ໄດ້ມີຄວາມຫວັງໃໝ່ຂຶ້ນມາ ສຳຫລັບພວກທີ່ເປັນໄຂ້ເລືອດອອກ
ທີ່ເກີດຈາກເຊື້ອໄວຣັສ ທີ່ພາໃຫ້ໃຫ້ເຈັບຫົວຢູ່ບໍ່ເຊົາ ມີໄຂ້ສູງ
ແລະເຈັບປວດຕົນໂຕ. ຜູ້ສື່ຂ່າວວີໂອເອ Carol Pearson ມີ
ລາຍງານກ່ຽວກັບຢາວັກຊີນຫລືຢາປ້ອງກັນເຊື້ອໂຣກ ຊະນິດ
ໃໝ່ທີ່ອາດເປັນໄປໄດ້ອິງຕາມ ລາຍງານຢູ່ໃນວາລະສານ
The Lancet ສະບັບອອກເມື່ອວັນທີ 10 ເດືອນກໍລະກົດນີ້
ແລະກ່ຽວກັບວິທີການໃໝ່ແນວອື່ນໆອີກ ເພື່ອຍັບຍັ້ງເຊື້ອໄວຣັສ
ທີ່ບາງຄັ້ງຮ້າຍແຮງເຖິງຕາຍ ຂອງໄຂ້ເລືອດອອກນັ້ນ.
ໄຊຈະເລີນສຸກ ມີລາຍລະອຽດມາສະເໜີທ່ານ.
Your browser doesn’t support HTML5
ຟັງລາຍງານ ອາດມີຢາວັກຊີນໃໝ່ ທີ່ສາມາດຄວບຄຸມ ໄຂ້ເລືອດອອກໄດ້ ໃນໄວໆນີ້.
ວີດີໂອ ພາສາລາວ ກ່ຽວກັບລາຍງານນີ້:
Your browser doesn’t support HTML5
ວີດີໂອ ພາສາລາວ: ອາດມີຢາວັກຊີນໃໝ່ ທີ່ສາມາດຄວບຄຸມ ໄຂ້ເລືອດອອກໄດ້ ໃນໄວໆນີ້
ຜູ້ທີ່ເປັນໄຂ້ເລືອດອອກ ມັກຈະມີໄຂ້ສູງ ແລະເຈັບປວດຢ່າງຮຸນແຮງ ຈົນຮູ້ສຶກຄືກັນກັບ
ວ່າກະດູກຈະຫັກພຸ້ນແຫລະ ອາດສາມາດເປັນໄຂ້ນີ້ໄດ້ ຢູ່ຫລາຍເດືອນກ່ວາຈະເຊົາ ແລະ
ອາດຈະຕ້ອງໄດ້ນອນໂຮງໝໍ. ໄຂ້ເລືອດອອກເອົາຊີວິດຄົນໄປ 22,000 ຄົນໃນແຕ່ລະປີ
ຊຶ່ງສ່ວນ ໃຫຍ່ເປັນເດັກນ້ອຍ ອິງຕາມອົງການອະນາໄມໂລກ ຫລື WHO.
ອົງການອະນາໄມໂລກເວົ້າວ່າ ເຊື້ອໄວຣັສຂອງໄຂ້ເລືອດອອກທີ່ມາກັບໂຕຍຸງນັ້ນ ເວລານີ້ ແມ່ນມີແຜ່ຫລາຍກ່ວາເມື່ອ 50 ປີ ກ່ອນເຖິງ 30 ເທົ່າໂຕ ແລະມີຢູ່ທົ່ວໄປໃນຫລາຍໆເຂດ
ຂອງເອເຊຍ ເຂດມະຫາສະມຸດປາຊີຟິກ ທະວີບອາເມຣິກາ ແລະອາຟຣິກາ. ຜ່ານມາ ແມ່ນ
ຍັງບໍ່ທັນມີຢາສະເພາະໃດໆ ທີ່ປົວໄຂ້ເລືອດອອກໄດ້ ແຕ່ມາບັດນີ້ ປະກົດວ່າມີຄວມຫວັງ
ຂຶ້ນມາແດ່ແລ້ວ.
