ບັນດາເຈົ້າໜ້າທີ່ ໃນພາກຕາເວັນອອກສຽງເໜືອຂອງໄນຈີເຣຍ
ກ່າວວ່າ ໄດ້ເກີດເຫດລະເບີດຢູ່ໂຮງແຮມນ້ອຍຫຼັງນຶ່ງ ເຮັດໃຫ້
ມີຜູ້ເສຍຊີວິດໄປ 10 ຄົນ ແລະບາດເຈັບ 14 ຄົນ.
ເວລານີ້ ຍັງບໍ່ມີກຸ່ມໃດອ້າງເອົາຄວາມຜິດຊອບ ໃນການວາງ
ລະເບີດໂຈມຕີດັ່ງກ່າວ ເມື່ອແລງວັນສຸກຜ່ານມາ ໃນເຂດຊານ
ເມືອງ Bauchi ນັ້ນ.
ອົງການຂ່າວຝຣັ່ງ ກ່າວວ່າ ໂຮງແຮມແຫ່ງນີ້ “ເປັນທີ່ຮູ້ຈັກກັນຢ່າງ ກວ້າງຂວາງວ່າ
ເປັນຊ່ອງໂສເພນີ” ຊຶ່ງເຮັດໃຫ້ສະຖານທີ່ດັ່ງກ່າວຕົກເປັນເປົ້າໄດ້ງ່າຍໆ ຂອງພວກ
ຫົວຮຸນແຮງອິສລາມ Boko Haram ທີ່ເພ່ງເລັງການກໍ່ຄວາມຮຸນແຮງຂອງພວກເຂົາ
ໃສ່ສະຖານທີ່ຕ່າງໆ ທີ່ພວກເຂົາຖືວ່າເປັນບາບທີ່ໜັກໜາ ແລະຊົ່ວຮ້າຍ ຊຶ່ງຮວມທັງ
ພວກບາກິນເຫຼົ້າ ໂບດ ແລະພວກໂຮງຮຽນຕ່າງໆທີ່ສອນຫຼັກສູດການຮຽນຂອງຝ່າຍ
ຕາເວັນຕົກນັ້ນ.
ພວກຫົວຮຸນແຮງ ໄດ້ຮັບຄວາມສົນໃຈຈາກນາໆຊາດ ທີ່ບໍ່ເຄີຍມີມາກ່ອນ ໃນຫວ່າງບໍ່
ເທົ່າໃດເດືອນຜ່ານມານີ້ ລຸນຫຼັງການລັກພາໂຕພວກເດັກນັກຮຽນຍິງໄວລຸ່ນ ຈຳນວນ
ຫຼາຍກວ່າ 200 ຄົນ ຈາກເມືອງ Chibok ນັ້ນ.
ການລັກພາໂຕໝູ່ເດັກນັກຮຽນດັ່ງກ່າວ ໄດ້ຮັບການປະນາມຈາກລັດຖະບານປະເທດ
ຕ່າງໆ ແລະຈາກປະຊາຊົນຜູ້ທີ່ມີຊື່ສຽງຈາກທົ່ວໂລກ ແລະມີການສະເໜີໃຫ້ການຊ່ອຍເຫຼືອທາງທະຫານຈາກພວກປະເທດມະຫາອຳນາດໃຫຍ່ໆ ເພື່ອສົ່ງເສີມຄວາມພະຍາ
ຍາມຂອງໄນຈີເຣຍ ໃນການຕອບໂຕ້ຕໍ່ພວກກໍ່ກະບົດນັ້ນ.
ວີດີໂອ: ນັກວິເຄາະວ່າ ການຊັກຊ້າໃນການ ຕອບໂຕ້ຂອງນາໆຊາດ ເຮັດໃຫ້ Boko Haram ໄດ້ໃຈ ແລະຫຶກເຫີມຂຶ້ນ:
Your browser doesn’t support HTML5