ບັນດາເຈົ້າໜ້າທີ່ໃນລັດມິສຊິສສິບປີ ຢູ່ທາງພາກໃຕ້ຂອງສະຫະລັດນັ້ນ ເວົ້າວ່ານ້ຳຖ້ວມປາກົດວ່າໄດ້ຂຶ້ນສູ່ຂີດສູງສຸດຂອງມັນແລ້ວ ໃນວັນຈັນວານນີ້ ຢູ່ໃນເມືອງແຈັກສັນ (Jackson) ໂດຍໃຫ້ຄວາມຫວັງວ່າ ນ້ຳທີ່ຢູ່ໃນລະດັບສູງຈະເລີ້ມບົກລົງ ແລະອະນຸຍາດໃຫ້ຄົນທີ່ຖືກຍົກຍ້າຍອອກໄປນັ້ນ ກັບຄືນໄປຫາບ້ານເຮືອນຂອງຕົນໄດ້.
ຜູ້ປົກຄອງລັດມິສຊິສສິບປີ ເທດ ຣີບສ໌ (Tate Reeves) ໄດ້ເຕືອນປະຊາຊົນອາໄສຢູ່ທີ່ນັ້ນວ່າ ບໍ່ໃຫ້ຟ້າວກັບຄືນໄປບ້ານເຮືອນຂອງຕົນຈົນກວ່າວ່າ ພວກເຈົ້າ ໜ້າທີ່ຈະຮັບປະກັນວ່າມັນມີຄວາມປອດໄພແລ້ວ.
ທ່ານກ່າວຢູ່ໃນກອງປະຊຸມຖະແຫລງຂ່າວວ່າ "ຢ່າໄດ້ກັບຄືນໄປຍັງເຂດຄຸ້ມທີ່ທ່ານຢູ່ ຫລືໄປຫາເຮືອນຊານຂອງທ່ານ ຈົນກວ່າວ່າ ພວກເຈົ້າໜ້າທີ່ ແລະພະນັກງານບອກທ່ານວ່າໃຫ້ກັບຄືນໄປໄດ້.”
ແມ່ນ້ຳ Pearl ຊຶ່ງແປວ່າໄຂ່ມຸກ ໄດ້ຍື່ງຂຶ້ນສູ່ລະດັບສູງສຸດຢູ່ໃນເມືອງແຈັກສັນ (Jackson) ໃນຮອບ 37 ປີຜ່ານມາ-- ສູງເຖິງ 11.2 ແມັດ --ພາຍຫລັງທີ່ ມີຝົນຕົກໜັກໃນອາທິດແລ້ວນີ້. ນ້ຳຝົນໄດ້ບັງຄັບໃຫ້ພວກເຈົ້າໜ້າທີ່ຕ້ອງໄດ້ປ່ອຍ ນ້ຳທີ່ລົ້ນຈາກອ່າງເກັບນ້ຳອອກມາ ຊຶ່ງເຮັດໃຫ້ມີນ້ຳຖ້ວມບ່ອນທີ່ຕ່ຳເພີ້ມຂຶ້ນອີກ. ທ່ານ ຣີບສ໌ (Reeves) ໄດ້ປະກາດສະພາວະສຸກເສີນໃນລັດ ໃນວັນເສົາຜ່ານມາ ແລະພວກເຈົ້າໜ້າທີ່ ໄດ້ສັ່ງໃຫ້ມີການຍົກຍ້າຍຄົນອອກແບບບັງຄັບ ສຳລັບພວກທີ່ອາໄສຢູ່ໃນຢູ່ໃນເຂດກາງລັດມິສຊິສສິບປີ (Mississippi) ແລະພາກໃຕ້ຂອງລັດ ເທນເນສຊີ (Tennessee).
ຍັງບໍ່ມີລາຍງານວ່າ ມີຄົນເສຍຊີວິດ ຫລືບາດເຈັບແຕ່ຢ່າງໃດເທື່ອ ຍ້ອນໄພນ້ຳຖ້ວມນີ້. ມັນຍັງບໍ່ເປັນທີ່ຈະແຈ້ງເທື່ອວ່າ ມີເຮືອນຈັກຫລັງ ແລະຖະໜົນຈັກສາຍ ຖືກເປ່ເພເສຍຫາຍຍ້ອນນຳຂຶ້ນສູງນີ້.
ພວກເຈົ້າໜ້າທີ່ມີຄວາມລະມັດລະວັງວ່າ ເຂດຢູ່ລຸ່ມແມ່ນ້ຳໃນເມືອງແຈັກສັນ (Jackson) ອາດຈະຍັງຖືກນ້ຳທີ່ມາຈາກແມ່ນ້ຳ Pearl ຊຶ່ງແປວ່າ ໄຂ່ມຸກ ຖ້ວມໄດ້ງ່າຍຢູ່. ພວກເພິ່ນຍັງໄດ້ສະແດງຄວາມກັງວົນອອກມາອີກວ່າ ຖ້າມີພະຍາກອນອາກາດວ່າຈະມີຝົນຕົກທີ່ຮ້າຍແຮງກວ່າທີ່ໄດ້ຄາດຄະເນໄວ້ຢູ່ໃນເວລາຕໍ່ມາໃນອາທິດນີ້ ມັນອາດຈະພາໃຫ້ເກີດນ້ຳຖ້ວມເພີ້ມອີກ.
ຂີດໝາຍຂອງລະດັບນ້ຳໃນວັນຈັນວານນີ້ ຢູ່ໃນ ແມ່ນ້ຳ Pearl ແມ່ນສູງຢູ່ໃນອັນດັບສາມຢູ່ໃນສະຖິຕິຂອງລະດັບແມ່ນ້ຳດັ່ງກ່າວ. ຈຸດສູງສຸດທີ່ຖືກບັນທຶກ ແມ່ນມີຂຶ້ນຢູ່ໃນປີ 1979 ເມື່ອນ້ຳຖ້ວມໄດ້ຖີບຕົວສູງຂຶ້ນເຖິງ 13.2 ແມັດ.