ຢາວັກຊີນ ຫລືຢາປ້ອງກັນ ທີ່ໃຫ້ຄວາມຫວັງອັນນຶ່ງ ອາດສາມາດເປັນຕົວປ່ຽນເກມໄດ້
ຫລັງຈາກມີການທົດລອງໃຊ້ມາເປັນເວລາສອງປີ ຢູ່ໃນຫ້າປະເທດ ໃນເຂດເອເຊຍ.
ດອກ ເຕີ້ Maria Rosario Capeding ທີ່ຮ່ວມຢູ່ໃນຄະນະຄົ້ນຄ້ວາ ກ່າວວ່າ ຢາວັກຊີນ
ທີ່ທົດລອງໃຊ້ນີ້ໄດ້ຕັດຈຳນວນ ຄົນເປັນໄຂ້ເລືອດອອກ ລົງເຖິງເຄິ່ງນຶ່ງ ແລະໄດ້ຕັດຈຳ
ນວນກໍລະນີທີ່ຮ້າຍແຮງຈົນເຖິງຂັ້ນເລືອດອອກນັ້ນ ລົງຢ່າງຫລວງຫລາຍ.
ດອກເຕີ້ Capeding ເວົ້າວ່າ “ປະສິດທິພາບຂອງຢາວັກຊີນ ຕ້ານກໍລະນີໄຂ້ນີ້
ທີ່ເຖິງຂັ້ນຮ້າຍແຮງຈົນເລືອດອອກ ອິງຕາມເງື່ອນໄຂຂອງ WHO ນັ້ນ ແມ່ນ
88.5 ສ່ວນຮ້ອຍ ຫລັງຈາກທີ່ສັກຢາສາມຂະໜາດ.”
ການສຶກສາ ຄົ້ນຄ້ວາຂະໜາດໃຫຍ່ອີກອັນນຶ່ງ ກຳລັງມີຂຶ້ນຢູ່ໃນຂົງເຂດ ອາເມຣິກາລາຕິນ.
ຢາວັກຊີນທີ່ວ່ານີ້ ອາດສາມາດຜະລິດອອກມາຈຳໜ່າຍໄດ້ ພາຍໃນປີ 2015. ແລະໃນບໍ່
ຊ້ານີ້ ກໍອາດຈະມີວິທີອື່ນໆອີກ ຫລາຍວິທີ ເພື່ອຍັບຍັ້ງເຊື້ອໄວຣັສໄຂ້ເລືອດອອກນີ້.
ຢູ່ທີ່ສະຖາບັນ ຄົ້ນຄ້ວາ ມາລາເຣຍຫລືໄຂ້ຍຸງ John's Hopkins ສາສະດາຈານ George Demopoulos ໄດ້ຄົ້ນພົບ ວິທີນຶ່ງທີ່ສາມາດຂັດຂວາງ ແລະສະກັດກັ້ນ ເຊື້ອໄວຣັສໄຂ້
ເລືອດອອກ ຢູ່ໃນໂຕຍຸງທີ່ລ້ຽງຢູ່ ໃນຫ້ອງທົດລອງໄດ້. ທ່ານກ່າວວ່າ ບາດກ້າວຂັ້ນຕໍ່ໄປ
ກໍແມ່ນເຮັດແບບດຽວກັນກັບຍຸງປ່າ.
ສາສະດາຈານ Demopoulos ເວົ້າວ່າ “ ໄຂ້ເລືອດອອກ ກໍຄືກັບໄຂ້ຍຸງ ແມ່ນເປັນ
ພວກພະຍາດທີ່ສາມາດຄວບຄຸມໄດ້ ໂດຍຜ່ານການນຳໃຊ້ຫລາຍໆວິທີທາງນຳ
ກັນເທົ່ານັ້ນ. ມັນກໍຄືກັນກັບສົງຄາມ. ເຮົາບໍ່ສາມາດຈະເອົາຊະນະມັນໄດ້ ດ້ວຍ
ການໃຊ້ອາວຸດແຕ່ພຽງຊະນິດດຽວ. ເຮົາຕ້ອງການອາວຸດຫລາຍໆຊະນິດ ແລະ
ຍຸທະສາດຫລາຍໆຢ່າງເພື່ອຈະຕໍ່ສູ້ສົງຄາມໃຫ້ຊະນະ. ເຮົາກໍຕ້ອງໃຊ້ຫລັກການ
ແບບດຽວກັນນີ້ ແຫລະ ກັບພະຍາດເຫລົ່ານີ້.”
