ເກົາຫຼີເໜືອກ່າວໃນວັນພຸດມື້ນີ້ວ່າ ຕົນໄດ້ທົດລອງລູກສອນໄຟຂີປະນາວຸດໄວກວ່າສຽງ ໄລຍະກາງລຸ້ນໃໝ່ ທີ່ມີລະບົບຂັບເຄື່ອນທີ່ມີລັກສະນະເປັນທາດແຂງ ໃນຂະນະທີ່ຍັງສືບຕໍ່ຂະຫຍາຍໂຄງການນິວເຄລຍ ແລະລູກສອນໄຟຂອງຕົນ ທ່າມກາງຄວາມເຄັ່ງຕຶງທີ່ຮຸນແຮງຂຶ້ນ ກັບປະເທດເພື່ອນບ້ານ ແລະສະຫະລັດ, ອີງຕາມອົງການຂ່າວເອພີ.
ລາຍງານຂອງສື່ມວນຊົນລັດຂອງເກົາຫລີເໜືອ ມີຂຶ້ນນຶ່ງມື້ ຫລັງຈາກທີ່ກອງທັບເກົາຫລີໃຕ້ ແລະຍີ່ປຸ່ນໄດ້ກວດພົບວ່າ ເກົາຫລີເໜືອໄດ້ຍິງລູກສອນໄຟຂີປະນາວຸດຈາກເຂດພື້ນທີ່ພາຍໃນປະເທດ ໃນບໍລິເວນອ້ອມນະຄອນຫຼວງຂອງຕົນ ທີ່ມຸ່ງໜ້າໄປສູ່ທະເລທາງພາກຕາເວັນອອກຂອງຕົນ.
ສື່ມວນຊົນລັດຂອງເກົາຫຼີເໜືອ ກ່າວວ່າ ການທົດລອງຄັ້ງນີ້ ຢູ່ພາຍໃຕ້ການຄວບຄຸມຂອງຜູ້ນໍາ ກິມ ຈອງ ອຶນ (Kim Jong Un) ຜູ້ທີ່ອະທິບາຍວ່າ ລູກສອນໄຟທີ່ມີຊື່ວ່າ ຮວາຊອງ - 16 ບີ (Hwasong-16B) ແມ່ນເປັນສ່ວນສຳຄັນຂອງການປ້ອງກັນໃນສົງຄາມນິວເຄລຍຂອງຕົນ ຊຶ່ງທ່ານໄດ້ປະຕິຍານວ່າ ຈະສືບຕໍ່ສ້າງຂຶ້ນຕື່ມອີກເພື່ອຕອບໂຕ້ ‘ສັດຕູ’ ຂອງຕົນ, ເຊິ່ງໝາຍເຖິງສະຫະລັດ, ເກົາຫຼີໃຕ້ ແລະຍີ່ປຸ່ນ.
ທ່ານ ກິມ ອ້າງວ່າ ປັດຈຸບັນ ເກົາຫຼີເໜືອໄດ້ພັດທະນາລະບົບເຊື້ອໄຟແຂງທີ່ມີຄວາມສາມາດດ້ານນິວເຄລຍ ສຳລັບ “ລູກສອນໄຟຍຸດທະວິທີ, ປະຕິບັດການ ແລະ ຍຸດທະສາດທັງໝົດ ທີ່ມີໄລຍະຕ່າງກັນ” ອົງການຂ່າວສູນກາງຂອງເກົາຫຼີ ກ່າວ.
ໃນຊຸມປີມໍ່ໆມານີ້, ເກົາຫຼີເໜືອໄດ້ສຸມໃສ່ການພັດທະນາອາວຸດຍຸດໂທປະກອນທີ່ມີລະບົບຂັບເຄື່ອນເປັດທາດແຂງທີ່ຕິດຕັ້ງໃສ່ ໃຫ້ຫຼາຍຂຶ້ນ. ອາວຸດເຫຼົ່ານັ້ນແມ່ນເຄື່ອນຍ້າຍ ແລະ ເຊື່ອງໄດ້ງ່າຍກວ່າ ແລະສາມາດຍິງໄດ້ໄວກວ່າຂີປະນາວຸດທີ່ຂັບເຄື່ອນດ້ວຍທາດແຫຼວ, ເຊິ່ງຈໍາເປັນຕ້ອງໄດ້ຕື່ມເຊື້ອໄຟກ່ອນຍິງອອກໄປ ແລະບໍ່ສາມາດເປັນເຊື້ຶອໄຟຢູ່ໄດ້ເປັນເວລາດົນນານ.