ທ່ານຈິມ ແມັດຕິສ ລັດຖະມົນຕີປ້ອງກັນປະເທດສະຫະລັດ ໄດ້ແຈ້ງໃຫ້ຊາບກ່ຽວກັບ
ສະຖານະການທາງພາກພື້ນດິນໃນການສູ້ລົບກັນກັບພວກກະບົດຕາລີບານແບບທີ່ບໍ່
ຄ່ອຍໄດ້ຮູ້ກັນ ໂດຍເປີດເຜີຍໃນຕອນແລງວັນອັງຄານວານນີ້ວ່າ ກຳລັງອັຟການິສຖານ
ໄດ້ບາດເຈັບລົ້ມຕາຍ ຫຼາຍກວ່າ 1,000 ຄົນໃນເດືອນສິງຫາ ແລະກັນຍາຂອງປີນີ້.
ທ່ານແມັດຕິສ ກ່າວໃນລະຫວ່າງການໂອ້ລົມສົນທະນາ ຢູ່ທີ່ສະຖາບັນສັນຕິພາບ
ສະຫະລັດ ວ່າ “ພວກຊາຍສະກັນອັຟການິສຖານ ພາກັນສູ້ລົບ ຈົ່ງເບິ່ງພວກທີ່ບາດ
ເຈັບລົ້ມຕາຍ ຫຼາຍກວ່າ 1,000 ຄົນ ໃນເດືອນສິງຫາ ແລະກັນຍາ ແລະເຂົາເຈົ້າ
ຍັງຕໍ່ສູ້ຢູ່ໃນສະໜາມລົບຕໍ່ໄປ.”
ເຖິງແມ່ນວ່າມີຈຳນວນຜູ້ໄດ້ຮັບບາດເຈັບລົ້ມຕ້າຍສູງ ທ່ານແມັດຕິສກໍໄດ້ຍ້ອງຍໍ
ກຳລັງອັຟການິສຖານ ໃນການປ້ອງກັນບໍ່ໃຫ້ພວກກະບົດຕາລິບານເຂົ້າຄວບຄຸມ
ແລະຍຶດເອົາເມືອງ ແລະແຂວງຕ່າງໆ ແລະຂັດຂວາງບໍ່ໃຫ້ພວກເຂົາ ລົບກວນ
ການເລືອກຕັ້ງອັຟການິສຖານ ຫວ່າງມໍ່ໆມານີ້.
ບັນດາເຈົ້າໜ້າທີ່ກະຊວງປ້ອງກັນປະເທດສະຫະລັດ ໄດ້ຢຸດເປີດເຜີຍການບາດ
ເຈັບລົ້ມຕາຍ ຂອງກຳລັງຮັກສາຄວາມປອດໄພອັຟາການິສຖານ ໃຫ້ແກ່ສື່ມວນ
ຊົນຮູ້ ໃນທ້າຍປີ 2017.
ນາຍພົນໂຈເຊັຟ ດັນຝອດ ນາຍພົນສູງສຸດຂອງສະຫະລັດ ກ່າວຕໍ່ບັນດານັກຂ່າວ
ທະຫານ ຢູ່ກອງປະຊຸມນອກນະຄອນຫຼວງວໍຊິງຕັນ ໃນວັນສຸກທີ່ຜ່ານມານີ້ວ່າ
ການປ່ຽນແປງດັ່ງກ່າວ ກໍເພາະວ່າ ປະທານາທິບໍດີອາສຣັຟ ການີ ບໍ່ຢາກແຈ້ງ
ລາຍລະອຽດເຫລົ່ານັ້ນ ໃຫ້ສາທາລະນະຊົນຮູ້.
ນາຍພົນດັນຝອດ ກ່າວວ່າ “ຂ້າພະເຈົ້າບໍ່ຢາກຖິ້ມໂທດໃສ່ທ່ານ. ນັ້ນຄືສາເຫດ
ຂອງເລື້ອງນີ້. ພວກເຈົ້າໜ້າທີ່ອັຟການິສຖານ ຖືໂຕເລກເຫຼົ່ານັ້ນ ເປັນເລື້ອງສຳ
ຄັນຫຼາຍ. ພວກເຮົາບໍ່ໄດ້ເປັນເຈົ້າຂອງໂຕເລກນັ້ນອີກແລ້ວ.”
ໃນເດືອນແລ້ວນີ້ ເຈົ້າແຂວງໆແບັກແລນ ທາງເໜືອຂອງນະຄອນກາບູລ ກ່າວ
ຕໍ່ໜັງສືພິມນິວຢອກໄທມ໌ ວ່າພວກຕາລິບານ ໄດ້ສ້າງຄວາມເສຍຫາຍຢ່າງໜັກ
ໃຫ້ແກ່ກຳລັງຮັກສາຄວາມປອດໄພອັຟການິສຖານ.
ເຈົ້າແຂວງ ອັບດູລ ຮາຍ ນິມາຕີ ກ່າວວ່າ “ພວກຕາລິບານບໍ່ຕ້ອງການສັນຕິພາບ
ເພາະເຂົາເຈົ້າຄິດວ່າ ເຂົາເຈົ້າສາມາດເອົາຊະນະສົງຄາມໄດ້.”
ນາຍພົນດັນຝອດ ແລະທ່ານແມັດຕິສ ຕ່າງກໍກ່າວຢ້ຳວ່າ ຍຸດທະສາດໃນຂົງເຂດ
ເພື່ອສ້າງຄວາມປະນີປະນອມທາງດ້ານການເມືອງກັບພວກຕາລິບານກຳ ລັງໄດ້
ຮັບຄວາມກ້າວໜ້າ.
ທ່ານແມັດຕິສ ກ່າວວ່າ “ມັນກຳລັງໄດ້ຜົນຈາກຄວາມຄິດຂອງພວກເຮົາ ແຕ່ວ່າສິ່ງ
ທີ່ຍາກລຳບາກຢ່າງໜ້າເສຍໃຈນັ້ນກໍຄື ການຍອມຮັບທີ່ວ່າ ແລະຄວາມກ້າວໜ້າ
ແລະຄວາມຮຸນແຮງສາມາດມີຂຶ້ນພ້ອມໆກັນ.”