ລັດຖະບານທີ່ບໍລິຫານໂດຍກຸ່ມຮາມາສໃນຂົງເຂດກາຊາກ່າວວ່າ ປະຊາຊົນຫຼາຍ ກວ່າ 300,000 ຄົນທີ່ພັດຖິ່ນ ເນື່ອງຈາກສົງຄາມລະຫວ່າງ ອິສຣາແອລ ແລະ ກຸ່ມຮາມາສ, ໄດ້ພາກັນເດີນທາງກັບຄືນສູ່ພາກເໜືອຂອງກາຊາໃນວັນຈັນວານນີ້ ລຸນຫຼັງ ອິສຣາແອລ ໄດ້ເປີດດ່ານກວດກາ ແລະອະນຸຍາດໃຫ້ປະຊາຊົນກັບຄືນ ສູ່ຂົງເຂດດັ່ງກ່າວ.
ປະຊາຊົນຊາວປາແລັສໄຕນ໌ ສ່ວນຫຼາຍພາກັນຍ່າງ, ໄດ້ພາກັນຂົນສິ່ງຂອງ ສ່ວນຕົວອື່ນໆທີ່ພວກເຂົາເຈົ້າສາມາດເອົາມາໄດ້ ໃນຂະນະທີ່ພວກເຂົາເດີນ ທາງມຸ່ງໜ້າກັບຄືນເພື່ອເບິ່ງວ່າ ເຮືອນທີ່ເຄີຍຢູ່ຄັ້ງນຶ່ງຂອງພວກເຂົານັ້ນ ຍັງຢູ່ຫຼືບໍ່ ຫຼັງຈາກພວກເຂົາຖືກບັງຄັບໃຫ້ອອກໄປໃນຊ່ວງໄລຍະຕົ້ນຂອງ ສົງຄາມ. ແຕ່ຫຼາຍໆແຫ່ງຢູ່ໃນພາກພື້ນແຫ່ງນີ້ໄດ້ຖືກທໍາລາຍກ້ຽງ ໃນລະຫວ່າງການຖິ້ມລະເບີດຂອງອິສຣາແອລ ທີ່ແນເປົ້າໝາຍໃສ່ພວກຫົວຮຸນແຮງຮາມາສ ແລະຕຶກອາຄານທີ່ອາໄສຢູ່ໂດຍກຸ່ມຮາມາສ.
ປະຊາຊົນປະມານນຶ່ງລ້ານຄົນ ໄດ້ຖືກສັ່ງໃຫ້ອອກຈາກພາກເໜືອຂອງເຂດ ກາຊາ, ໃນຂະນະທີ່ການໂຈມຕີຂອງ ອິສຣາແອລ ເລີ້ມຕົ້ນຂຶ້ນໃນເດືອນຕຸລາ ປີ 2023. ຈົນຮອດປັດຈຸບັນນີ້, ທະຫານ ໄດ້ປ້ອງກັນການກັບຄືນໄປຂອງ ພວກເຂົາເຈົ້າ.
ການກັບຄືນຂອງຊາວປາແລັສໄຕນ໌ໄປຍັງຂົງເຂດກາຊາ ມີຂຶ້ນໃນໄລຍະຕົ້ນ 6 ອາທິດທໍາອິດຂອງການຢຸດຍິງລະຫວ່າງ ອິສຣາແອລ ແລະ ກຸ່ມຮາມາສ, ສົ່ງຜົນໃຫ້ມີການປົດປ່ອຍໂຕປະກັນ 7 ຄົນ ທີ່ຖືກກັກຂັງຢູ່ໃນຂົງເຂດກາຊາ, ການປ່ອຍນັກໂທດຊາວປາແລັສໄຕນ໌ 300 ຄົນທີ່ຖືກຈັບໂດຍ ອິສຣາແອລ ແລະ ການຊ່ວຍເຫຼືອດ້ານມະນຸດສະທຳເຂົ້າໄປໃນຂົງເຂດກາຊາ ເພີ້ມຂຶ້ນ.
