ເຈົ້າໜ້າທີ່ໄທໄດ້ປະກາດຂ່າວ ການຈັບກຸມຊາຍສີ່ຄົນ ທີ່ເຊື່ອກັນ
ວ່າ ກ່ຽວຂ້ອງກັບຕາໜ່າງໜຶ່ງທີ່ຮັບຜິດຊອບ ໃນການລັກລອບຄ້າ
ມະນຸດ ຫລາຍສິບຄົນຜ່ານປະເທດໄທ ໃນໄລຍະຫລາຍໆປີຜ່ານ
ມາໄວໆນີ້. ໃນພວກທີ່ຖືກຈັບກຸມ ມີຄົນໄທ 3 ຄົນ ທີ່ເປັນເຈົ້າໜ້າທີ່
ອຳເພີເມືອງສະເດົາ ເຂດຊົນນະບົດຕິດກັບຊາຍແດນມາເລເຊຍ
ບ່ອນທີ່ເຈົ້າໜ້າທີ່ໄດ້ພົບເຫັນຂຸມຝັງສົບໝູ່ ທີ່ມີ 26 ສົບຢູ່ໃນນັ້ນ
ເມື່ອອາທິດແລ້ວນີ້. ສ່ວນຄົນທີ 4 ທີ່ຖືກຈັບແມ່ນຜູ້ຊາຍເຜົ່າໂຣຮິງ
ຢາຈາກມຽນມາຄົນໜຶ່ງ. Steve Sandford ມີລາຍງານ ຊຶ່ງດາຣາ
ຈະນຳມາສະເໜີທ່ານ.
Your browser doesn’t support HTML5
ຟັງລາຍງານ ກ່ຽວກັບ ບັນຫາການຄ້າມະນຸດ ໃນໄທ
ເຈົ້າໜ້າທີ່ໄທກ່າວເມື່ອວັນອັງຄານຜ່ານມານີ້ວ່າ ນອກຈາກຈັບກຸມ 4 ຄົນນັ້ນແລ້ວ ເຂົາເຈົ້າ
ຍັງໄດ້ພົບເຫັນ ອັນທີ່ສົງໄສກັນວ່າ ເປັນຄ້າຍຂອງພວກຄ້າມະນຸດ ຢ່າງນ້ອຍອີກແຫ່ງໜຶ່ງ
ຢູ່ໃກ້ກັບຊາຍແດນມາເລເຊຍ ພ້ອມກັບອັນທີ່ເບິ່ງຄືວ່າເປັນຂຸມຝັງສົບ ອີກ 5 ຂຸມ.
ຢູ່ວໍຊິງຕັນ ບັນດາເຈົ້າໜ້າທີ່ສະຫະລັດໄດ້ຮຽກຮ້ອງໃຫ້ມີການສືບສວນ ໂດຍໄວແລະຢ່າງ
ໜ້າເຊື່ອຖືໄດ້ ກ່ຽວກັບການຕາຍຂອງພວກຄົນເຫລົ່ານັ້ນ ຊຶ່ງເຊື່ອກັນວ່າ ສ່ວນໃຫຍ່ແມ່ນ
ເປັນຊາວມຸສລິມໂຣຮິງຢາຈາກມຽນມາ.
ເມື່ອຫລາຍໆປີຜ່ານມານີ້ ຊາວໂຣຮິງຢາໄດ້ພາກັນຫລົບໜີການປະຫັດປະຫານ ໃນປະເທດ
ມຽນມາ ໂດຍສ່ຽງເດີນທາງມາທາງທະເລທີ່ຍາວນານແລະອັນຕະລາຍນັ້ນ. ບັນດາກຸ່ມສິດທິ
ມະນຸດກ່າວວ່າ ເຈົ້າໜ້າທີ່ໄທບໍ່ໄດ້ເຮັດຫຍັງພໍປານໃດ ເພື່ອຢຸດພວກຄ້າມະນຸດ ບໍ່ໃຫ້ຈັບພວກອົບພະຍົບ ແລະກັກຕົວເຂົາເຈົ້າໄວ້ ເພື່ອຮຽກຄ່າໄຖ່ນັ້ນ.
ທ່ານ Phil Robertson ເປັນຮອງຜູ້ອຳນວຍການພະແນກເອເຊຍ ຂອງກຸ່ມສິ້ງຊອມສິດທິມະນຸດ Human Rights Watch.
ທ່ານ Phil Robertson ກ່າວວ່າ “ຄວາມຈິງແລ້ວ ພວກຄ້າຍກັກກັນເຫລົ່ານັ້ນ
ແມ່ນຫ້ອມລ້ອມດ້ວຍພວກເຈົ້າໜ້າທີ່ ແລະຊຸມຊົນທ້ອງຖິ່ນ ທີ່ເອົາເງິນຈາກ
ພວກຄ້າມະນຸດ ແລະຢູ່ໃນຂັ້ນສູງກ່ວາຂຶ້ນໄປ ເຊັ່ນໃນຂັ້ນແຂວງນັ້ນ ພວກເຈົ້າ
ໜ້າທີ່ກໍແມ່ນອ່ວາຍໜ້າໜີ ເຮັດຄືບໍ່ຮູ້ບໍ່ເຫັນ.”
