ເລຂາທິການໃຫຍ່ຄົນໃໝ່ຂອງອົງການສົນທິສັນຍາແອັດແລນຕິກເໜືອ ຫຼື ເນໂຕ້ ຢືນຢັນການສະໜັບສະໜູນຂອງກຸ່ມພັນທະມິດທາງທະຫານແຫ່ງນີ້ ຕໍ່ຢູເຄຣນ ລະຫວ່າງການຢ້ຽມຢາມນະຄອນຫຼວງກີຢິບ ໃນວັນພະຫັດວານນີ້
ທ່ານມາຣຄ໌ ຣຸທເທີ ເລຂາທິການໃໝ່ຂອງເນໂຕ້ ກ່າວດ້ວຍວ່າ ກຸ່ມພັນທະມິດນີ້ ຮັບຮູ້ເຖິງຄວາມຕ້ອງການອັນຮີບດ່ວນຂອງຢູເຄຣນ ໃນການຕໍ່ຕ້ານການຮຸກຮານຂອງຣັດເຊຍ ລະຫວ່າງການປຶກສາຫາລືກັບປະທານາທິບໍດີ ໂວໂລດີເມຍ ເຊເລນສກີ.
ທ່ານຣຸທ ເທີ ກ່າວຕໍ່ບັນດານັກຂ່າວ ວ່າ ການເດີນທາງມາຢ້ຽມຢາມນະຄອນຫຼວງກີຢິບ ຄັ້ງນີ້ ເປັນພາລະກິດທີ່ສຳຄັນ ໃນການ “ສະແດງຄວາມຊັດເຈນສຳລັບທຸກຄົນ ສຳລັບປະຊາຊົນຊາວຢູເຄຣນ ແລະສຳລັບທຸກຄົນທີ່ຈັບຕາເບິ່າວ່າ ເນໂຕ ຍັງຢືນຢັດຄຽງຂ້າງຢູເຄຣນຢູ່.”
ເລຂາທິການໃໝ່ຂອງເນໂຕ້ເປີດເຜີຍວ່າ ການປຶກສາຫາລືກັບ ທ່ານເຊເລນສກີ ເນັ້ນເລື້ອງການສະໜັບສະໜູນເປັນພິເສດ ສິ່ງທີ່ຢູເຄຣນ ຕອງການແລະຫາທາງທີ່ປະເທດພັນທະມິດເນໂຕ້ ຈະສາມາດທຳງານຮ່ວມກັນ ເພື່ອນຳສົ່ງທຸກຢ່າງໃຫ້ໄດ້ ແລະຍັງໄດ້ຢືນຢັນວ່າ “ເນໂຕ້ຢືນຄຽງຂ້າງຢູເຄຣນ ເພື່ອຄວາມໝັ້ນຄົງຂອງທ່ານ ແລະຂອງພວກເຮົາ.”
ໃນການພົບປະກັນຄັ້ງ ທ່ານເຊເລນສກີ ກ່າວວ່າ ໄດ້ຫາລື “ແຜນໄຊຊະນະ”ຂອງຕົນກັບທ່ານຣຸທເທີ ແລະໄດ້ຢ້ຳຄຳຮຽກຮ້ອງຕໍ່ພັນທະມິດທັງຫຼາຍຂອງຢູເຄຣນ ທີ່ສົ່ງອາວຸດຕ່າງໆ ມາສະໜັບສະໜູນໃຫ້ອະນຸຍາດກອງທັບກີຢິບ ໃຊ້ຢຸດໂທປະກອນເຫຼົ່ານັ້ນ ໃນການໂຈມຕີເລິກເຂົ້າໄປໃນດິນແດນຂອງລັດເຊຍເລີຍ.
ຂະນະດຽວກັນ ກອງທັບຢູເຄຣນ ແລະຣັດເຊຍ ລາຍງານໃນວັນພະຫັດວານນີ້ ວ່າ ຕ່າງກໍຍິງໂດຣນ ທີ່ອີກຝ່າຍສົ່ງມາໂຈມຕີໃນຊ່ວງຂ້າມຄືນ ຕົກເປັນຈຳນວນຫຼາຍ ແລະທັງສອງຝ່າຍກໍຍັງສືບຕໍ່ໂຈມຕີພື້ນທີ່ຫຼາຍຈຸດຂອງອີກຝ່າຍນຶ່ງໄປພ້ອມໆກັນດ້ວຍ.
ກອງທັລອາກາດຂອງຢູເຄຣນ ເປີດເຜີຍວ່າ ໄດ້ທຳລາຍໂດຣນຂອງຣັດເຊຍ ໄປແລ້ວ 78 ລຳຈາກທັງໝົດ 105 ລຳ ທີ່ຖືກສົ່ງເຂົ້າມານັ້ນ ໂດຍການສະກັດການໂຈມຕີດັ່ງກ່າວ ທີ່ເກີດຂຶ້ນໃນນ່ານຟ້າເໜືອເຊດປົກຄອງເຊີຄາຊີ ເຊີນິຮິຟ ດນິໂປເປຕຣັອຟສຄ໌ ອິວາໂນ-ແຟຣງຄິຟສກ໌ ຄາຣຄິຟ ເຄີສັນ ຄເມລນິຕສກີ ຄິໂຣໂວລາດ ກີຢິບ ໂອເດຊາ ໂພລຕາວາ ຣິຟເນ ຊູມີ ວິນນິຕເຊຍ ແລະຊີໂຕເມຍຣ໌.
ທ່ານ ເຊີຣເຮຍ ລີແຊກ ຜູ້ປົກຄອງດນິໂປເປຕຣັອຟສຄ໌ ເປີດເຜີຍວ່າ ໂດຣນທີ່ຖືສົ່ງເຂົ້າມາທີ່ເມືອງນິໂຄໂປລ ເຮັດໃຫ້ມີຜູ້ໄດ້ຮັບບາດເຈັບ 3 ຄົນ ແລະສ້າງຄວາມເສຍຫາຍໃຫ້ກັບເຮືອນ 1 ຫຼັງ ແລະທໍ່ສົ່ງແກ໊ສ ນຳດ້ວຍ.