ຫົວໜ້າກຸ່ມຈັດຕັ້ງທີ່ເປັນຄັນຮົ່ມ ຫລືສູນກາງຂອງບັນດາ
ອົງການຊ່ວຍເຫລືອຕ່າງໆຂອງເອກະຊົນເກົາຫລີໃຕ້ກ່າວ
ວ່າ ສະພາວະອາກາດລະດູໜາວທີ່ໜາວຜິດປົກກະຕິ ກໍາ ລັງສົ່ງຜົນກະທົບຕໍ່ຊາວເກົາຫລີເໜືອ ຈໍານວນຫລາຍ .
ທ່ານ Park Hyun-seok ເປັນເລຂາທິການໃຫຍ່ຂອງ
ສະພາອົງການບໍ່ຂື້ນກັບລັດຖະບານ ຫລື ສະພາ NGO ສໍາລັບການຮ່ວມມືກັບເກົາຫລີເໜືອ.
ທ່ານ Park ເວົ້າວ່າ ທ່ານໄດ້ຮູ້ຈາກລາຍງານຂ່າວແລະ
ແຫລ່ງຕ່າງໆ ໂຮມທັງລັດຖະບານເກົາຫລີໃຕ້ນໍາ ວ່າ
ຊາວເກົາຫລີເໜືອຫລາຍຄົນກໍາລັງສູນເສຍຊີວິດ ຍ້ອນ
ສະພາບອາກາດໜາວຈັດ ແລະສະຖານນະການດ້ານ
ອາຫານ ແມ່ນຮ້າຍແຮງກວ່າສະພາບການຂາດແຄນ ສະບຽງອາຫານແລະຄວາມລໍາບາກຍາກແຄ້ນ ທີ່ຊາວເກົາຫລີເໜືອໄດ້ປະສົບມາເມື່ອປີ 1995 ນັ້ນ.
ສະພາບຄວາມອຶດຫິວໃນກາງຊຸມປີ 1990 ນັ້ນ ເຊື່ອວ່າໄດ້ສົ່ງຜົນໃຫ້ ຊາວເກົາຫລີເໜືອ ຫລາຍຮ້ອຍພັນຄົນເສຍຊີວິດໄປ. ນັບຕັ້ງແຕ່ນັ້ນມາ ເກົາຫລີ ເໜືອແມ່ນໄດ້ອາໃສກາງຕໍ່ການຊ່ວຍເຫລືອອາຫານຈາກຕ່າງປະເທດ ອັນມີສາເຫດມາຈາກໄພພິບັດທໍາມະຊາດຕ່າງໆ ແລະການບໍລິຫານເສດຖະກິດ ແບບບໍ່ຖືກບໍ່ຕ້ອງນັ້ນ.
ເມື່ອບໍ່ເທົ່າໃດອາທິດຜ່ານມານີ້ ອຸນນະຫະພູມແມ່ນຢູ່ຕໍ່າກວ່າລະດັບກ້າມ ເປັນນໍ້າກ້ອນ ໃນຂົງເຂດສ່ວນຫລາຍຂອງແຫລມເກົາຫລີ.
ອົງການຂ່າວທາງການຂອງເກົາຫລີເໜືອໄດ້ລາຍງານວ່າ ຄວາມໜາວເຢັນ ເປັນປະວັດການນັ້ນ ກໍາລັງສ້າງຄວາມລໍາບາກຍາກແຄ້ນໃຫ້ແກ່ຊີວິດຂອງປະຊາຊົນ ແລະອາດສ້າງຄວາມເສຍຫາຍຢ່າງໜັກໜ່ວງໃຫ້ແກ່ການປູກຝັງ ໃນລະດູບານໃໝ່ໄດ້.
ອົງການຊ່ວຍເຫລືອຕ່າງໆຂອງອົງການສະຫະປະຊາຊາດ ໄດ້ເລີ່ມອອກຄໍາເຕືອນມາໄດ້
ຫລາຍໆເດືອນແລ້ວວ່າ ປະຊາຊົນຫລາຍລ້ານຄົນໃນເກົາຫລີ ເໜືອ ປະເຊີນກັບສະພາວະ
ຂາດແຄນອາຫານຢ່າງໜັກ ແລະວ່າ ການຂາດໂພຊະການຫລືບໍ່ໄດ້ຮັບອາຫານການກິນ
ຢ່າງພຽງພໍນັ້ນ ແມ່ນມີຢູ່ທົ່ວໄປໃນເກົາຫລີເໜືອ. ແຕ່ວ່າ ບັນດາອົງການຊ່ວຍເຫລືອຂອງ
ສະຫະປະຊາຊາດກໍຍັງບໍ່ໄດ້ລາຍງານໃຫ້ຊາບຢ່າງເປີດເຜີຍ ກ່ຽວກັບວ່າໄດ້ເກີດໂຣຄາພະ
ຍາດຫລືສະພາບການດ້ານສາທາລະນະສຸກ ທີ່ຜິດປົກກະຕິແນວໃດແດ່ ໃນລະດູໜາວປີນີ້.
