ລອຕເຕີຣີ ເມກາ ມີລລ້ຽນສ໌ (Mega Millions) ຂອງສະຫະລັດ ສະສົມລາງ ວັນແຈັກພ໊ອດກາຍ 1,000 ລ້ານໂດລາ ໃນວັນຄຣິສມັສວານນີ້ ຕາມເວລາໃນ ສະຫະລັດ ຫລັງຈາກບໍ່ມີຜູ້ໃດຖືກລາງວັນໃຫຍ່ ເມື່ອຕອນຄ່ຳຄືນວັນອັງຄານ ທີ 24 ທັນວາ ທີ່ຜ່ານມານີ້ ອີງຕາມລາຍງານຂອງອົງການຂ່າວເອພີ.
ຫວຍ ເມກາ ມີລລ້ຽນ ຈະອອກເລກອີກຄັ້ງນຶ່ງໃນວັນສຸກນີ້ ເຊິ່ງຄາດວ່າ ຈະມີເງິນລາງວັນແຈັກພ໊ອດສູງເຖິງ 1,150 ລ້ານໂດລາ ທີ່ຖືວ່າ ຫຼາຍທີ່ສຸດອັນ ດັບ 5 ໃນປະຫວັດສາດຂອງຫວຍ ເມກາ ມີລລ້ຽນສ໌.
ທ່ານຈ໊ອສຊົວ ຈອນສ໌ຕັນ ຜູ້ອຳນວຍການຂອງ Mega Millions Consortium ໄດ້ຖະແຫລງການໃນວັນພຸດວານນີ້ ວ່າ “ເຮົາຮູ້ດີວ່າ ຈະມີຜູ້ຄົນຈຳນວນຫຼາຍທີ່ໄດ້ຮັບໃບລອຕເຕີຣີສຳລັບການອອກເລກລາງວັນໃນ ວັນສຸກນີ້ ອັນເປັນຂອງຂວັນຄຣິສມາສ ແລະຈະກາຍເປັນຂອງຂວັນທີ່ພິເສດສຸດ ຫາກວ່າເຈົ້າຖືກເລກລາງວັນໃຫຍ່ 1,150 ລ້ານໂດລາ.”
ທັງນີ້ ເມກາ ມີລລ້ຽນສ໌ ມີຂາຍຢູ່ໃນ 45 ລັດທົ່ວອາເມຣິກາ ລວມທັງໃນນະ ຄອນຫຼວງວໍຊິງຕັນ ໂດຍໃບນຶ່ງຂາຍໃນລາຄາ 2 ໂດລາ, ການອອກເລກ ລາງວັນ ຈະມີຂຶ້ນທຸກວັນອັງຄານ ແລະວັນສຸກ ສ່ວນໂອກາດໃນການຖືກລາງ ວັນໃຫຍ່ ຫຼື ແຈັກພ໊ອດ ຂອງລອຕເຕີຣີ ເມກາ ມີລລ້ຽນສ໌ ນັ້ນ ຄື 1 ໃນ 302.6 ລ້ານຄົນ.
ສຳລັບແຈັກພ໊ອດລອຕເຕີຣີກ້ອນໃຫຍ່ທີ່ສຸດ ໃນອາເມຣິກາ ຍັງຄົງຢູ່ທີ່ 2,040 ລ້ານໂດລາ ທີ່ເປັນຂອງລາງວັນ ພາວເວີ້ບອລ (Powerball) ເຊິ່ງມີຜູ້ຖືກໃນ ເດືອນພະຈິກ ປີ 2022.