ທ້າວ ເຊັງ “ຊາລີ” ແຊ້ພານ ມີຮອຍຍິມທີ່ກວ້າງ ແລະ ໃສ່ຜ້າບ່ຽງສີຟ້າທີ່ຂຽນດ້ວຍຄຳວ່າ “Iu-Mien USA” ໃນຂະນະທີ່ລາວຍົກເຊັກເງິນຂະໜາດໃຫຍ່ມູນຄ່າ 1.3 ຕື້ໂດລາ ຂຶ້ນຢູ່ເທິງຫົວຂອງລາວ.
ໂຊກໃນການຖືກລາງວັນຂະໜາດໃຫຍ່ຂອງຫວຍ Powerball ຂອງຜູ້ຍົກຍ້າຍຖິ່ນຖານ ອາຍຸ 46 ປີດັ່ງກ່າວ ໃນລັດ ອໍເຣກອນ ເມື່ອຕົ້ນເດືອນນີ້, ທີ່ເປັນເງິນຈ່າຍສົດຫຼັງຈາກຫັກພາສີອອກ ເຫຼືອຢູ່ມູນຄ່າ 422 ລ້ານໂດລາ, ເຊິ່ງລາວ ແລະ ພັນລະຍາຈະແບ່ງກັບໝູ່ຄົນນຶ່ງນັ້ນ, ກໍໄດ້ປ່ຽນຊີວິດຂອງເຂົາເຈົ້າ. ເຂົາເຈົ້າຍັງໄດ້ສົ່ງເສີມການຮັບຮູ້ ກ່ຽວກັບ ຄົນ ອິວ ມຽນ, ເຊິ່ງແມ່ນກຸ່ມຊົນເຜົ່າຈາກເອເຊຍຕາເວັນອອກສຽງໃຕ້ ທີ່ມີຕົ້ນກຳເນີດມາຈາກ ຈີນ, ເຊິ່ງຫຼາຍຄົນໄດ້ຫຼົບໜີຈາກ ລາວ ໄປ ໄທ ແລ້ວກໍມາຕັ້ງຖິ່ນຖານຢູ່ໃນ ສະຫະລັດ ລຸນຫຼັງສົງຄາມ ຫວຽດນາມ.
ທ້າວ ແຊ້ພານ ໄດ້ກ່າວໃນກອງປະຊຸມຖະແຫຼງຂ່າວ ໃນວັນຈັນ ມື້ກ່ອນນີ້ ຢູ່ສຳນັກງານໃຫຍ່ຫວຍລັດ ອໍເຣກອນ, ບ່ອນທີ່ຊື່ຂອງລາວ ໃນຖານະເປັນຜູ້ໄດ້ຊະນະລາງວັນໃຫຍ່ ໄດ້ຖືກເປີດເຜີຍ ຊຶ່ງລາວໄດ້ກ່າວວ່າ “ຂ້ອຍເກີດໃນປະເທດ ລາວ, ແຕ່ຂ້ອຍບໍ່ແມ່ນຄົນລາວ. ຂ້ອຍແມ່ນຄົນ ອິວ ມຽນ.”
ໃນລະຫວ່າງສົງຄາມ ຫວຽດນາມ, ອົງການສືບລັບ ຫຼື CIA ແລະ ກອງທັບ ສະຫະລັດ ໄດ້ເກນເອົາຊາວ ອິວ ມຽນ ໃນປະເທດ ລາວ ທີ່ຢູ່ໃກ້ຄຽງ, ເຊິ່ງ ຫຼາຍຄົນແມ່ນຊາວນາ, ເພື່ອເຂົ້າຮ່ວມໃນສົງຄາມກອງໂຈນ ແລະ ເພື່ອສະໜອງຂໍ້ມູນລັບ ແລະ ການສືບລັບເພື່ອທຳລາຍເສັ້ນທາງ ໂຮ ຈິ ມິ່ນ ທີ່ຊາວ ຫວຽດນາມເໜືອ ໄດ້ໃຊ້ເພື່ອສົ່ງກອງທະຫານ ແລະ ອາວຸດຍຸດໂທປະກອນຜ່ານລາວ ແລະ ກຳປູເຈຍ ເຂົ້າໄປໃນ ຫວຽດນາມໃຕ້.
ຫຼັງຈາກຄວາມຂັດແຍ້ງດັ່ງກ່າວ ເຊັ່ນດຽວກັບສົງຄາມກາງເມືອງໃນລາວ, ເວລາທີ່ລັດຖະບານລາວ ທີ່ໄດ້ຮັບການສະໜັບສະໜູນໂດຍ ສະຫະລັດ ຖືກໂຄ່ນລົ້ມໃນປີ 1975, ພວກເຂົາຫຼາຍພັນຄົນ ໄດ້ພາກັນຫຼົບໜີເພື່ອຫຼີກລ່ຽງການແກ້ແຄ້ນຈາກລັດຖະບານຄອມມູນິສໃໝ່, ໂດຍຫຼົບໜີດ້ວຍການຍ່າງຜ່ານປ່າ ແລ້ວຂ້າມແມ່ນ້ຳຂອງເຂົ້າໄປໃນ ໄທ, ອີງຕາມປະຫວັດສາດທີ່ຂຽນລົງໃນເວັບໄຊ້ຂອງຊຸມຊົນ ອິວ ມຽນ ໃນນະຄອນ ຊາຄຣາເມັນໂຕ, ລັດ ຄາລິຟໍເນຍ. ປະຊາກອນ ອິວ ມຽນ ຫຼາຍກວ່າ 70 ເປີເຊັນໃນລາວ ໄດ້ຫຼົບໜີ ແລະ ຫຼາຍຄົນໄດ້ໄປຕົກຢູ່ສູນອົບພະຍົບໃນ ໄທ.