ໜັງສືພິມຂອງເກົາຫຼີໃຕ້ສະບັບນຶ່ງລາຍງານວ່າ ເກົາຫຼີເໜືອ ໄດ້ປ່ຽນຊື່ຂອງບໍລິສັດຕ່າງໆແລະປອມແປງເອກກະສານໃນ ການສົ່ງອອກສິນຄ້າ ເພື່ອຫຼີກລ່ຽງ ການລົງໂທດຂອງນາໆ ຊາດ.
ໜັງສືພິມ Dong-A Ilbo ໄດ້ອ້າງຄຳເວົ້າຂອງເຈົ້າໜ້າທີ່ ສືບລັບ ທີ່ຂໍສະຫງວນຊື່ຄົນນຶ່ງ ທີ່ກ່າວວ່າ ຂໍ້ມູນສືບລັບ ຂອງເກົາຫຼີໃຕ້ ແລະສະຫະລັດ ສະແດງໃຫ້ເຫັນວ່າ ບໍລິ ສັດຂອງເກົາຫຼີເໜືອ 2 ບໍລິສັດ ໄດ້ປ່ຽນຊື່ຂອງຕົນ.
ບໍລິສັດການຄ້າພັດທະນາບໍ່ແຮ່ເກົາຫຼີ ແລະບໍລິສັດການຄ້າ Tangun ເກົາຫຼີ ຕ່າງກໍມີຊື່ ໃນບັນຊີລົງໂທດຂອງອົງການສະຫະປະຊາຊາດ ທີ່ໄດ້ປະກາດອອກມາ ຫຼັງຈາກພຽງຢາງ ໄດ້ທຳການທົດລອງອາວຸດນິວເຄລຍ ໃນປີກາຍ.
ໜັງສືພິມເກົາຫຼີໃຕ້ ສະບັບນີ້ເວົ້າວ່າ ເປັນທີ່ປາກົດວ່າ ເກົາຫຼີເໜືອ ໄດ້ໃຊ້ໃບແຈ້ງລາຍການ ສິນຄ້າປອມ ເພື່ອສົ່ງອອກອາວຸດ ຜ່ານທາງປະເທດຈີນ ແລະວ່າ ໃບແຈ້ງລາຍການສິນຄ້າ ທີ່ວ່ານີ້ ແຈ້ງພວກຜະລິດຕະພັນ ທາງທະຫານວ່າ ເປັນສິນຄ້າ ພົນລະເຮືອນ ແຈ້ງລະເບີດ ຕໍປີໂດວ່າ ເປັນອຸບປະກອນ ສຳລັບເຮັດກັບປາ ແລະລູກຈະຫຼວດວ່າ ເປັນອຸບປະກອນເຈາະ ນໍ້າມັນ.
ໜັງສືພິມ Dong-A Ilbo ເວົ້າວ່າ ເກົາຫຼີໃຕ້ແລະສະຫະລັດ ໄດ້ປະສົບກັບບັນຫາຍຸ່ງຍາກ ໃນການຄົ້ນພົບ ການປອມແປງເຫຼົ່ານີ້ຍ້ອນເກົາຫຼີເໜືອ ໄດ້ຊອກຄົ້ນຫາວິທີການໃໝ່ເລື້ອຍໆ ເພື່ອຫຼີກລ່ຽງ ຕໍ່ການລົງໂທດ ຂອງສະຫະປະຊາຊາດ.