ທ່ານ ເບັນຈາມິນ ເນຕັນຢາຮູ ຈະເດີນທາງມານະຄອນຫຼວງ ວໍຊິງຕັນ ໃນອາທິດນີ້ ໂດວຍມີແຜນຈະກ່າວຄຳປາໄສຕໍ່ລັດຖະສະພາ ແລະ ຈັດການປະຊຸມຢູ່ທຳນຽບຂາວ. ນາຍົກລັດຖະມົນຕີ ອິສຣາແອລ ແມ່ນກຳລັງມາທ່າມກາງຄວາມວຸ້ນວາຍທາງການເມືອງຂອງ ສະຫະລັດ ລຸນຫຼັງການຕັດສິນໃຈຖອນຕົວອອກຈາກການແຂ່ງຂັນປະທານາທິບໍດີ ຂອງທ່ານ ໂຈ ໄບເດັນ, ເຊິ່ງອາດເພີ່ມຄວາມບໍ່ແນ່ນອນອີກຊັ້ນນຶ່ງຕໍ່ສາຍພົວພັນລະຫວ່າງ ສະຫະລັດ ກັບ ອິສຣາແອລ ໃນຊ່ວງເວລາທີ່ສຳຄັນຂອງສົງຄາມກາຊາ. ນັກຂ່າວປະຈຳທຳນຽບຂາວຂອງວີໂອເອ ແພັດຊີ ວິດາຄຸສວາຣາ ມີລາຍງານ.
Your browser doesn’t support HTML5
ນາຍົກ ອິສຣາແອລ ຈະຢ້ຽມຢາມນະຄອນຫຼວງ ວໍຊິງຕັນ ທ່າມກາງຄວາມວຸ້ນວາຍທາງດ້ານການເມືອງຂອງ ອາເມຣິກາ
ການໂຈມຕີຫຼາຍຄັ້ງຂອງ ອິສຣາແອລ ໃນພາກຕາເວັນອອກຂອງເມືອງ ຄານ ຢູນິສ ໄດ້ສັງຫານຫຼາຍສິບຄົນໃນວັນຈັນວານນີ້. ອີກຫຼາຍຮ້ອຍຄົນໄດ້ພາກັນຫຼົບໜີຫຼັງຈາກມີຄຳສັ່ງອົບພະຍົບ. ນີ້ແມ່ນເຫດການທີ່ທ່ານ ເບັນຈາມິນ ເນຕັນຢາຮູ ໄດ້ຖິ້ມໄວເພື່ອເດີນທາງໄປຫາອີກສະໜາມລົບນຶ່ງ, ເຊິ່ງນີ້ແມ່ນທາງດ້ານການເມືອງ, ໃນຂະນະທີ່ການໂຄສະນາຫາສຽງປະທານາທິບໍດີ ສະຫະລັດ ມີການປ່ຽນແປລຸນຫຼັງການຕັດສິນໃຈຂອງປະທານາທິບໍດີ ໂຈ ໄບເດັນ ທີ່ຂະບໍ່ລົງແຂ່ງຂັນເອົາສະໄໝທີສອງ.
ທ່ານ ເບັນຈາມິນ ເນຕັນຢາຮູ ນາຍົກລັດຖະມົນຕີ ອິສຣາແອລ ກ່າວວ່າ “ຂ້າພະເຈົ້າຈະຂໍການສະໜັບສະໜູນຈາກສອງພັກການເມືອງທີ່ມີຄວາມສໍາຄັນຫຼາຍສຳລັບ ອິສຣາແອລ, ແລະ ຂ້າພະເຈົ້າຈະບອກໝູ່ເພື່ອນຂອງຂ້າພະເຈົ້າຈາກທັງ ສອງຝ່າຍຂອງສະພາວ່າ ບໍ່ວ່າປະຊາຊົນ ອາເມຣິກັນ ຈະເລືອກໃຜເປັນປະທາທິບໍດີຄົນຕໍ່ໄປກໍຕາມ, ອິສຣາແອລ ຍັງຄົງຈະເປັນພັນທະມິດທີ່ຂາດບໍ່ໄດ້ ແລະ ແຂງແກ່ນຂອງ ອາເມຣິກາ ໃນເຂດຕາເວັນອອກກາງ.”
