ໜ່ວຍສືບລັບຂອງເກົາຫຼີໃຕ້ ກ່າວໃນວັນອັງຄານມື້ນີ້ວ່າ ນັກການທູດອາວຸໂສ ຂອງ ເກົາຫຼີເໜືອ ຢູ່ໃນຄິວບາ ໄດ້ຫຼົບໜີໄປເກົາຫຼີໃຕ້ ເຊິ່ງເປັນການຫຼົບໜີຄັ້ງ ຫຼ້າສຸດຂອງບັນດາສະມາຊິກຜູ້ນຳຂັ້ນສູງຂອງເກົາຫຼີເໜືອ ໃນຊຸມປີມໍ່ໆມານີ້, ອີງຕາມອົງການຂ່າວ AP.
ອົງການສືບລັບແຫ່ງຊາດ ຫຼື NIS ກ່າວວ່າ ລາຍງານຂອງສື່ມວນຊົນ ກ່ຽວກັບ ການຫຼົບໜີຂອງທີ່ປຶກສາດ້ານການເມືອງຂອງເກົາຫຼີເໜືອຄົນນຶ່ງ ໃນຄິວບາ ເປັນຄວາມຈິງ. ຖະແຫຼງການສັ້ນຂອງຫ້ອງການວຽກງານສາທາລະນະຂອງ NIS ບໍ່ໄດ້ໃຫ້ລາຍລະອຽດເພີ່ມເຕີມ.
ໜັງສືພິມ ໂຈຊຸນ ອິລໂບ (Chosun Ilbo) ຂອງເກົາຫຼີໃຕ້ ລາຍງານໃນວັນອັງຄານມື້ນີ້ວ່າ ນັກການທູດທ່ານ ຣີ ອິລ ກຢູ (Ri Il Kyu) ໄດ້ໜີໄປເກົາຫລີໃຕ້ພ້ອມກັບພັນລະຍາ ແລະລູກໆຂອງທ່ານໃນເດືອນພະຈິກ.
ໜັງສືພິມ ໂຈຊຸນ ອິລໂບ (Chosun Ilbo) ໄດ້ອ້າງເຖິງ ທ່ານ ຣີ (Ri) ທີ່ໄດ້ ກ່າວຕໍ່ໜັງສືພິມດັ່ງກ່າວ ໃນການໃຫ້ສໍາພາດວ່າ ທ່ານໄດ້ຕັດສິນໃຈ ຫຼົບໜີ ເນື່ອງຈາກອັນທີ່ທ່ານເອີ້ນວ່າ ຄວາມບໍ່ເອົາໃຈໃສ່ຕໍ່ລະບົບການເມືອງຂອງ ເກົາຫຼີເໜືອ, ການປະເມີນວຽກທີ່ບໍ່ຍຸຕິທຳ ໂດຍກະຊວງການຕ່າງປະເທດ ຂອງພຽງຢາງ ແລະການບໍ່ເຫັນດີຂອງກະຊວງການຕ່າງປະເທດຂອງພຽງຢາງ ຕໍ່ຄວາມຫວັງທີ່ຈະໄປ ເມັກຊິໂກ ເພື່ອການປິ່ນປົວຄວາມເສຍຫາຍດ້ານລະບົບ ປະສາດຂອງທ່ານ. ທ່ານກ່າວວ່າ ໂຮງໝໍໃນຄິວບາ ບໍ່ມີອຸປະກອນການແພດທີ່ຈຳເປັນເພື່ອປິ່ນປົວບັນຫາສຸຂະພາບຂອງທ່ານ ເນື່ອງຈາກການລົງໂທດຂອງສາກົນ.
ສື່ມວນຊົນຂອງເກົາຫຼີໃຕ້ອື່ນໆ ກໍມີການລາຍງານທີ່ຄ້າຍຄືກັນ ໃນວັນອັງຄານມື້ນີ້.
ທ່ານ ຣີ (Ri) ໄດ້ຫຼົບໜີ ກ່ອນທີ່ ເກົາຫຼີໃຕ້ ແລະ ຄິວບາ ຈະສ້າງສາຍສຳພັນ ທາງການທູດ ໃນເດືອນກຸມພາ, ເຊິ່ງເປັນເຫດການທີ່ບັນດານັກຊ່ຽວຊານ ກ່າວວ່າ ອາດຈະສ້າງຄວາມເສຍຫາຍທາງດ້ານການເມືອງຕໍ່ເກົາຫຼີເໜືອ, ເຊິ່ງພື້ນຖານທາງການທູດແມ່ນຂຶ້ນກັບພັນທະມິດຈຳນວນບໍ່ຫຼາຍ ໃນຍຸກສົງ ຄາມເຢັນ ເຊັ່ນ ຄິວບາ.