Your browser doesn’t support HTML5
ຟັງລາຍການສຽງເພງຈາກແດນໄກ: ລົມໜາວ - ຄູນ ສັກດາ
ສະບາຍດີທຸກໆທ່ານ ວັນນະສອນ ຫວັງຢ່າງຍິ່ງວ່າທຸກໆທ່ານສຸກສະບາຍດີ ຂໍເລີ້ມດ້ວຍ
ຂໍ້ຄວາມທາງອີແມລຂອງທ່ານ ເກົ້າປູ ພວງປະເສີດ ອະດີດຄູລາວ ສູນບ້ານແກ ທີ່ຂຽນເຂົ້າ
ມາວ່າ ຢາກຊາບເຖິງການອອກອາກາດ ຂອງ VOA ຊຶ່ງທາງເຮົາອອກອາກາດ ທຸກໆວັນ ໃນເວລາ 7:30 ຕອນແລງ ຕາມເວລາໃນທ້ອງຖິ່ນ ຖ້າທ່ານບໍ່ມີໂອກາດໄດ້ຮັບຟັງສົດໆ ກໍສາມາດຕິດຕາມລາຍການຂອງເຮົາໄດ້ທາງອິນເຕິແນ໊ຕທີ່ lao.voanews.com ໄດ້ຕະຫຼອດເວລາໄດ້ເລີຍ ທ່ານເກົ້າປູ ຂໍຟັງເພງໜາວລົມ ແຕ່ກໍບໍ່ໄດ້ລະບຸວ່າເປັນຜົນງານ
ຂອງສິນລະປິນທ່ານໃດ ຊຶ່ງວັນນະສອນ ຊອກຫາແລ້ວ ເຫັນແຕ່ເພງລົມໜາວ ແຕ່ກໍມີຫຼາກ
ຫຼາຍ ຈຶ່ງຂໍມອບເພງ "ລົມໜາວ" ຂອງຄຸນ ສັກດາ ທີ່ປະພັນໂດຍເຈົ້າຄຳຜາຍ ກຸນລະວຸດ ຊຶ່ງເພງນີ້ ວັນນະສອນ ວ່າ ຊ່າງເໝາະກັບສະພາບອາກາດໃນຊ່ວງລະດູນີ້...ນະຄອນຫຼວງ ວໍຊິງຕັນ ກໍຫາຜ່ານພົ້ນພາຍຸຫິມະໃນສັບປະດາແລ້ວນີ້ແລະກໍໄດ້ຍິນມາເຊັ່ນ ກັນວ່າ ທີ່ພາກ
ເໜືອຂອງລາວໜາວຫຼາຍ...ມີຫິມະຕົກດ້ວຍ... ເຖິງຢ່າງໃດກໍດີ ຢ່າລືມຮັກສາສຸກຂະພາບ
ດ້ວຍ ຢ່າໄດ້ເຈັບໄຂ້ ເພາະຈະໄດ້ມາຟັງເພງມ່ວນໆ ໃນລາຍການສຽງເພງຈາກແດນໄກ
ຂອງ VOA ຮ່ວມກັນອີກ ຂໍເຊີນມ່ວນຊື່ນກັບເພງ ລົມໜາວ ນີ້. ພ້ອມດຽວກັນນີ້ ທ່ານເກົ້າປູ
ຂໍມອບເພງນີ້ ໃຫ້ແກ່ຫຼານເຂີຍ ຈັນຍາກອນ ແລະອາຈານ ຢາງ ປໍລີ ນ້ອຍຊາຍ ຂອງນັກບິນ ລີ ລື້ ໃນລັດ Wisconsin ພ້ອມດ້ວຍອະດີດຄູລາວ ທີ່ສູນອົບພະຍົບໃນປະເທດໄທ ພ້ອມນີ້ ຍັງຝາກບອກມາວ່າ ຖ້າໄດ້ດີ ມີຄວາມສຸກແລ້ວ ກໍຢ່າລືມທີ່ມາແລະຮາກເຫງົ້າຂອງເຮົາວ່າເຮົາແມ່ນໃຜແລະມາຈາກໃສ ກໍຄື ຄວາມເປັນລາວ. ຂໍເຊີນໄປຟັງເພງ ລົມໜາວ ພ້ອມໆກັນເລີຍ…
