ເກົາຫລີເໜືອ ປະກົດວ່າ ໄດ້ມີຄວາມສະຫງົບງຽບໃນວັນພຸດມື້ນີ້ ໃນຂະນະທີ່ ທົ່ວທັງປະ
ເທດໄວ້ອາໄລນໍາການມໍລະນະກໍາຂອງທ່ານກິມຈົງອິລ ແລະສືບຕໍ່ທໍາການໂອນອໍານາດໃນ
ການນໍາພາປະເທດໄປໃຫ້ ທ່ານ Kim Jong Un, ລູກຊາຍຂອງທ່ານ ກິມ ຈົງອິລນັ້ນ.
ອົງການຂ່າວຂອງທາງການເກົາຫລີເໜືອເວົ້າວ່າ ປະຊາຊົນເປັນລ້ານໆຄົນ ໄດ້ພາກັນໄປ
ສະແດງຄວາມເຄົາລົບ ຢູ່ຕໍ່ໜ້າຮູບປັ້ນ ແລະຮູບຂອງມື້ລາງ “ຜູ້ນໍາທີ່ເຄົາລົບຮັກ" ຂອງ
ພວກເຂົາເຈົ້າ.
ສ່ວນຢູ່ກຸງປັກກິ່ງນັ້ນ, ພວກຜູ້ນໍາຈີນ, ລວມທັງທ່ານນາຍົກລັດຖະມົນຕີ Wen Jiabo
ໄດ້ໄປສະຖານທູດເກົາຫລີເໜືອປະຈໍານະຄອນຫລວງປັກກິ່ງ ໃນວັນພຸດມື້ນີ້ ເພື່ອສະແດງ
ຄວາມເສົ້າສະຫລົດໃຈນໍາຊາວເກົາຫລີເໜືອ.
ປະທານາທິບໍດີຈີນ ທ່ານ ຫູ ຈີນຕາວ ກໍໄດ້ໄປສະຖານທູດແຫ່ງນັ້ນເຊັ່ນດຽວກັນເມື່ອນຶ່ງມື້
ກ່ອນ ໃນສິ່ງທີ່ເບິ່ງກັນວ່າ ເປັນຄວາມພະຍາຍາມຂອງ ລັດຖະບານປັກກິ່ງ ເພື່ອໃຫ້ການ
ຄໍ້າປະກັນແກ່ລັດຖະບານພຽງຢາງວ່າ ເຂົາເຈົ້າຍັງຈະສືບຕໍ່ໃຫ້ໄດ້ຮັບການສະໜັບສະໜູນ ຈາກຈີນ.
ໃນການໃຫ້ຄໍາສະໜັບສະໜູນອັນນຶ່ງອີກ ໃນວັນອັງຄານວານນີ້ ໂຄສົກປະຈໍາກະຊວງການ
ຕ່າງປະເທດຈີນ ທ່ານ Liu Weimin ກ່າວວ່າ ລັດຖະ ບານປັກກິ່ງຫວັງວ່າ ປະຊາຊົນ
ເກົາຫລີເໜືອຈະພາກັນພ້ອມໝົກພ້ອມໃຈ ສະໜັບສະໜູນຜູ້ນໍາໃໝ່ຂອງພວກເຂົາເຈົ້າ.
ໃນຂະນະດຽວກັນ ຢູ່ຕາມຊາຍແດນຂອງເກົາຫລີ ທີ່ມີທະຫານປະຈໍາຢູ່ຢ່າງແໜ້ນໜານັ້ນ
ພວກນັກເຄື່ອນໄຫວຊາວເກົາຫລີໃຕ້ ແລະພວກທີ່ໂຕນໜີຈາກເກົາຫລີເໜືອ ໄດ້ພາກັນປ່ອຍ ໝາກປຸມເປົ້າ ທີ່ນໍາເອົາໃບປີວ
ໂຄສະນາຊວນເຊື່ອຫລາຍສິບພັນແຜ່ນເຂົ້າໄປໃນເກົາຫຼີເໜືອ ເພື່ອຕໍ່ຕ້ານການສືບທອດ
ອໍານາດຕາມສາຍເລືອດໃນເກົາຫລີເໜືອ.
ທ່ານ Park Sang-Hak ທີ່ເປັນຄົນໂຕນໜີຈາກເກົາຫລີເໜືອນັ້ນເວົ້າວ່າ ຊາວເກົາຫລີ
ເໜືອຄວນຈະພະຍາຍາມ ແລະຫາທາງປົດປ່ອຍຕົນເອງໃນຊ່ວງໄລຍະເວລາທີ່ມີການ ໂອນອໍານາດນີ້.
ໃບປີວຈໍານວນນຶ່ງ ມີຮູບຂອງທ່ານກິມຢູ່ຄຽງຂ້າງກັບຮູບຂອງອະດີດຈອມຜະເດັດການ ທ່ານ Hosni Mubarak ແລະທ່ານ Moammar Gadhafi.
ສື່ມວນຊົນຂອງທາງການເກົາຫລີເໜືອ ໄດ້ຮຽກຮ້ອງໃຫ້ປະຊາຊົນສາມັກຄີ ກັນໃຫ້ການສະໜັບ ສະໜູນຕໍ່ທ່ານ Kim Jong Un, ເຊິ່ງໄດ້ເອີ່ຍເຖິງຜູ້ນໍາທີ່ໜຸ່ມນ້ອຍນັ້ນວ່າ “ເປັນຜູ້ສືບທອດອຳນາດທີ່ຍິ່ງໃຫຍ່” ແລະ “ເປັນເສົາຄໍ້າຂອງປະຊາຊົນ.”