ກອງທັບຢູເຄຣນ ກ່າວວ່າ ຕົນຢຶດໄດ້ພື້ນທີ່ຕື່ມອີກ ໃນວັນ
ຈັນວານນີ້ ຈາກພວກກະບົດນິຍົມຣັດເຊຍ ໃກ້ກັບບໍລິເວນ
ທີ່ເຮືອບິນມາເລເຊຍຖືກຍິງຕົກນັ້ນ ແລະກ່າວຕື່ມວ່າ ຂໍ້ມູນ
ການບິນສະແດງໃຫ້ເຫັນວ່າເຮືອບິນ ລຳດັ່ງກ່າວ ຖືກຍິງຕົກ
ດ້ວຍສະເກັດລູກສອນໄຟ.
ໂຄສົກກອງທັບ ທ່ານ Andriy Lysenko ໄດ້ຖະແຫລງໃນ
ວັນຈັນວານນີ້ ຢູ່ນະຄອນຫລວງ Kyiv ໃນຂະນະທີ່ກອງກຳລັງ
ຮັກສາຄວາມປອດໄພ ສືບຕໍ່ທຳການບຸກໂຈມຕີ ຕໍ່ຕ້ານພວກ
ແບ່ງແຍກດິນແດນນິຍົມຣັດເຊຍ ທີ່ຕິດອາວຸດໜັກ ໃກ້ຊາຍ
ແດນຕິດກັບຣັດເຊຍນັ້ນ. ທ່ານ Lysenko ຍັງໄດ້ກ່າວຫາ
ພວກແບ່ງແຍກດິນແດນອີກວ່າ ໄດ້ຍິງປືນຄົກ ແລະປືນໃຫຍ່ເຂົ້າໄປໃສ່ບໍລິເວນເຮືອບິນ
ຕົກ ເພື່ອທຳລາຍຫຼັກຖານ ຂອງການກ່ຽວຂ້ອງຂອງພວກເຂົາ ໃນການຍິງຕົກເຮືອບິນ
ມາເລເຊຍຕົກ ເມື່ອວັນທີ 17 ກໍລະກົດ ທີ່ໄດ້ເຮັດໃຫ້ ລູກເຮືອກັບຜູ້ໂດຍສານທັງໝົດ
298 ຄົນເສຍຊີວິດ.
ການຕໍ່ສູ້ກັນໃນວັນຈັນວານນີ້ ໃກ້ກັບບໍລິເວນເຮືອບິນຕົກ ໄດ້ບັງຄັບໃຫ້ທີມນັກສືບສວນ
ສອບສວນສາກົນ ຕ້ອງປະລະແຜນການ ທີ່ຈະເຂົ້າໄປຍັງບໍລິເວນນັ້ນ ເປັນມື້ທີສອງລຽນຕິດ.
ນັກສືບສວນສອບສວນຂອງອັງກິດ ທີ່ວິເຄາະຂໍ້ມູນການບິນ ໃນເຄື່ອງບັນທຶກຂໍ້ມູນ ຫຼື
black box ບໍ່ໄດ້ໃຫ້ຄຳເຫັນ ຕໍ່ການອ້າງເຖິງສະເກັດ ລູກສອນໄຟ ຂອງທ່ານ Lysenko
ແລະເຈົ້າໜ້າທີ່ ສືບສວນສອບສວນ ຂອງເນເທີແລນ ທີ່ເປັນແກ່ນນຳໃນການສອບສວນນີ້
ກໍປະຕິເສດທີ່ຈະຢັ້ງຢືນຄຳກ່າວອ້າງນັ້ນ.
Your browser doesn’t support HTML5
UN Commissioner: MH17 Downing Could Be A War Crime
ກ່ອນໜ້ານັ້ນໃນວັນຈັນວານນີ້ ຂ້າຫລວງໃຫຍ່ສະຫະປະຊາຊາດຝ່າຍສິດທິມະນຸດ ທ່ານນາງ Navi Pillay ໄດ້ກ່າວວ່າການຍິງ ຖ້ຽວບິນ 17 ຂອງສາຍການບິນມາເລເຊຍ ຕົກນັ້ນ ແມ່ນເປັນການລະເມີດຕໍ່ກົດ ໝາຍສາກົນ ຊຶ່ງ “ອາດຈະຮ້າຍແຮງເທົ່າກັບ ການກໍ່ອາຊະຍາກຳ ສົງຄາມ.”
ທ່ານນາງ Pillay ຮຽກຮ້ອງໃຫ້ມີການ “ສືບສວນ ສອບສວນໂດຍທັນທີ ຢ່າງລະອຽດ
ມີປະສິດທິພາບ ເປັນອິດສະລະ ແລະ ບໍ່ເຂົ້າຂ້າງອອກຂາ” ກ່ຽວກັບເຫດການ
ດັ່ງກ່າວ. ການຮຽກຮ້ອງຂອງທ່ານນາງມີຂຶ້ນພຽງ 2-3 ມື້ ຫຼັງຈາກບັນດານັກວິເຄາະຂໍ້ມູນ
ລັບຂອງສະຫະລັດ ໄດ້ສະຫລູບວ່າ ລູກສອນໄຟຂອງຣັດເຊຍ ລຸ້ນ SA-11 ຫຼື “Buk”
ໄດ້ຍິງ ຖ້ຽວບິນທີ່ໄປຍັງມາເລເຊຍ ຕົກ ແລະ ພວກກະບົດທີ່ໄດ້ຖືກອົບຮົມແບບຜິດພາດ
ອາດຈະເປັນຜູ້ຍິງລູກສອນໄຟລູກນັ້ນ ໂດຍເຊື່ອວ່າແມ່ນເຮືອບິນຂອງຢູເຄຣນ.