ເກົາຫຼີເໜືອກ່າວວ່າ ຕົນສາມາດສົ່ງດາວທຽມສອດແນມຂຶ້ນສູ່ວົງໂຄຈອນໄດ້ສຳເລັດເປັນເທື່ອທຳອິດ ໃນແລງວັນອັງຄານທີ່ຜ່ານມາ ແລະປະກາດວ່າ ຈະສົ່ງດາວທຽມຂຶ້ນຕື່ມອີກຫຼາຍໜ່ວຍ “ໃນໄລຍະອີກບໍ່ດົນນີ້.” ດາວທຽມເຫຼົ່ານີ້ ອາດຈະອຳນວຍໃຫ້ເກົາຫຼີເໜືອມີຄວາມສາມາດທີ່ຈະຕິດຕາມເບິ່ງການເຄື່ອນໄຫວທາງທະຫານ ຂອງສະຫະລັດແລະເກົາຫຼີໃຕ້ ດັ່ງທີ່ບິລ ກາລໂລ ມີລາຍງານຈາກໂຊລ ຊຶ່ງໄພສານຈະນຳເອົາລາຍລະອຽດ ມາສະເໜີທ່ານ ໃນອັນດັບຕໍ່ໄປ.
Your browser doesn’t support HTML5
ເຊີນຟັງລາຍງານ ເກົາຫຼີເໜືອກ່າວວ່າ ຕົນໄດ້ສົ່ງດາວທຽມສອດແນມ ຂຶ້ນສູ່ວົງໂຄຈອນ ດ້ວຍຄວາມສຳເລັດ
ຜູ້ນຳຂອງເກົາຫຼີເໜືອ ທ່ານກິມ ຈົງ ອຶນ ແມ່ນເປັນຜູ້ກຳກັບນຳການຍິງສົ່ງ ດາວທຽມສອດແນມຂຶ້ນສູ່ວົງໂຄຈອນ ຊຶ່ງອົງການຂ່າວຂອງທາງການ ເກົາຫຼີເໜືອກ່າວວ່າ ດຳເນີນໄປດ້ວຍຄວາມສຳເລັດຜົນ.
ທ່ານກິມ ຕ້ອງການຢາກໃຫ້ມີດາວທຽມສອດແນມ ຫຼາຍໆໜ່ວຍ ເພື່ອຕິດຕາມເບິ່ງການເຄື່ອນໄຫວທາງທະຫານຂອງສະຫະລັດ ແລະພັນທະມິດຢູ່ໃນຂົງເຂດ ແຕ່ ນັ້ນຈະຂຶ້ນຢູ່ກັບຈຳນວນ ແລະຄຸນນະພາບຂອງຮູບ ທີ່ດາວທຽມເຫຼົ່ານັ້ນສາມາດຖ່າຍເອົາ.
ໃນຕົ້ນປີນີ້ ກອງທັບເກົາຫຼີໃຕ້ໄດ້ຄົ້ນພົບຊິ້ນສ່ວນຂອງດາວທຽມເກົາຫຼີເໜືອທີ່ໄດ້ຕົກລົງໃສ່ທະເລ. ເກົາຫຼີໃຕ້ກ່າວວ່າ ອຸບປະກອນເຫຼົ່ານັ້ນ “ບໍ່ມີຄຸນນະປະໂຫຍດເລີຍ” ແຕ່ມັນກໍຍັງເປັນທີ່ຖົກຖຽງກັນຢູ່ ນັ້ນຄືຄຳເວົ້າຂອງນັກວິເຄາະ ທຽນແຣນ ຊູ (Tianran Xu) ຈາກເຄືອຂ່າຍເປີດກວ້າງນິວເຄລຍ ຊຶ່ງທ່ານກ່າວຕື່ມວ່າ:
“ຂ້າພະເຈົ້າຄິດວ່າ ເຖິງແມ່ນມັນເປັນພຽງດາວທຽມທີ່ມີຄວາມສາມາດໃນຂັ້ນພື້ນຖານກໍຕາມ ມັນອາດເປັນບາດກ້າວທຳອິດ ຫຼືອາດສາມາດປັບປຸງໃຫ້ການຮັບຮູ້ສະຖານະການຂອງເກົາຫຼີເໜືອດີຂຶ້ນ.”