ຍຸງໂຕແມ່ນີ້ ເອີ້ນວ່າ Aedes aegypti ນຳມາຄົ້ນຄ້ວາ ໃນຫ້ອງທົດລອງ ຢູ່ .ທີ່ສະຖາບັນ ຄົ້ນຄ້ວາ ມາລາເຣຍຫລືໄຂ້ຍຸງ John's Hopkins.
ວິທີການອື່ນໆອີກ ກໍມີຮວມທັງ ການສີດຢາຂ້າຍຸງ ການສອນ
ປະຊາຊົນໃຫ້ຮູ້ຈັກວິທີກຳຈັດແຫລ່ງເພາະພັນເຊື້ອຍຸງ ເປັນຕົ້ນວ່າ
ອ່າງນ້ຳຫລື ນ້ຳທີ່ຖືກປະເຫລືອໄວ້ ຢູ່ໃນພາຊະນະໃກ້ໆເຮືອນ.
ອາກາດທີ່ຮ້ອນເອົ້າຂຶ້ນ ແລະພຶ້ນທີ່ທີ່ກາຍມາເປັນເມືອງ ກຳລັງ
ຊ່ວຍໃຫ້ການແຜ່ຜາຍຂອງໂຕຍຸງ ທີ່ນຳເຊື້ອໄວຣັສນັ້ນ ເພີ່ມທະວີ
ຫລາຍຂຶ້ນ.
ຢູ່ທີ່ອົງການອະນາໄມພາກພື້ນອາເມຣິກາ Pan American
Health Organization ຫລື PAHO ດອກເຕີ້ Luis
Castellanos ກ່າວວ່າ ອົງການຂອງທ່ານໄດ້ຊ່ວຍຫລຸດຜ່ອນ
ຈຳນວນຄົນຕາຍ ຍ້ອນເປັນໄຂ້ເລືອດອອກນັ້ນລົງ ຢູ່ໃນທະວີບ
ອາເມຣິກາ.
ດອກເຕີ້ Luis Castellanos ເວົ້າວ່າ “ອົງການ PAHO ໄດ້ເຮັດວຽກ ໃນຂັ້ນກ້ວາງ
ຂວາງ ກັບບັນດາປະເທດໃນຂົງເຂດອາເມຣິກາ ຕະຫລອດໄລຍະ 3-4 ປີຜ່ານມານີ້
ເພື່ອເຝິກແອບພວກນາຍແພດ ໃນທົ່ວປະເທດເຫລົ່ານັ້ນ ໃຫ້ຮູ້ຈັກ ແລະພ້ອມທີ່ຈະ
ຕັ້ງຂໍ້ສົງໄສ ຊີ້ບອກ ແລະວິນິດໄສ ຕະຫລອດທັງປິ່ນປົວຮັກສາ ຄົນເປັນໄຂ້ເລືອດ
ອອກໄດ້ ທຸກລາຍ.”
ອົງການອະນ າໄມໂລກ WHO ປະເມີນວ່າ ປະຊາກອນໂລກ ປະມານ 40 ສ່ວນຮ້ອຍ ຕົກຢູ່ໃນຄວາມສ່ຽງຕໍ່ການທີ່ຈະເປັນໄຂ້ເລືອດອອກ ແຕ່ວ່າ ປີໜ້າ ພາຍໃນເວລານີ້ ອາດຈະມີຫົນທາງຕໍ່ສູ້ກັບມັນໄດ້ແລ້ວ.
((http://www.who.int/csr/disease/dengue/impact/en/))