ອົງການຂ່າວທາງການຂອງເກົາຫຼີເໜືອ KCNA ລາຍງານໃນວັນພຸດວານນີ້ວ່າ ຊາວໜຸ່ມຄົນລຸ້ນໃໝ່ປະມານ 1.4 ລ້ານຄົນ ໄດ້ສະໝັກສະໝັກຂໍເຂົ້າຮ່ວມໜ່ວຍ ງານອົງການປ້ອງກັນປະເທດໃນອາທິດນີ້, ເຊິ່ງບາງຄົນໃນເມື່ອເຄີຍເຂົ້າຮ່ວມ ກອງທັບມາກ່ອນ.
ໃນຂະນະດຽວກັນ, ສື່ມວນຊົນຂອງລັດຖະບານເກົາຫຼີເໜືອ ໄດ້ກ່າວຫາ ເກົາຫຼີໃຕ້ວ່າ ການສົ່ງໂດຣນເຂົ້າໄປໃນ ເກົາຫລີເໜືອ ສົ່ງຜົນເຮັດໃຫ້ “ສະຖານະການ ມີຄວາມເຄັ່ງຕຶງ ແລະເຂົ້າໃກ້ສົງຄາມຍິ່ງຂຶ້ນ.”
ແຕ່ທີ່ຜ່ານມາ, ລັດຖະບານໂຊລປະຕິເສດທີ່ຈະກ່າວຝ່າຍທະຫານ ຫຼື ພົນລະເຮືອນຂອງຕົນໄດ້ສົ່ງໂດຣນທີ່ລັດຖະບານພຽງຢາງອ້າງ ເຂົ້າໄປໃນເກົາຫຼີເໜືອ.
ອົງການຂ່າວ KCNA ກ່າວວ່າ ຄົນລຸ້ນໃໝ່ເຫຼົ່ານີ້ ຕັ້ງໃຈທີ່ຈະຕໍ່ສູ້ “ໃນສົງຄາມ ອັນສັກສິດ ເພື່ອທໍາລາຍລ້າງສັດຕູ.”
ຮູບພາບປະກອບຂ່າວສະແດງໃຫ້ເຫັນວ່າ ມີຊາຍໜຸ່ມ ຍິງ-ສາວ ພາກັນມາລົງ ທະບຽນຢູ່ສະຖານທີ່ແຫ່ງນຶ່ງທີ່ບໍ່ໄດ້ລະບຸວ່າ ຢູ່ຂົງເຂດໃດ.
ຄຳກ່າວອ້າງຂອງລັດຖະບານພຽງຢາງໃນຄັ້ງນີ້ ມີຂຶ້ນໃນຂະນະທີ່ຄວາມເຄັ່ງຕຶງລະຫວ່າງສອງເກົາຫຼີ ເພີ້ມຂຶ້ນຢ່າງຈະແຈ້ງ.
ໃນກ່ອນໜ້ານີ້, ເມື່ອມີບັນຍາກາດແຫ່ງການຂັດແຍ້ງກັນລະຫວ່າງໂສມແດງ ແລະ ໂສມຂາວ, ເກົາຫຼີເໜືອ ຍັງມັກປະກາດການເຂົ້າຮ່ວມກອງທັບຂອງຊາວໜຸ່ມລຸ້ນໃໝ່ເຊັ່ນກັນ.
ເມື່ອປີທີ່ຜ່ານມາ ສື່ມວນຊົນຂອງລັດຖະບານພຽງຢາງກ່າວວ່າ ມີປະຊາຊົນ 800,000 ຄົນ ໄດ້ສະໝັກໃຈເຂົ້າຮ່ວມກອງທັບເພື່ອຕໍ່ສູ້ກັບ ສະຫະລັດ.
ນອກຈາກນັ້ນ, ເມື່ອ 7 ປີກ່ອນຫນ້ານີ້ ອົງການຂ່າວທາງການລາຍງານວ່າ ແຮງງານ ພ້ອມທັງສະມາຊິກພັກ ແລະອະດີດທະຫານທັງໝົດ 3.5 ລ້ານຄົນໄດ້ຂໍເຂົ້າຮ່ວມການເປັນທະຫານກັບກອງທັບ.
