Your browser doesn’t support HTML5
ຟັງລາຍງານກ່ຽວກັບເຄື່ອງວັດແທກລົມຫາຍໃຈ ທີ່ສາມາດວິນິດໄສໂຣກໄດ້
ນັບຕັ້ງແຕ່ປີ 1931 ເປັນຕົ້ນມາ ເວລາທີ່ເຄື່ອງແທກຄວາມເມົາທີ່ເອີ້ນວ່າ drunkometer ອັນທຳອິດ ໄດ້ຖືກນຳມາທົດສອບໂດຍພວກຕຳຫຼວດໃນສະຫະລັດ ພວກເຈົ້າໜ້າທີ່ຕຳ ຫຼວດຢູ່ໃນທົ່ວໂລກໄດ້ພາກັນນຳໃຊ້ການກວດໂດຍເຄື່ອງແທກປະລິມານອາລກໍຮໍໃນລົມຫາຍໃຈ ຂອງພວກຂັບລົດທີ່ເມົາ. ໃນຂະນະດຽວກັນ ພວກທ່ານໝໍກໍຄົ້ນພົບວ່າ ເຂົາເຈົ້າ ສາມາດນຳໃຊ້ເຄື່ອງວັດແທກລົມຫາຍໃຈຫຼື breathalyzers ຄົ້ນຫາພະຍາດຕ່າງໆ ນັບແຕ່ໂຣກມາເລເຣຍໄປຫາມະເຮັງ. George Putic ນັກຂ່າວ VOA ມີລາຍງານກ່ຽວກັບເລື້ອງນີ້ ຊຶ່ງວັນນະສອນ ຈະນຳເອົາລາຍລະອຽດມາສະເໜີທ່ານ ໃນອັນດັບຕໍ່ໄປ.
ອິງຕາມບັນດານັກວິທະຍາສາດ ໃນແຕ່ລະປີມີຜູ້ຄົນເກືອບ 300 ລ້ານຄົນ ໄດ້ຮັບຢາຕໍ່ ຕ້ານໂຣກມາລາເຣຍ ເຖິງແມ່ນວ່າ ຜູ້ຄົນສ່ວນໃຫຍ່ ແມ່ນພຽງແຕ່ເປັນພວກທີ່ສົງໄສວ່າ ຈະເປັນໂຣກນີ້ ເທົ່ານັ້ນ.
ໃນປະຈຸບັນນີ້ ເຄື່ອງວັດແທກລົມຫາຍໃຈ ທີ່ມີລາຄາຖືກນັ້ນ ແມ່ນກຳລັງໄດ້ຮັບການພັດທະ ນາຂຶ້ນ ທີ່ມະຫາວິທະຍາໄລ Washington ໃນນະຄອນ St. Louis ລັດ Missouri ທີ່ສາມາດບົ່ງບອກໄດ້ວ່າ ພວກທີ່ປ່ວຍເປັນໂຣກເທົ່ານັ້ນ
ຈຶ່ງຈະສາມາດຮັກສາໄດ້.
ທ່ານນາງ Audrey Odom ຈາກມະຫາວິທະຍາໄລ Washington ໃນນະຄອນ St. Louis ກ່າວວ່າ “ເຄື່ອງວັດແທກນີ້ ຈະເຄື່ອງມືທີ່ທົນທານ ເໝາະ ສົມ ໃນການປະຕິບັດໜ້າທີ່ ທີ່ມີຊັບພະຍາກອນຈຳກັດ ທີ່ວາງແຜນໄວ້ແລະມັນກໍບໍ່ຕ້ອງອາໄສພວກທີ່ສັງເກດການທີ່ມີປະສົບການ ຫຼືບໍ່ກໍຜູ້ຄົນທີ່ໄດ້ຮັບການຝຶກໃນການນຳໃຊ້ ເຄື່ອງວັດແທກດັ່ງກ່າວ.”