ສ່ວນຂໍ້ຄວາມຕໍ່ໄປນີ້ ມາຈາກນ້ອງ ພອນວິໄລ ນາມມະວົງສາ ນັກຂ່າວໃນແຂວງສະຫວັນ
ນະເຂດ ສປປ ລາວ ຊຶ່ງເປັນຜູ້ຟັງທີ່ຄອຍຕິດຕາມຮັບຟັງລາຍການຂອງ VOA ມາໂດຍ
ຕະຫຼອດ ຂຽນເຂົ້າມາທາງ Facebook ວ່າໄດ້ຮັບປະຕິທິນແລ້ວ ຊຶ່ງເຮັດໃຫ້ເພື່ີອນຮ່ວມ
ງານອິດສາແຕ່ເອື້ອຍວ່າບໍ່ຕ້ອງດອກ ຖ້າຂຽນສົ່ງເຂົ້າມາ ທາງເຮົາ ກໍຈະຈັດໃຫ້ ເພື່ອນຮ່ວມ
ງານຂອງນ້ອງພອນວິໄລ ຊື່ວ່າ ນ້ອງ ພັດສະລີ ຂໍຟັງເພງ "ຮັກສາວນາແກ" ທີ່ຂັບຮ້ອງໂດຍ
ກໍ ວິເສດ ຊຶ່ງເພງນີ້ ຂໍຈັດໃຫ້ ເອື້ອຍນິກ ທີ່ພອນວິໄລ ບອກມາວ່າ ນິກ ກໍແມ່ນແຟນຄລັບ
ທາງ Facebook ຂອງເອື້ອຍວັນນະສອນ ເຊັ່ນກັນ ເອົາໄປຟັງເພງ "ຮັກສາວນາແກ" ພ້ອມໆກັນເລີຍ ຊຶ່ງກໍໜ້າເສຍດາຍທີ່ທາງເຮົາບໍ່ມີເພງຕົ້ນສະບັບຂອງກໍ ວິເສດ ຈຶ່ງຂໍຈັດຜົນ
ງານເພງຂອງເຕັ້ຍ ຄຳວົງໄຊ ໃຫ້ແທນ ຫວັງວ່າ ຄົງຈະບໍ່ວ່າກັນ.
ຂໍມອບເພງມ່ວນໆ ໃຫ້ທ່ານ Joseph SYHARAJ ຜູ້ຟັງທີ່ຂຽນຂໍ້ຄວາມຝາກໄວ້ໃນໜ້າ
website ຂອງເຮົາວ່າ VOA ພະແນກພາສາລາວຈັດລາຍການໄດ້ດີຫຼາຍ ຂ້າພະເຈົ້າຢູ່
ລາວ ແລະຕິດຕາມຮັບຟັງ VOA ໃນທຸກໆຄ່ຳຄືນ ຂໍໃຫ້ສືບຕໍ່ດຳເນີນລາຍການຕໍ່ໆໄປ ເພາະສະນັ້ນ ວັນນະສອນ ຈຶ່ງຂໍສົ່ງທ່ານ Joseph ແລະຜູ້ຟັງທັງຫຼາຍ ເຂົ້ານອນ ດ້ວຍເພງຫວານໆນີ້ “ເຈົ້າຄືລົມຫາຍໃຈ” ເປັນຜົນງານເພງ ຂອງນ້ອງເຈເດນ ທີ່ປະພັນໂດຍ ຈັນທະໄລ ຂັນຕິວົງ ຂໍໃຫ້ທຸກໆທ່ານ ນອນຫຼັບຝັນດີ.