ຜູຸ້ທີ່ຖືກກ່າວຫາວ່າ ເປັນຜູຸ້ກໍ່ການຮ້າຍ ທີ່ຖືກຈັບໃນປີກາຍ ຢູ່ລັດນິວຢອກ ໄດ້ສາລະພາບ ວ່າ ລາວໄດ້ວາງແຜນທີ່ຈະສັງຫານຊາວອາເມຣິກັນໃນຄ່ຳຄືນຂອງການສະເຫຼີມສະຫຼອງ ຕ້ອນຮັບວັນຂຶ້ນປີໃໝ່ ທີ່ຫາກໍຜ່ານມານີ້ ດ້ວຍມີດແລະມີດໃຫຍ່ ໃນການໂຈມຕີທີ່ມີການປະສານງານກັນກັບກຸ່ມລັດອິສລາມ.
ທ້າວ Emanuel Lutchman ໄດ້ຍອມຮັບຜິດ ໃນວັນພະຫັດວານນີ້ ທີ່ສານລັດຖະບານກາງຢູ່ເມືອງ Rochester ໃນລັດນິວຢອກ ແລະສາລະພາບວ່າ ຜູ້ກ່ຽວມີສ່ວນພົວພັນໃນການວາງແຜນຂອງກຸ່ມລັດອິສລາມທີ່ຍັງບໍ່ທັນເລີ້ມຂຶ້ນເທື່ອ ອີງຕາມກະຊວງຍຸຕິທຳສະຫະລັດ.
ທ້າວ Lutchman ຄິດວ່າ ລາວໄດ້ເກັບເກນເອົາ 3 ຄົນທີ່ມີຄວາມເຫລື້ອໃສນຳນະໂຍບາຍຂອງກຸ່ມລັດອິສລາມ ເຂົ້າຮ່ວມສົມທົບໃນແຜນການໂຈມຕີແລະກໍໄດ້ຊື້ອາວຸດແລະອຸບປະ ກອນອື່ນໆ ເພື່ອກະກຽມ ການໂຈມຕີດັ່ງກ່າວ. ແຕ່ແນວໃດກໍຕາມ ຜູ້ສົມຄົບທັງສາມຄົນນັ້ນ ໄດ້ໃຫ້ການຮ່ວມມື ກັບອົງການສັນຕິບານກາງ ຫລື FBI ຂອງສະຫະລັດ ແລະຂໍ້ມູນຂອງພວກເຂົາເຈົ້າ ໄດ້ນຳພາໄປສູ່ການຈັບກຸມທ້າວ Lutchman ອາຍຸ 26 ປີ ເມື່ອວັນທີ 30 ທັນວາ ບໍ່ເທົ່າໃດຊົ່ວໂມງກ່ອນ ທີ່ແຜນການໂຈມຕີຢູ່ບາແຫ່ງນຶ່ງ ເພື່ອຈັບໂຕປະກັນແລະສັງຫານພວກເຂົາເຈົ້າ ຈະເລີ້ມຂຶ້ນ.
ຂໍ້ຫາທີ່ສະເພາະເຈາະຈົງທີ່ທ້າວ Lutchman ໄດ້ຍອມຮັບຜິດນັ້ນ ກໍແມ່ນສົມຮູ້ຮ່ວມຄິດເພື່ອສະໜອງການສະໜັບສະໜຸນທາງດ້ານວັດຖຸໃຫ້ແກ່ກຸ່ມກໍ່ການຮ້າຍ ນອກກົດໝາຍ ຊຶ່ງມີຄວາມຜິດຕິດຄຸກເຖິງ 20 ປີ ພ້ອມທັງຖືກຕິດຕາມສິ້ງຊອມ ຕະຫຼອດຊີວິດໂດຍເຈົ້າ ໜ້າທີ່ສະຫະລັດແລະປັບໃໝ 250,000 ໂດລາ. ເປັນທີ່ຄາດກັນວ່າ ການຕັດສິນລົງໂທດຈະມີຂຶ້ນຕາມພາຍຫລັງ.