ຄໍ່າຄືນວັນທີ່ 30 ເດືອນທັນວາ ສອງວັນກ່ອນເຖິງວັນປີໃໝ່ 2011 ນີ້ ທາງລາຍການ
ຊີວິດຊາວລາວໃນຕ່າງແດນຂອງ VOA ຂໍສົ່ງຄວາມສຸກໃຫ້ທ່ານຜູ້ຟັງທັງຫຼາຍ
ໂດຍການນໍາເອົາພອນຕ່າງໆຂອງຊາວລາວຢູ່ໃນທົ່ວໂລກ ເພື່ອອວຍພອນແລະມອບ
ຄວາມສຸກໃຫ້ແກ່ທຸກໆທ່ານທີຕິດຕາມຮັບຟັງວິທະຍຸ VOA ແລະວ່າ ຈະມີຜູ້ໃດແດ່ນັ້ນ
ຂໍເຊີນເຂົ້າສູ່ລາຍການແລະພົບກັບວັນນະສອນໄດ້ໃນອັນດັບຕໍ່ໄປ.
ຂໍກ່າວຄໍາວ່າ “ສະບາຍປີໃໝ່” ລ່ວງໜ້າ ເພາະວ່າຍັງເຫຼືອ
ພຽງແຕ່ສອງວັນເທົ່ານັ້ນກໍຈະເຖິງປີໃໝ່ 2011 ແລ້ວ
ແລະເນື່ອງໃນວາຣະດິຖີວັນດີຂຶ້ນປີໃໝ່ສາກົນນີ້
ວັນນະສອນໄດ້ນໍາເອົາຄໍາອວຍພອນຂອງບຸກຄົນສໍາຄັນ
ໃນວົງການສື່ແລະການບັນເທີງຂອງຊາວລາວໃນທົ່ວທຸກມຸມ
ໂລກມາຝາກທ່ານຜູ້ຟັງ.
ຂໍເຣີ່ມຕົ້ນດ້ວຍພອນປີໃໝ່ຂອງອະດີດຫົວໜ້າ ວິທະຍຸ VOA ພະແນກພາສາລາວ
ທ່ານລິນທອງ ນ້ອຍນາລາ ຕິດຕາມມາດ້ວຍອະດີດສະມາຊິກຂອງ VOA ອີກທ່ານນຶ່ງ
ທ່ານວໍຣະເດດ ດິດທະວົງ ພ້ອມທັງທ່ານອາຈານ ສໍ. ແສງສິຣິວັນ ສ່ວນວ່າຈະມີ
ນັກຮ້ອງ, ນັກສິນລະປິນທ່ານໃດແດ່ທີ່ໄດ້ສົ່ງຄວາມສຸກເປັນຄໍາອວຍພອນຜ່ານທາງ
VOA ມາໃຫ້ທ່ານຜູ້ຟັງນັ້ນ ຂໍເຊີນທ່ານຮັບຟັງຈາກບົດສໍາພາດໄດ້ເລີຍ.
ພ້ອມດຽວກັນນີ້ ວັນນະສອນພ້ອມດ້ວຄະນະ VOA ທຸກໆທ່ານ ຂໍຖືໂອກາດນີ້ ມອບ
ຄວາມສຸກ ມອບຄືນໃຫ້ທ່ານຜູ້ຟັງໂດຍການ ທີ່ຈະຕັ້ງໃຈສືບສານ ດໍາເນີນລາຍການ
ວິທະຍຸ VOA ໃຫ້ເປັນທີ່ຊື່ນຊອບ ທີ່ມີທັງສາຣະແລະໃຫ້ຄວາມບັນເທີງ ແລະໃຫ້ຂໍ້ມູນ
ທີ່ແມ່ນຍໍ່າ ແລະເຊື່ອຖືໄດ້ ພວກເຮົາຈະຂໍຢູ່ຄູ່ກັບທ່ານຜູ້ຟັງຕະລອດການແລະຕະລອດໄປ
ສະບາຍດີປີໃໝ່ 2011
ຈາກໃຈຈິງ ຄະນະ VOA ທຸກໆຄົນ