ເຈົ້າໜ້າທີ່ອິສຣາແອລ ກ່າວໃນວັນຈັນວານນີ້ວ່າ ກຸ່ມຮາມາສ ໄດ້ໃຫ້ຂໍ້ມູນກ່ຽວ ກັບບັນດາໂຕປະກັນທີ່ຍັງເຫຼືອ ທີ່ມີກຳນົດໄດ້ຮັບການປ່ອຍໂຕໃນຂັ້ນຕອນທຳ ອິດຂອງການຢຸດຍິງ, ລວມທັງ 8 ຄົນໃນຈຳນວນທີ່ຍັງຖືກຈັບຢູ່ນັ້ນ ແມ່ນເສຍຊີວິດແລ້ວ.
ພວກຊາວປາແລັສໄຕນ໌ພັດຖິ່ນ ເດີນທາງໄປຮອດເຂດກາຊາ (Gaza Strip), ຫຼັງຈາກອິສຣາແອລ ໄດ້ຕັດສິນອະນຸຍາດໃຫ້ຫຼາຍພັນຄົນກັບຄືນເຂົ້າໄປເປັນເທື່ອທຳອິດ ນັບຕັ້ງແຕ່ສົງຄາມກັບກຸ່ມຮາມາສ ໄດ້ເລີ້ມຂຶ້ນເມື່ອຕົ້ນອາທິດຂອງເດືອນທີ 15, ວັນທີ 27 ມັງກອນ 2025.
ການປ່ອຍໂຕປະກັນຮອບຕໍ່ໄປ ແມ່ນຈະມີຂຶ້ນໃນທ້າຍອາທິດນີ້.
ປະທານາທິບໍດີສະຫະລັດ ທ່ານ ດໍໂນລ ທຣຳ ກ່າວໃນທ້າຍອາທິດທີ່ຜ່ານມາ ວ່າ ທ່ານຢາກໃຫ້ປະເທດ ຈໍແດັນ ແລະ ອີຈິບ ຮັບເອົາຊາວປະຊາຊົນຊາວ ປາແລັສໄຕນ໌ ທີ່ພັດຖິ່ນນັ້ນ ເພີ້ມຂຶ້ນ, ເຊິ່ງເປັນສ່ວນນຶ່ງຂອງຄວາມພະຍາຍາມ ເພື່ອ “ທໍາຄວາມສະອາດ” ຂົງເຂດກາຊາ. ແຕ່ສອງປະເທດ ໄດ້ປະຕິເສດຕໍ່ຂໍ້ສະເໜີດັ່ງກ່າວ ໂດຍໃຫ້ເຫດຜົນວ່າ ວິທີດຽວທີ່ຈະກ້າວໄປໜ້າໄດ້ ແມ່ນການສ້າງລັດປາແລັສໄຕນ໌ ຄຽງຄູ່ກັບ ອິສຣາແອລ.
ສະຫະລັດ ໄດ້ສະໜັບສະໜູນການເປັນລັດປາແລັສໄຕນ໌ມາເປັນເວລາດົນນານ, ແຕ່ນາຍົກລັດຖະມົນຕີອິສຣາແອລ ທ່ານ ເບັນຈາມິນ ເນຕັນຢາຮູ ບໍ່ເຫັນດີນໍາແນວຄວາມຄິດດັ່ງກ່າວນີ້.
ສົງຄາມຢູ່ໃນຂົງເຂດກາຊາ ໄດ້ເລີ້ມຕົ້ນມຂຶ້ນໃນວັນທີ 7 ຕຸລາ ປີ 2023, ເມື່ອກຸ່ມຮາມາສບຸກໂຈມຕີ ອິສຣາແອລ ເຊິ່ງໄດ້ສັງຫານປະຊາຊົນຈໍານວນ 1,200 ຄົນ ແລະຈັບໂຕປະກັນອີກ 250 ຄົນ. ການໂຈມຕີຂອງ ອິສຣາແອລ ໃນຂົງເຂດກາຊາ ໄດ້ສັງຫານປະຊາຊົນຢ່າງໜ້ອຍ 47,300 ຄົນ, ໃນນັ້ນ ສ່ວນໃຫຍ່ແມ່ນແມ່ຍິງ ແລະເດັກນ້ອຍ, ອີງຕາມເຈົ້າໜ້າທີ່ສາທາລະນະສຸກ. ກອງທັບອິສຣາແອລກ່າວວ່າ ຈຳນວນຜູ້ເສຍຊີວິດທັງໝົດ ລວມມີພວກຫົວຮຸນແຮງຈໍານວນ 17,000 ຄົນ.