໃນລັດ
Virginia ນອກກຸງວໍຊິງຕັນພຽງນ້ອຍດຽວ ເພື່ອວາງພວງມາລາໄວ້ອາໄລນໍາພວກທີ່
ໄດ້ຮັບເຄາະຮ້າຍໃນການໂຈມຕີຕໍ່ຕຶກອາຄານໃຫຍ່ 5 ແຈ ຂອງກະຊວງປ້ອງກັນປະ
ເທດສະຫະລັດນັ້ນ.
ໃນຕອນແລງວັນອາທິດມື້ນີ້ ທ່ານໂອບາມາພ້ອມກັບພັນລະຍາ ຈະໄປເບິ່ງການສະແດງ
ດົນຕີທີ່ມີຊື່ວ່າ Concert of Hope ຫລື Concert ເພື່ອຄວາມຫວັງ ຢູ່ສູນກາງສະແດງ
ສິນລະປະ Kennedy Center ທີ່ກຸງວໍຊິງຕັນ.
ອະດີດປະທານາທິບໍດີ George W. Bush ແລະອະດີດປະທານາທິບໍດີ Bill Clinton
ພ້ອມທັງຮອງປະທານາທິບໍດີ Joe Biden ກໍໄດ້ໄປຮ່ວມໃນພິທີທີ່ເມືອງ Shanksville
ລັດ Pennsylvania ໃນວັນເສົາວານນີ້ ເພື່ອມອບອະນຸສາວະລີແຫ່ງນຶ່ງສໍາລັບພວກ
ເຄາະຮ້າຍໃນຖ້ຽວບິນ 93 ທີ່ໄດ້ຕົກລົງໃນທົ່ງຫຍ້າແຫ່ງນຶ່ງໃນລະຫວ່າງການໂຈມຕີ
ຂອງພວກກໍ່ການຮ້າຍນັ້ນ.
ອະນຸສາວະລີແຫ່ງນີ້ແມ່ນເຮັດດ້ວຍຫິນຂາວ ແລະເປັນອະນຸສອນແກ່ຄວາມພະຍາຍາມ
ຂອງພວກຄົນໂດຍສານແລະພວກລູກເຮືອໃນຖ້ຽວບິນທີ 93 ທີ່ໄດ້ຕໍ່ສູ້ຈົນເອົາຊະນະພວກ
ຈີ້ເຮືອບິນແລະບັງຄັບໃຫ້ເຮືອບິນລໍານັ້ນຕົກລົງສູ່ພື້ນດິນ.