ນັ້ນແມ່ນສິ່ງທີ່ຜູ້ນຳ ອິສຣາແອລ ໄດ້ກ່າວຢ່າງເປີດເຜີຍ.
ແຕ່ບັນດານັກວິເຄາະກ່າວວ່າ ໃນການແຂ່ງຂັນທີ່ອາດເປັນໄປໄດ້ສຳລັບທຳນຽບຂາວ ລະຫວ່າງຮອງປະທານາທິບໍດີ ຄາມາລາ ແຮຣິສ ແລະ ອະດີດປະທານາທິບໍດີ ດໍໂນລ ທຣຳ ນັ້ນ, ທ່ານ ເນຕັນຢາຮູ ຄົງຈະເລືອກພັກຣີພັບບລີກັນ.
ທ່ານ ໂຈນາທານ ຣາຍນໂຮລດ໌, ຈາກມະຫາວິທະຍາໄລ ບາ-ອີລານ ກ່າວວ່າ “ພັກຣີພັບບລີກັນ ແມ່ນສະໜັບສະໜູນແຜນການດ້ານຄວາມໝັ້ນຄົງຂອງ ອິສຣາແອລ ຫຼາຍກວ່າ. ນັ້ນຈະເປັນຄວາມຈິງ ທີ່ວ່າແມ່ນໃຜກໍຕາມທີ່ກຳອຳນາດໃນ ອິສຣາແອລ. ແຕ່ສິ່ງທີສອງກໍແມ່ນພວກເຂົາແມ່ນເຮັດວຽກນຳລັດຖະບານປີກຂວາຂອງ ອິສຣາແອລ ງ່າຍກວ່າ ແລະ ນະໂຍບາຍຂອງເຂົາເຈົ້າຕໍ່ ປາແລັສໄຕນ໌.”
ທ່ານ ເນຕັນຢາຮູ ມີລາຍງານວ່າໄດ້ຂໍພົບປະກັບອະດີດປະທານາທິບໍດີ ທຣຳ, ຜູ້ທີ່ໄດ້ເປີດນະໂຍບາຍສະໜັບສະໜູນ ອິສຣາແອລ ທີ່ສຳຄັນໃນລະຫວ່າງການດຳລົງຕຳແໜ່ງຂອງທ່ານ.
ທ່ານ ທຣຳ ໄດ້ໄກ່ເກ່ຍຂໍ້ຕົກລົງ ເອບຣາແຮມ ທີ່ເຮັດໃຫ້ສາຍພົວພັນທາງການທູດກັບ ສະຫະລັດ ອາຣັບ ເອມີເຣັສ ແລະ ບາເຣນ ຂອງອິສຣາແອລ ເປັນປົກກະຕິ.
ທ່ານໄດ້ຍ້າຍສະຖານທູດ ສະຫະລັດ ຈາກນະຄອນຫຼວງ ແທລ ອາວີຟ ໄປນະຄອນ ເຈຣູຊາແລັມ ທີ່ເປັນບັນຫາ, ແລະ ໄດ້ຮັບຮູ້ການຄອບຄອງພູ ໂກລານ ຂອງ ອິສຣາແອລ.
ທ່ານ ແອຣອນ ເດວິດ ມິລເລີ, ຈາກສູນບໍລິຈາກເພື່ອສັນຕິພາບສາກົນ ຄາເນກີ ກ່າວວ່າ “ດ້ວຍທ່ານນາງ ຄາມາລາ, ທ່ານຄົງຈະໄປຫາຄົນໃດຄົນນຶ່ງຜູ້ທີ່ຂ້ອນຂ້າງຈະສຳຄັນຫຼາຍ ເວລາເວົ້າເຖິງການສະໜັບສະໜູນສາຍພົວພັນລະຫວ່າງ ສະຫະລັດ ກັບ ອິສຣາແອລ, ແຕ່ຂ້າພະເຈົ້າຄິດວ່າຍາກກວ່ານັ້ນ, ແນ່ນອນຖ້າຈະເວົ້າແລ້ວ, ກ່ຽວກັບ ກິດຈະກຳການຕັ້ງຖິ່ນຖານໃໝ່ຂອງ ອິສຣາແອລ, ແລະ ຫຼາຍກວ່າ, ຫຼາຍກວ່າຄວາມເຫັນອົກເຫັນໃຈຕໍ່ຄວາມທຸກທໍລະມານຂອງຊາວ ປາແລັສໄຕນ໌ ແລະ ສິດທິຂອງຊາວປາແລັສໄຕນ໌.”