ເຄື່ອງວັດລົມຫາຍໃຈກ່ຽວກັບມາລາເຣຍນີ້ ຈະສາມາດກວດເຫັນສານປະກອບທີ່ປ່ອຍອອກມາ ໂດຍເຊື້ອກາຝາກຂອງໂຣກມາລາເຣຍ ບໍ່ດົນ ຫຼັງຈາກມັນໄດ້ຕິດຕໍ່ເປັນໂຣກຢູ່ໃນຮ່າງກາຍຂອງຜູ້ປ່ວຍນັ້ນແລ້ວ ແລະນັ້ນແມ່ນໝາຍຄວາມວ່າ ຜູ້ປ່ວຍຈະໄດ້ຮັບການປິ່ນປົວຢ່າງປະຈຸບັນທັນດ່ວນ.
ການທົດສອບຂັ້ນຕົ້ນ ແມ່ນມີຂຶ້ນໃນປະເທດ Malawi ຊຶ່ງຜົນອອກມາແມ່ນຖືກ ຕ້ອງ 100 ເປີເຊັນ ຢ່າງບໍ່ໜ້າເຊື່ອ ໃນການວິດນິໄສໂຣກ ທີ່ຮ້າຍແຮງນີ້.
ໃນຂະນະ ດຽວກັນນີ້ ເຄື່ອງວັດແທກລົມຫາຍໃຈກ່ຽວກັບໂຣກມະເຮັງປອດ ທີ່ກຳລັງພັດທະນາຂຶ້ນມາ ໃນຫຼາຍໆປີນັ້ນ ແມ່ນນ້ອຍລົງແລະມີຄວາມແມ່ນຍຳຂຶ້ນຫຼາຍ.
ທ່ານ Billy Boyle ປະທານບໍລິສັດ Owlstone Medical ກ່າວວ່າ “ສິ່ງທີ່ພວກເຮົາ ສາມາດເຮັດໄດ້ນັ້ນ ແມ່ນການນຳໃຊ້ ເທັກໂນໂລຈີແນວໃໝ່ ຫຼື microchip technology ທີ່ສາມາດຈັດທຳເຄື່ອງວັດແທກໃຫ້ນ້ອຍລົງ ສູ່ຂະໜາດທີ່ນ້ອຍ ເທົ່າກະດຸມເສື້ອ.”
ຄືກັນກັບໂຣກອື່ນໆນັ້ນລະ ການວິນິດໄສໂຣກມະເຮັງປອດໄດ້ແຕ່ໃນຕອນຫົວທີ ແມ່ນມີໂອກາດເພີ້ມຂຶ້ນໃນການທີ່ຈະມີຊີວິດຢູ່ລອດໄດ້ ແລະເຄື່ອງວັດລົມຫາຍໃຈ ກໍຍັງສາມາດກວດເຫັນສານເຄມີແມ່ນແຕ່ປະລິມານພຽງນ້ອຍໆທີ່ກ່ຽວຂ້ອງກັບພະ ຍາດດັ່ງກ່າວນີ້ໄດ້.
ພວກນັກຄົ້ນຄວ້າກ່າວວ່າ ເຄື່ອງວັດແທກອັນໃໝ່ນີ້ ສາມາດໃຊ້ກັບທຸກຄົນໄດ້ ບໍ່ແມ່ນພຽງແຕ່ສຳລັບບັນດາທ່ານໝໍເທົ່ານັ້ນ.
ປະຈຸບັນນີ້ ເຄື່ອງວັດແທກໂຣກມະເຮັງປອດ ແມ່ນກຳລັງ ທຳການທົດລອງໃນໂຮງພະຍາ ບານໃນອັງກິດ 17 ແຫ່ງ ແລະຄາດຫວັງວ່າຈະນຳອອກວາງຕະຫຼາດພາຍໃນປີ 2017 ນີ້.
ພວກນັກວິທະຍາສາດ ແມ່ນກຳລັງພັດທະນາເຄື່ອງວັດລົມຫາຍໃຈ ທີ່ຈະສາມາດວິນິດໄສ ໂຣກປອດບວມ ແລະໂຣກປອດແຫ້ງອີກດ້ວຍ.