ນັກວິໄຈໃນ ສະຫະລັດ ໄດ້ວິເຄາະພາບຖ່າຍດາວທຽມໃນເກົາຫຼີເໜືອ ແລະ ສະຫຼຸບຄວາມວ່າ ລັດຖະບານພຽງຢາງ ກຳລັງທຳການຂະຫຍາຍໂຮງງານຜະລິດລູກສອນໄຟຂີປະນາວຸດຂອງຕົນ ເພື່ອຊ່ວຍ ຣັດເຊຍ ເຮັດສົງຄາມໃນ
ຢູເຄຣນ, ອີງຕາມລາຍງານຂອງອົງການຂ່າວ ຣອຍເຕີ.
ທ່ານ ແຊມ ແລຣ໌ ນັກວິໄຈຈາກສູນ James Martin ເພື່ອການສຶກສາການປົດອາວຸດນິວເຄລຍ ຫຼື CNS ຂອງສະຖາບັນ ມິດໂດບູຣີ ເພື່ອການສຶກສາສາກົນ ຊຶ່ງຕັ້ງຢູ່ທີ່ເມືອງ ມອນເທີຣີ ລັດ ຄາລິຟໍເນຍ ໄດ້ກ່າວວ່າ ໂຮງງານດັ່ງກ່າວມີຊື່ວ່າ February 11 ແລະ ເປັນສ່ວນນຶ່ງຂອງສູນຜະລິດເຄື່ອງຈັກ Ryongsong ໃນເມືອງ ຮຳຮັງ ຊຶ່ງເປັນເມືອງທີ່ມີຂະໜາດໃຫຍ່ເປັນອັນດັບສອງຂອງປະເທດ ແລະ ເປັນໂຮງງານແຫ່ງດຽວທີ່ຮູ້ກັນດີວ່າ ເປັນສະຖານທີ່ຜະລິດລູກສອນໄຟຂີປະນາວຸດ ຮວາຊອງ-11 ທີ່ໃຊ້ເຊື້ອໄຟແຂງເປັນສ່ວນປະກອບ.
ພ້ອມກັນນີ້, ເຈົ້າໜ້າທີ່ ຢູເຄຣນ ລາຍງານວ່າລູກສອນໄຟຂີປະນາວຸດ ຮວາຊອງ-11 ທີ່ປະເທດຕາເວັນຕົກຮູ້ຈັກກັນໃນຊື່ລູກສອນໄຟຂີປະນາວຸດ KN-23 ຖືກກອງທັບ ຣັດເຊຍ ນຳເອົາມາໃຊ້ເພື່ອໂຈມຕີ ຢູເຄຣນ.
ອົງການຂ່າວ ຣອຍເຕີ ລະບຸວ່າ ບໍ່ເຄີຍມີລາຍງານຂ່າວການຂະຫຍາຍພື້ນທີ່ໂຮງງານທີ່ວ່ານີ້ມາກ່ອນເລີຍ.
ທັງ ມົສກູ ແລະ ພຽງຢາງ ຕ່າງກໍປະຕິເສດຂ່າວທີ່ວ່າ ເກົາຫຼີເໜືອ ໂອນຖ່າຍອາວຸດຕ່າງໆໃຫ້ ຣັດເຊຍ ເພື່ອໃຊ້ສູ້ຮົບກັບ ຢູເຄຣນ ເຖິງແມ່ນສອງປະເທດນີ້ຈະລົງນາມໃນສົນທິສັນຍາດ້ານການປ້ອງກັນປະເທດນຳກັນເມື່ອເດືອນມິຖຸນາທີ່ຜ່ານມາ ແລະ ປະກາດຄຳໝັ້ນທີ່ຈະຍົກລະດັບຄວາມສຳພັນທາງທະຫານລະຫວ່າງສອງປະເທດນັ້ນກໍຕາມ.
ອົງການຂ່າວຣອຍເຕີ ໄດ້ຕິດຕໍ່ຫາຄະນະຜູ້ແທນ ເກົາຫຼີເໜືອ ປະຈຳອົງການສະຫະປະຊາຊາດ ເພື່ອຂໍຄວາມເຫັນໃນເລື່ອງນີ້ ແຕ່ກໍບໍ່ໄດ້ຮັບການຕອບກັບ.
ພ້ອມກັນນີ້ ການວິເຄາະໂດຍນັກວິໄຈຂອງ CNS ລະບຸວ່າ ພາບຖ່າຍດາວທຽມທີ່ບັນທຶກໄວ້ໂດຍບໍລິສັດດາວທຽມ Planet Labs ເມື່ອຕົ້ນເດືອນຕຸລາທີ່ຜ່ານມາສະແດງໃຫ້ເຫັນວ່າ ມີການເດີນໜ້າງສ້າງອາຄານໂຮງງານຕໍ່ເຕີມ ລວມທັງອາຄານທີ່ພັກຊຶ່ງເຊື່ອວ່າມີໄວ້ຮອງຮັບຄົນງານດ້ວຍ.
ນັກຈາກນັ້ນ, ການວິເຄາະຍັງເຊື່ອວ່າ ລັດຖະບານ ພຽງຢາງ ກຳລັງທຳການປັບປຸງທາງເຂົ້າໂຮງງານໃຕ້ດິນຂອງພື້ນທີ່ຕັ້ງໂຮງງານນີ້ດ້ວຍ.