ໃນທີ່ສຸດ, ເປົ້າໝາຍຫຼັກຂອງທ່ານ ເນຕັນຢາຮູ ໃນນະຄອນຫຼວງ ວໍຊິງຕັນ ກໍແມ່ນເພື່ອກະກຽມຮາກຖານສຳລັບລັດຖະບານຕໍ່ໄປຂອງ ອາເມຣິກາ.
ແລະ ດ້ວຍລັດຖະບານ ເນັສເຊັດ ຂອງ ອິສຣາແອລ ໃກ້ຈະຮອດການພັກຜ່ອນເປັນເວລາສາມເດືອນນັ້ນ, ມັນຈະເປັນການພັດທະນາເປົ້າໝາຍຂອງທ່ານໃນພັນທະມິດທີ່ແຕກຫັກໄດ້ງ່າຍຂອງທ່ານ.
ທ່ານ ນິມຣອດ ໂກເຣັນ ຈາກສະຖາບັນຕາເວັນອອກກາງກ່າວວ່າ “ມັນອາດມີການກະເວລາທາງການເມືອງທີ່ຈະເຮັດໃຫ້ທ່ານ ເນຕັນຢາຮູ ທຳການເຄື່ອນໄຫວເວລາທີ່ລັດຖະບານ ເນັສເຊັດ ພັກຜ່ອນ, ໂດຍປາສະຈາກການນຳພາໄປສູ່ການແຕກຫັກໃນທັນທີຂອງພັນທະມິດ, ເພາະວ່ານັ້ນຈະບໍ່ສາມາດເຮັດໄດ້ຈົນກວ່າລັດຖະບານ ເນັສເຊັດ ຈະກັບມາປະຕິບັດການອີກ.”
ໃນລະຫວ່າງເວລານັ້ນ, ທ່ານ ເນຕັນຢາຮູ ອາດມີຄວາມເປັນໄປໄດ້ທີ່ຈະທຳການຂັດຂືນຝ່າຍຂວາຈັດຢູ່ໃນພັນທະມິດຂອງທ່ານ ແລະ ບັນລຸຂໍ້ຕົກລົງການຢຸດຍິງກັບກຸ່ມຮາມາສ ຫຼັງຈາກການເຮັດສົງຄາມເກືອບ 9 ເດືອນ.
ລັດຖະມົນຕີການຕ່າງປະເທດ ສະຫະລັດ ທ່ານ ແອນໂທນີ ບລິງເຄັນ ກ່າວໃນອາທິດທີ່ຜ່ານມາວ່າ ຂໍ້ຕົກລົງດັ່ງກ່າວແມ່ນໃກ້ຈະເກີດຂຶ້ນແລ້ວ.
ທ່ານ ແອນໂທນີ ບລິງເຄັນ ກ່າວວ່າ “ຂ້າພະເຈົ້າເຊື່ອວ່າພວກເຮົາຢູ່ໃນເສັ້ນສິບແມັດ ແລະ ກໍາລັງຂັບໄປສູ່ເສັ້ນປະຕູໃນການເຮັດຂໍ້ຕົກລົງທີ່ຈະກໍ່ໃຫ້ເກີດການຢຸດຍິງ, ນຳເອົາຕົວປະກັນກັບບ້ານ ແລະ ນຳເອົາພວກເຮົາໄປຢູ່ໃນເສັ້ນທາງທີ່ດີກວ່າເກົ່າເພື່ອພະຍາຍາມສ້າງສັນຕິພາບທີ່ຍືນຍົງ ແລະ ໝັ້ນຄົງ.”
ແນວໃດກໍຕາມ, ນັກວິເຄາະສ່ວນໃຫຍ່ແມ່ນມີຄວາມສົງໄສວ່າຂໍ້ຕົກລົງການຢຸດຍິງຈະຂະຫຍາຍອອກກາຍຂັ້ນຕອນທີນຶ່ງ, ເຊິ່ງແມ່ນການຢຸດຕໍ່ສູ້ 6 ອາທິດເພື່ອແລກປ່ຽນກັບຕົວປະກັນຈຳນວນນຶ່ງທີ່ຖືກຈັບໂດຍກຸ່ມຮາມາສ.