ອົງການຂ່າວ Reuters ລາຍງານວ່າ ມັນເປັນການຍາກທີ່ຈະຢືນຢັນຄວາມຖືກ ຕ້ອງຂອງການກ່າວອ້າງເຫຼົ່ານີ້ໂດຍ ເກົາຫຼີເໜືອ.
ຂໍ້ມູນຈາກສະຖາບັນ ສະຖາບັນສໍາລັບການສຶກສາດ້ານຍຸດທະສາດສາກົນ ຫຼື IISS ລະບຸອອກມາວ່າ ເກົາຫຼີເໜືອມີທະຫານຢູ່ໃນກອງທັບຈໍານວນ 1.28 ລ້ານຄົນ ແລະຍັງມີທະຫານສໍາຮອງອີກຈໍານວນ 600,000 ຄົນ.
ອົງການ IISS ຍັງກ່າວອີກວ່າ ໂສມແດງ (ເກົາຫຼີເໜືອ) ຍັງມີກຸ່ມທີ່ເປັນກຳລັງສຳຮອງພາຍໃຕ້ໜ່ວຍແຮງງານກຳມະກອນ ແລະຊາວນາ ເຊິ່ງຮ້ອງວ່າ ທະຫານກອງແດງ ກຳມະກອນ-ຊາວນາ ຫຼື Worker/Peasant Red Guard ຈໍານວນ 5.7 ລ້ານຄົນ, ແຕ່ຫຼາຍກຸ່ມເຫຼົ່ານີ້ ບໍ່ໄດ້ປະກອບອາວຸດ.
ຫຼ້າສຸດ, ໃນວັນອັງຄານແລ້ວນີ້ ເກົາຫຼີເໜືອໄດ້ລະເບີດບາງສ່ວນຂອງຖະໜົນແລະເສັ້ນທາງລົດໄຟທີ່ເຊື່ອມຕໍ່ສອງເກົາຫລີ ໃນຝັ່ງຂອງຕົນ ເຮັດໃຫ້ ເກົາຫລີໃຕ້ ຍິງປືນເຕືອນຫຼາຍຄັ້ງ.
ໃນອາທິດແລ້ວນີ້, ພຽງຢາງກ່າວວ່າ ຈະທໍາການຕັດເສັ້ນທາງລົດໄຟທັງໝົດລະຫວ່າງສອງເກົາຫຼີ, ເຊິ່ງເປັນສັນຍານອີກສັນຍານອັນນຶ່ງທີ່ເຫັນໄດ້ວ່າ ເກົາຫຼີເໜືອ ຢາກແຍກຕົວອອກຈາກ ເກົາຫຼີໃຕ້ ຢ່າງຈະແຈ້ງ. ແລະຕ້ອງການປະຖິ້ມຄວາມພະຍາຍາມໃນການລວມປະເທດທີ່ມີມາແຕ່ດົນນານ.
ທາງດ້ານເຕັກນິກ, ເກົາຫຼີເໜືອ ແລະ ເກົາຫຼີໃຕ້ ແມ່ນຍັງຢູ່ໃນສະຖານະການສົງຄາມ ລຸນຫຼັງສົງຄາມເກົາຫຼີໃນຊຸມປີ 1950 ຫາ 53, ເນື່ອງຈາກຍັງບໍ່ໄດ້ເຊັນສົນທິສັນຍາສັນຕິພາບຮ່ວມກັນ.
ອົງການຂ່າວ KCNA ກ່າວວ່າ ຖ້າສົງຄາມຫາກເກີດຂຶ້ນ, ເກົາຫຼີໃຕ້ ຈະຖືກ “ລຶບລ້າງອອກຈາກແຜນທີ່.”
ໃນວັນອາທິດແລ້ວນີ້, ກະຊວງປ້ອງກັນປະເທດຂອງລັດຖະບານໂຊລອອກມາເຕືອນວ່າ ຖ້າ ເກົາຫຼີເໜືອ ກໍ່ອັນຕະລາຍຕໍ່ປະຊາຊົນຊາວ ເກົາຫຼີໃຕ້ “ມື້ນັ້ນ ຈະເປັນມື້ສຸດທ້າຍຂອງລະບອບ ເກົາຫຼີເໜືອ,” ອີງຕາມອົງການຂ່າວ ຢອນຮັບ (Yonhap).