ຜູ້ນຳເກົາຫຼີເໜືອ ທ່ານ ກິມ ຈົງ ອຶນ ໄດ້ເດີນທາງໄປຢ້ຽມຢາມຖານຍິງຂີປະ ນາວຸດ ເພື່ອກວດກາເບິ່ງຄວາມພ້ອມໃນການປະຕິບັດງານ ກ່ຽວກັບ “ການຂັດ ຂວາງດ້ານຍຸດທະສາດ,” ໃນຂະນະດຽວກັນ ກໍຮ້ອງຄວາມອາດສາມາດທາງ ດ້ານນິວເຄລຍຂອງສະຫະລັດວ່າ ກໍາລັງເພີ້ມໄພຂົ່ມຂູ່ຕໍ່ປະເທດຂອງຕົນ.
ຄັງແສງອາວຸດນິວເຄລຍຍຸດທະສາດຂອງ ສະຫະລັດ ມີລັກສະນະເປັນ “ໄພຂົ່ມຂູ່ເພີ້ມຂຶ້ນເລື້ອຍໆ” ຕໍ່ສະພາບແວດລ້ອມດ້ານຄວາມໝັ້ນຄົງຂອງເກົາຫຼີເໜືອ, ເຊິ່ງຮຽກຮ້ອງໃຫ້ພຽງຢາງ ຕ້ອງຮັກສາທ່າທີຕອບໂຕ້ຢ່າງເຄັ່ງຄັດສໍາລັບກອງກຳລັງນິວເຄລຍຂອງຕົນ, ອີງຕາມການເປີດເຜີຍໂດຍອົງການຂ່າວ KCNA ທີ່ອ້າງຈາກຄໍາເວົ້າຂອງທ່ານ.
ເກົາຫຼີເໜືອ ໄດ້ດໍາເນີນບາດກ້າວເລັ່ງການພັດທະນາລູກສອນໄຟຂີປະນາວຸດ ແລະອາວຸດນິວເຄລຍ ສົ່ງຜົນເຮັດໃຫ້ສາກົນດໍາເນີນມາດຕະການລົງໂທດຕ່າງໆ, ນອກຈາກນັ້ນ ຍັງໄດ້ສ້າງການພົວພັນທີ່ໃກ້ຊິດດ້ານການທະຫານກັບ ຣັດເຊຍ ອີກດ້ວຍ.
ການຢ້ຽມຢາມຖານທັບຂອງ ທ່ານ ກິມ ມີຂຶ້ນທ່າມກາງຄວາມເຄັ່ງຕຶງທີ່ກໍາລັງ ເພີ້ມຂຶ້ນກັບ ເກົາຫຼີໃຕ້ ແລະບັນດາພັນທະມິດຂອງພວກເຂົາ. ໃນນີ້ ໄດ້ເຮັດ ໃຫ້ເກີດຄວາມກັງວົນໃນອັນທີ່ລັດຖະບານໂຊລກ່າວວ່າ ເປັນການສົ່ງທະຫານ ເກົາຫຼີເໜືອ ໄປຍັງ ຣັດເຊຍ ເພື່ອທໍາການສູ້ລົບຢູ່ໃນ ຢູເຄຣນ, ເຊິ່ງຄຳກ່າວ ອ້າງດັ່ງກ່າວນີ້ ຖືກປະຕິເສດໂດຍ ພຽງຢາງ.
ທີ່ປຶກສາດ້ານຄວາມໝັ້ນຄົງແຫ່ງຊາດຂອງເກົາຫຼີໃຕ້ ທ່ານ ຊິນ ວອນ-ຊິກ (Shin Won-sik) ແລະ ທ່ານ ຢາເຊັກ ຊີວີຣາ (Jacek Siewiera) ຫົວໜ້າກົມຮັກສາຄວາມໝັ້ນຄົງແຫ່ງຊາດຂອງ ໂປແລນ, ໄດ້ສະແດງຄວາມ ກັງວົນຕໍ່ການຮ່ວມມືທາງທະຫານຂອງ ພຽງຢາງ ກັບ ມົສກູ ໃນລະຫວ່າງການ ປະຊຸມຢູ່ນະຄອນຫຼວງໂຊລ.
ທັງສອງປະເທດ ຍັງເຫັນດີຮ່ວມມືຢ່າງແໜ້ນແຟ້ນກັບປະຊາຄົມສາກົນ ກ່ຽວກັບບັນຫາດັ່ງກ່າວ, ອີງຕາມຖະແຫຼງການສະບັບນຶ່ງທີ່ເຜີຍແຜ່ໂດຍທໍານຽບ ປະທານາທິບໍດີຂອງ ເກົາຫຼີໃຕ້.
ໃນບົດລາຍງານຂອງອົງການຂ່າວ KCNA, ທ່ານ ກິມ ຍັງໄດ້ຮຽກຮ້ອງໃຫ້ກອງກຳລັງປັບປຸງອາວຸດໃຫ້ທັນສະໄໝ ໂດຍໃຫ້ຄວາມສໍາຄັນກັບລູກສອນໄຟຍຸດທະສາດໃນອະນາຄົດ, ເຊິ່ງໄດ້ຮ້ອງສິ່ງດັ່ງກ່າວນີ້ວ່າ “ຫຼັກການແຫ່ງຄວາມສຳຄັນດ້ານຍຸດທະສາດ ເພື່ອກໍ່ສ້າງກຳລັງປ້ອງກັນຊາດ.”
ທ່ານ ກິມ ໄດ້ເດີນທາງໄປພ້ອມກັບ ທ່ານນາງ ກິມ ໂຢ ຈົງ, ນ້ອງສາວຜູ້ມີອຳນາດຂອງທ່ານ, ແລະ ທ່ານ ກິມ ຈົງ ຊິກ (Kim Jong Sik), ຮອງຜູ້ອຳນວຍການຂັ້ນທຳອິດຂອງຄະນະກຳມະການສູນກາງພັກແຮງງານທີ່ປົກຄອງປະເທດຂອງເກົາຫຼີເໜືອ, ອີງຕາມອົງການຂ່າວ KCNA.