ຜົນການເລືອກຕັ້ງຂັ້ນຕົ້ນ ສະແດງໃຫ້ເຫັນວ່າ ບັນດາຜູ້ປ່ອນບັດໃນເມັກຊິໂກໄດ້ເລືອກທີ່ຈະ
ນໍາເອົາພັກ ທີ່ຄັ້ງນຶ່ງເຄີຍມີອໍານາດຄອບງໍາທາງການເມືອງໃນປະເທດນັ້ນ ກັບຄືນມາມີອໍາ
ນາດໃໝ່ ໂດຍໄດ້ເລືອກເອົາທ່ານ Enrique Pena Nieto ໃຫ້ເປັນປະທານາທິບໍດີຄົນຕໍ່ໄປ.
ເຈົ້າໜ້າທີ່ເລືອກຕັ້ງກ່າວໃນແລງວັນອາທິດວານນີ້ວ່າ ທ່ານ Nieto ໄດ້ຮັບ 38% ຂອງຄະແນນ
ສຽງທັງໝົດ ໂດຍໄດ້ຊະນະເຈົ້າຄອງກໍາເເພງນະຄອນ Mexico City ທ່ານ Andres
Manuel Lopez Obrador ທີ່ໄດ້ຮັບ 31%.
ແຕ່ທ່ານ Obrador ກ່າວວ່າ ທ່ານຍັງບໍ່ພ້ອມ ທີ່ຈະຍອມຮັບເອົາຄວາມປາໄຊ ເທື່ອ.
ທ່ານ Pena Nieto ສັງກັດພັກປະຕິວັດສະຖາບັນ Institutional Revolutionary Party
ຫຼື ພັກ PRI ທີ່ໄດ້ປົກຄອງປະເທດມາເປັນເວລາ 71 ປີ ຈົນເຖິງ ປີ 2000 ເວລາປະຊາຊົນ
ເມັກຊິໂກພາກັນປ່ອນບັດເອົາ ທ່ານ Vicent Fox ຜູ້ສະໝັກຈາກພັກກິດແຫ່ງຊາດ National
Action Party ຫຼື PAN. ປະທານາທິບໍດີ ຜູ້ກໍລັງທີ່ຈະພົ້ນຈາກຕໍາແໜ່ງ ທ່ານ Felipe
Calderon ນັ້ນ ກໍມາຈາກ ພັກ PAN ເຊັ່ນກັນ ໂດຍໄດ້ຖືກເລືອກຕັ້ງໃນປີ 2006 ແຕ່ການ
ຄອງອໍານາດຂອງທ່ານນັ້ນ ໄດ້ປະສົບກັບບັນຫາເສດຖະກິດທີ່ຝືດເຄືອງບໍ່ມີການຂະຫຍາຍໂຕ
ແລະຄວາມຮຸນແຮງຢ່າງແຜ່ຫລາຍຍ້ອນບັນຫາຢາເສບຕິດ.
ທ່ານ Calderon ໄດ້ສັ່ງໃຫ້ທາງທະຫານທໍາການປາບປາມພວກກຸ່ມຄ້າຢາເສບຕິດ ຢ່າງເອົາຈິງເອົາຈັງ ບໍ່ດົນຫຼັງຈາກທີ່ທ່ານໄດ້ຂຶ້ນຮັບຕໍາແໜ່ງ. ໄດ້ມີຫຼາຍກວ່າ 50,000 ຄົນ ຖືກສັງຫານໃນການປະທະກັນກ່ຽວກັບຢາເສບຕິດນີ້ ນັບຕັ້ງແຕ່ນັ້ນມາ.
ທ່ານ Pena Nieto ໄດ້ຖະແຫຼງຕໍ່ບັນດາຜູ້ທີ່ສະໜັບສະໜູນທ່ານວ່າ ຊາວເມັກຊິໂກ ໄດ້ເລືອກເອົາການປ່ຽນແປງໃນທິດທາງຂອງປະເທດ ໃນການເລືອກເອົາທ່ານນັ້ນ ແຕ່ທ່ານກໍໃຫ້ຄໍາໝັ້ນສັນຍາທີ່ຈະກົດດັນ ກຸ່ມຄ້າຢາເສບຕິດ ຢູ່ຕໍ່ໄປ.