ມີຊາວປາແລັສໄຕນ໌ເສຍຊີວິດຢ່າງໜ້ອຍ 112 ຄົນ ໃນຂະນະຂໍການຊ່ວຍເຫຼືອດ້ານມະນຸດສະທຳ ໂດຍຖືກສັງຫານຢູ່ເມືອງກາຊາ ໃນຕອນເຊົ້າຂອງວັນພະຫັດວານນີ້ ແລະມີຜູ້ບາດເຈັບອີກຈໍານວນຫຼາຍ, ໂດຍພະຍານ ແລະເຈົ້າໜ້າທີ່ສາທາລະນະສຸກຂອງເຂດກາຊາ ກ່າວວ່າ ເປັນຜົນມາຈາກການຍິງຂອງຝ່າຍອິສຣາແອລ. ອິສຣາແອລໄດ້ໂຕ້ແຍ້ງໃນທັນທີ ໂດຍກ່າວວ່າ ຜູ້ຄົນຈຳນວນຫຼາຍຢຽບກັນເອງ ແລະຖືກຢຽບໂດຍລົດບັນທຸກການຊ່ວຍເຫຼືອ ໃນຂະນະທີ່ກຳລັງຂັບໜີຢູ່ນັ້ນ.
ຄວາມຮຸນແຮງຄັ້ງຫຼ້າສຸດ ໄດ້ເຮັດໃຫ້ຈໍານວນຜູ້ເສຍຊີວິດຂອງຊາວປາແລັສໄຕນ໌ໃນສົງຄາມເປັນເວລາເກືອບ 5 ເດືອນຜ່ານມານີ້ ເພີ້ມຂຶ້ນຫຼາຍກວ່າ 30,000 ຄົນ, ພ້ອມດ້ວຍຜູ້ບາດເຈັບອີກ 70,000 ຄົນ, ແລະຫຼາຍໆຄົນຍັງຄົງຫາຍສາບສູນພາຍໃຕ້ຊາກຫັກພັງຕ່າງໆ, ອີງຕາມກະຊວງສາທາລະນະສຸກຂອງກຸ່ມຮາມາສທີ່ປົກຄອງຂົງເຂດກາຊາ.
ຊາວປາແລັສໄຕນ໌ ຍົກຍ້າຍຮ່າງຂອງຜູ້ເສຍຊີວິດ ລຸນຫຼັງສິ່ງທີ່ກະຊວງສາທາລະນະສຸກປາແລັສໄຕນ໌ກ່າວວ່າ ຖືກອິສຣາແອລຍິງປືນໃສ່ຜູ້ຄົນທີ່ລໍຖ້າການຊ່ວຍເຫຼືອໃນເມືອງກາຊາ, ໃນພາບຄ້າງທີ່ຖ່າຍຈາກວີດີໂອ, ວັນທີ 29 ກຸມພາ 2024. (Reuters TV via Reuters)
ເຈົ້າໜ້າທີ່ໂຮງໝໍໃນຂົງເຂດກາຊາລາຍງານໃນເບື້ອງຕົ້ນວ່າ ການໂຈມຕີຂອງອິສຣາແອລ ໃສ່ຝູງຊົນຢູ່ອ້ອມຮອບບໍລິເວນໂຮງໝໍ ອາລ-ນາບູສີ (al-Nabusi) ເຊິ່ງເປັນສ່ວນນຶ່ງທີ່ຕັ້ງຢູ່ໃນພາກຕາເວັນຕົກຂອງເມືອງກາຊາ. ແລ້ວໃນເວລາຕໍ່ມາ ຜູ້ເຫັນເຫດການກ່າວວ່າ ກອງທັບອິສຣາແອລໄດ້ຍິງປືນໃສ່ຜູ້ຄົນທີ່ພາກັນດຶງຖົງແປ້ງ ແລະອາຫານກະປ໋ອງອອກຈາກລົດບັນທຸກການຊ່ວຍເຫຼືອເຫຼົ່ານັ້ນ.
ການຊ່ວຍເຫຼືອພຽງເລັກໜ້ອຍສາມາດເຂົ້າໄປເຖິງພາກເໜືອຂອງເຂດກາຊາ ໃນບໍ່ເທົ່າໃດອາທິດທີ່ຜ່ານມາ ແລະຄວາມອຶດຫິວກໍໄດ້ເພີ້ມຄວາມຮຸນແຮງຂຶ້ນ. ອົງການສະຫະປະຊາຊາດເຕືອນວ່າ ໄພແຫ່ງຄວາມອຶດຫີວກຳລັງຫຍັບໃກ້ເຂົ້າມາ.
ປະຊາຊົນ ໄວ້ທຸກຢູ່ທີ່ໂຮງໝໍ ອາລ-ຊີຟາ ໃນເມືອງກາຊາ ຕຊ່ຮ່າງຜູ້ເສຍຊີວິດຊາວປາແລັສໄຕນ໌ ທີ່ຖືກສັງຫານໃນເຫດການຕອນເຊົ້າ ເມື່ອຝູງຊົນແຮ່ເຂົ້າລົດບັນທຸກການຊ່ວຍເຫຼືອດ້ານມະນຸດສະທໍາ ໃນເມືອງກາຊາ, ວັນທີ 29 ກຸມພາ 2024.
ໃນເບື້ອງຕົ້ນ, ເຈົ້າໜ້າທີ່ອິສຣາແອລຍອມຮັບວ່າ ທະຫານໄດ້ປະຕິບັດການຍິງ, ໂດຍກ່າວວ່າ ພວກເຂົາເຮັດດັ່ງນັ້ນ ເນື່ອງຈາກພວກເຂົາເຈົ້າຄິດວ່າ ປະຊາຊົນທີ່ແລ່ນໄປຫາລົດບັນທຸກຊ່ວຍເຫຼືອນັ້ນ "ມີທ່າທີເປັນໄພຂົ່ມຂູ່."
ແຕ່ໃນຖະແຫຼງການທາງວີດີໂອທີ່ໄດ້ໂພສລົງໃນສື່ສັງຄົມ X ຂອງຕອນແລງວັນພະຫັດວານນີ້, ໂຄສົກຂອງກອງກຳລັງປ້ອງກັນອິສຣາແອລ ຫຼື IDF ກ່າວວ່າ ທະຫານມີແຕ່ຍິງ “ເຕືອນພຽງເລັກໜ້ອຍ” ເພື່ອຂັບໄລ່ຝູງຊົນ.
ຊາວປາແລັສໄຕນ໌ ຍ່າງຜ່ານເສດຊາກຫັກເພ ຈາກການໂຈມຕີຂອງອິສຣາແອລໃສ່ສູນອົບພະຍົບ ຈາບາລິຢາ ໃນແຫຼມກາຊາ, ວັນທີ 29 ກຸມພາ 2024.
ໂຄສົກດ້ານຄວາມໝັ້ນຄົງ ພົນເຮືອຕີ ເດນຽລ ຮາກາຣີ (Daniel Hagari) ກ່າວວ່າ "ບໍ່ມີການຍິງໂຈມຕີຈາກ IDF ຕໍ່ຂະບວນການຊ່ວຍເຫຼືອ", ແລະກ່າວຕື່ມວ່າ ພວກລົດຖັງຂອງອິສຣາແອລ ໄດ້ເຂົ້າໄປຢູ່ທີ່ນັ້ນ ກໍເພື່ອປ້ອງກັນເສັ້ນທາງການຊ່ວຍເຫຼືອດ້ານມະນຸດສະທຳ ໃຫ້ແກ່ຂະບວນລົດບັນທຸກ 38 ຄັນແລ່ນຜ່ານ.