ຫລັງຈາກການປະຕິບັດການທາງທະຫານຫລາຍບັ້ນຂອງເກົາຫລີເໜືອເມື່ອ ປີກາຍນີ້ ກຸງ
ໂຊລໄດ້ຕັດການຊ່ວຍເຫລືອດ້ານອາຫານເກືອບທັງໝົດ ນອກຈາກປະລິມານນ້ອຍໆນຶ່ງ
ສໍາລັບພວກເດັກແລະພວກຜູ້ໃຫຍ່ທີ່ມີສຸຂະພາບອ່ອນແອທີ່ສຸດ.
ສະພາ NGO ທີ່ເປັນຕົວແທນກຸ່ມການຊ່ວຍເຫລືອ 56 ກຸ່ມນັ້ນ ກ່າວວ່າ ຕົນຄາດຫວັງວ່າ ຈະໄດ້ຮັບການອະນຸຍາດຈາກລັດຖະບານເກົາຫລີໃຕ້ ໃນອາທິດໜ້ານີ້ ໃຫ້ໄປຮ່ວມກອງປະ ຊຸມໃນເດືອນນີ້ ທີ່ເກົາຫລີເໜືອນັ້ນ.
ເມື່ອເດືອນຜ່ານມານີ້ ພຽງຢາງໄດ້ຂໍຮ້ອງໄປຍັງສະພາ NGO ເພື່ອໃຫ້ຈັດ ການເຈລະຈາຫາລືກັນຂຶ້ນ ໃນຕົ້ນເດືອນກຸມພາ ກ່ຽວກັບການຮຶ້ພື້ນການຊ່ວຍເຫລືອຄືນອີກ. ນອກນີ້ແລ້ວ ພວກເຈົ້າໜ້າທີ່ໃນນະຄອນຫລວງພຽງຢາງຍັງຮັບປາກວ່າ ຈະອະນຸຍາດໃຫ້ກຸ່ມການຊ່ວຍເຫລືອຕ່າງໆຂອງເກົາຫລີໃຕ້ ເຂົ້າໄປກວດກາຢູ່ບ່ອນສູນກາງແຈກຢາຍອາຫານ ເພື່ອຮັບປະ ກັນຄວາມໂປ່ງໃສ.
ຊາວເກົາຫລີເໜືອ ໄປຮັບເອົາການ ຊ່ວຍເຫລືອ ດ້ານອາຫານ.
ທ່ານນາງ Lee Jong-joo ໂຄສົກກະຊວງ
ການທ້ອນໂຮມຊາດຂອງເກົາຫລີໃຕ້ ກ່າວວ່າ
ຈະຕ້ອງມີການຕົກລົງກັນເລື້ອງການກວດກາ
ເສຍກ່ອນ ກ່ອນທີ່ກຸງໂຊລຈະອະນຸຍາດໃຫ້ຮື້ ຟື້ນ ການຊ່ວຍເຫລືອຄືນໄດ້.
ທ່ານນາງລີກ່າວວ່າ ນອກນີ້ແລ້ວ ກຸງພຽງຢາງ
ຍັງຕ້ອງໄດ້ສະແດງທ່າທີ ທີ່ມີຄວາມຮັບຜິດ
ຊອບ ຕໍ່ພຶດຕິການລຸກລານຕ່າງໆຂອງຕົນເມື່ອ
ປີຜ່ານມານີ້ ແລະຮັບປາກວ່າຈະບໍ່ເຮັດແບບ
ນັ້ນອີກ. ຖ້າເກົາຫລີເໜືອປະຕິບັດເຊ່ນນັ້ນໄດ້
ການຊ່ວຍເຫລືອຈາກເກົາຫລີໃຕ້ ກໍອາດສາ
ມາດມີຄືນໄດ້ອີກ ໃນລະດັບທີ່ໄດ້ຈັດຕັ້ງປະຕິ
ບັດກັນກ່ອນວັນທີ່ 24 ເດືອນພຶດສະພາ
ຜ່ານມາ ເວລາການຄ້າແລະການຈັດສົ່ງ ການຊ່ວຍເຫລືອຕ່າງໆ ຖືກໂຈະໄວ້ນັ້ນ.