Your browser doesn’t support HTML5
North Korea Says Spy Satellite Successfully Launched
ແຕ່ແນວໃດກໍຕາມ ການຍິງສົ່ງໃນວັນອັງຄານແລ້ວ ແມ່ນໄດ້ມີການຄາດກັນໄວ້ກ່ອນແລ້ວ ຈຶ່ງໄດ້ພາໃຫ້ມີການກຽມພ້ອມໃນທັນທີ ແລະການເຕືອນໄພ ໃຫ້ຍົກຍ້າຍປະຊາຊົນເປັນເວລາສັ້ນໆ ຢູ່ໃນພາກໃຕ້ຂອງຍີ່ປຸ່ນ.
ນາຍົກລັດຖະມົນຕີຍີ່ປຸ່ນ ທ່ານຟູມີໂອະ ກິຊິດະ ໄດ້ປະນາມ ການເຄື່ອນໄຫວຂອງເກົາຫຼີເໜືອ.
ທ່ານກິຊິດະ ກ່າວວ່າ “ເຖິງແມ່ນມີຈຸດປະສົງເພື່ອສົ່ງດາວທຽມກໍຈິງຢູ່ ແຕ່ການໃຊ້ເທັກໂນໂລຈີລູກສອນໄຟຂີປະນາວຸດ ແມ່ນຈະແຈ້ງ ເປັນການລ່ວງລະເມີດຕໍ່ມະຕິຕ່າງໆຂອງສະພາຄວາມໝັ້ນຄົງອົງການສະຫະປະຊາຊາດ. ນອກນັ້ນ ມັນຍັງເປັນເລື້ອງຮ້າຍແຮງ ທີ່ໄດ້ສ້າງຄວາມວິຕົກກັງວົນຢ່າງໃຫຍ່ຫຼວງ ຕໍ່ຄວາມປອດໄພຂອງປະຊາຊົນພວກເຮົາ.”
ສ່ວນປະທານາທິບໍດີເກົາຫຼີໃຕ້ ທ່ານຢູນ ຊຸກ ໂຢລ ພວມຢູ່ໃນລະຫວ່າງ ການຢ້ຽມຢາມປະເທດອັງກິດຢ່າງເປັນທາງການ. ໃນການຕອບໂຕ້ຕໍ່ການຍິງສົ່ງດັ່ງກ່າວ ທ່ານຢູນໄດ້ໃຫ້ການອະນຸມັດ ຕໍ່ການໂຈະຂໍ້ຕົກລົງທາງທະຫານເປັນບາງສ່ວນ ລະຫວ່າງສອງເກົາຫຼີ.
ຂໍ້ຕົກລົງປີ 2018 ໄດ້ມີການລົງນາມກັນ ໃນຊ່ວງໄລຍະເວລາທີ່ຄວາມສຳພັນທາງດ້ານການທູດລະຫວ່າງສອງເກົາຫຼີແມ່ນດີແບບທີ່ບໍ່ຄ່ອຍໄດ້ເຫັນກັນ.
ແຕ່ຄວາມສຳພັນທາງການທູດນັ້ນ ກໍຢູ່ໄດ້ບໍ່ດົນ. ເກົາຫຼີເໜືອ ໃນເວລາຕໍ່ມາກໍເລີ້ມທຳການທ້າທາຍທາງທະຫານຄືນໃໝ່ ຮວມທັງການທົດລອງອາວຸດ ທີ່ສຳຄັນໆ.
ການຍິງສົ່ງດາວທຽມຕື່ມ ກໍພວມຈະມີຂຶ້ນໃນອີກບໍ່ດົນ ເທື່ອນີ້ແມ່ນຈາກຝ່າຍເກົາຫຼີໃຕ້. ໃນທາຍເດືອນນີ້ ເກົາຫຼີໃຕ້ມີແຜນການທີ່ຈະສົ່ງດາວທຽມສອດແນມໜ່ວຍທຳອິດ ທີ່ສ້າງຂຶ້ນພາຍໃນປະເທດ ໂດຍຈະໃຊ້ຈະຫຼວດຂອງບໍລິສັດ SpaceX.