ທ່ານ Park ຜູ້ນໍາສະພາ NGO ກ່າວວ່າ ຄວາມເຕັມໃຈຂອງພຽງຢາງທີ່ ຈະອະນຸຍາດໃຫ້ມີການກວດກາສູນກາງແຈກຢາຍອາຫານແຫ່ງຕ່າງໆ ຊຶ່ງ ທີ່ບໍ່ເຄີຍມີມາກ່ອນນັ້ນ ແມ່ນຈະເປັນການສໍາຄັນ ສໍາລັບເຫດຜົນດ້ານອື່ນໆ ອີກຫລາຍໆຢ່າງ.
ທ່ານ Park ກ່າວວ່າ ມັນເປັນມາດຕະການສັນຍະລັກອັນນຶ່ງ ຊຶ່ງຜ່ານມາດຕະການອັນນີ້ ບັນດາກຸ່ມມະນຸດສະທໍາ ກໍຈະສາມາດສະແດງໃຫ້ປະຊາຊົນເກົາຫລີໃຕ້ ແລະປະຊາຄົມນານາຊາດທີ່ມີຂໍ້ຂ້ອງໃຈນັ້ນ ໄດ້ເຫັນວ່າ ການ ຊ່ວຍເຫລືອນັ້ນ ໄດ້ຖືກແຈກຢາຍໄປຮອດໄປເຖິງພວກທີ່ຕ້ອງການແທ້ໆ. ທ່ານ Park ກ່າວວ່າ ນອກນີ້ ການຮື້ຟື້ນການຊ່ວຍເຫລືອຄືນມາອີກນັ້ນ ອາດສາມາດຊ່ວຍໃຫ້ການເຈລະຈາລະຫວ່າງສອງເກົາຫລີ ເລີ່ມຕົ້ນຄືນອີກໄດ້.
ເກົາຫລີໃຕ້ ສະຫະລັດ ຍີ່ປຸ່ນ ແລະສະຫະພາບຢຸໂຣບ ເປັນຜູ້ໃຫ້ການຊ່ວຍເຫລືອແຖວໜ້າ ແກ່ເກົາຫລີເໜືອ ໃນສ່ວນໃຫຍ່ຂອງທ້າຍຊຸມປີ 1990 ແລະຕົ້ນໆທົດສະວັດທີ່ຜ່ານມານີ້. ແຕ່ການຊ່ວຍເຫລືອນັ້ນໄດ້ຕົກຕໍ່າລົງຢ່າງຫລວງຫລາຍ ຫລັງຈາກທີ່ພວກເຂົາເຈົ້າໄດ້ຄົ້ນພົບວ່າ ພຽງຢາງກໍາລັງ ດໍາເນີນໂຄງການສ້າງອາວຸດນີວເຄລຍຢ່າງລັບໆນັ້ນ.
ເປັນທີ່ຮູ້ກັນຢູ່ແລ້ວວ່າ ປະຊາຄົມນານາຊາດໄດ້ນໍາໃຊ້ການລົງໂທດຫລາຍໆບັ້ນຕໍ່ເກົາຫລີເໜືອ ກ່ຽວກັບໂຄງການນີວເຄລຍ ການທົດລອງລູກສອນໄຟ ການຄ້າຂາຍອາວຸດ ແລະກິດຈະກໍາທີ່ຜິດກົດໝາຍຕ່າງໆ ຂອງພຽງຢາງນັ້ນ ຊຶ່ງໄດ້ຍັງຜົນໃຫ້ເກົາຫລີເໜືອຕ້ອງຫັນໄປກາງຕໍ່ອາໃສຈີນ ເພື່ອຄວາມ ຢູ່ລອດທາງເສດຖະກິດຂອງຕົນ.
ເທົ່າເຖິງປັດຈຸບັນນີ້ ຍັງບໍ່ມີຄວາມສໍາພັນທາງການທູດໃດໆລະຫວ່າງສອງ ເກົາຫລີ ທີ່ໄດ້ສູ້ລົບກັນໃນສົງຄາມກາງເມືອງບັ້ນນຶ່ງໃນຕົ້ນຊຸມປີ 1950. ການສູ້ລົບກັນຄັ້ງນັ້ນໄດ້ຍຸຕິລົງດ້ວຍການຍຸດຍິງ ໂດຍທີ່ທັງສອງຝ່າຍບໍ່ເຄີຍໄດ້ເຊັນສັນຍາສະຫງົບເສິກ ຫລືສົນທິສັນຍາສັນຕິ ພາບກັນເລີຍ.