ຕຳຫລວດໄທວັດແທກຂຸມຝັງສົບຕື້ນໆ ທີ່ພົບເຫັນໃນຈັງຫວັດສົງຂະຫລາ, ວັນທີ 2 ພືດສະພາ 2015.
ໃນການເຄື່ອນໄຫວຕອບຕໍ່ການສໍ້ລາດບັງຫລວງຢ່າງແຜ່
ຫລາຍນັ້ນ ບັນດາພົນລະເຮືອນທີ່ຈົນຕາແຈ ໄດ້ພາກັນຈັດ
ຕັ້ງໜ່ວຍທະຫານບ້ານລາດຕະເວນຂຶ້ນ ເພື່ອຂັບໄລ່ພວກຄ້າ
ມະນຸດອອກໄປຈາກໝູ່ບ້ານຂອງພວກເຂົາເຈົ້າ ຊຶ່ງຫລາຍໆ
ໝູ່ບ້ານແມ່ນຕັ້ງຢູ່ຫ່າງໄກ ພຽງບໍ່ເທົ່າໃດຫລັກ ຈາກຊາຍຫາດ
ທີ່ພວກນັກທ່ອງທ່ຽວນິຍົມກັນໄປຫລິ້ນ.
ໂດຍໄດ້ຮັບອະນຸຍາດຈາກລັດຖະບານ ໜ່ວຍລາດຕະເວນ
ເຫລົ່ານີ້ໄດ້ປະສົບຜົນສຳເລັດໃນບາງລະດັບ ໃນການຊ່ວຍ
ເຫລືອຊາວອົບພະຍົບກຸ່ມນ້ອຍໆ ຊື່ງສ່ວນໃຫຍ່ແມ່ນຊາວ
ໂຣຮິງຢາ ແຕ່ວ່າປະສົບປະການຂອງເຂົາເຈົ້າສະແດງໃຫ້ເຫັນການທ້າທາຍອັນໃຫຍ່
ຫລວງ ໃນການຕໍ່ຕ້ານພວກແກ໊ງຄ້າມະນຸດ ທີ່ຝັງຮາກເລິກ ມີມານານແລ້ວນັ້ນ.
ເຊີດຊາຍ ປະພັດທະມາຢຸດທະນົນ ເປັນຫົວໜ້າໜ່ວຍທະຫານບ້ານລາດຕະເວນ.
ລາວເວົ້າວ່າ “ພວກ ເຮົາບໍ່ສາມາດຢຸດການຄ້າມະນຸດໄດ້ດອກ ແຕ່ຢ່າງນ້ອຍ
ກໍເຮັດໃຫ້ມັນຊັກຊ້າລົງ. ມັນບໍ່ຄືກັນກັບເມື່ອກ່ອນ. ແຕ່ກ່ອນນັ້ນ ພວກນາຍໜ້າ
ຈະຂົນຍ້າຍ ພວກຊາວໂຣຮິງຢາໄປ ເທື່ອລະ 40 ຫລື 50 ຄົນ ແຕ່ດຽວນີ້ ພວກ
ເຂົາຈະແບ່ງອອກເປັນກຸ່ມນ້ອຍໆ ເທື່ອລ່ະ ປະມານ 10 ຫລື 20 ຄົນ ຊື່ງເຮັດ
ໃຫ້ຈັບພວກເຂົາໄດ້ຍາກຂຶ້ນ.”
ຕຳຫລວດຊາຍແດນໄທຄົນໜຶ່ງ ທັບມ້າງຄ້າຍກັກກັນຮ້າງແຫ່ງໜຶ່ງ ຂອງພວກຄ້າມະນຸດ ທີ່ຈັງຫວັດສົງຂະຫລາ ໃກ້ຊາຍແດນໄທ-ມາເລເຊຍ, ວັນທີ 5 ພຶດສະພາ 2015.
ພວກເຫຍື່ອການຄ້າມະນຸດທີ່ຖືກຊ່ວຍມາໄດ້ ເລົ່າໃຫ້ຟັງເຖິງ
ເລື້ອງລາວຂອງການລໍຖ້າເປັນເວລາດົນນານ ຢູ່ໃນເຮືອທີ່
ລ່ອງລອຍຢູ່ນອກຝັ່ງທະເລໄທ ເພາະວ່າພວກຄ້າມະນຸດຕ້ອງ
ໄດ້ກະເວລາໃຫ້ຄັກແນ່ ກ່ອນຈະພາເຂົາເຈົ້າຂຶ້ນຝັ່ງ ເພື່ອຫລີກ
ລ່ຽງການຖືກຈັບ.
ຢູ່ບ່ອນພັກເຊົາແຫ່ງໜຶ່ງໃກ້ໆກັບ ພູເກັດ ບ່ອນນັກທ່ອງທ່ຽວ
ນິຍົມກັນໄປທ່ຽວນັ້ນ ເດັກຊາຍຊາວໂຣຮິງຢາ ໄວ 11 ປີ ຊື່
Nay Zomo Ding ເລົ່າເລື້ອງສູ່ນັກຂ່າວຂອງເຮົາຟັງ.
“ຂ້ອຍທໍລະມານຢູ່ໃນເຮືອເປັນເວລາໜຶ່ງເດືອນ ກ່ອນພວກ
ເຮົາຈະມາຮອດພູເຂົາ. ຕອນຢູ່ໃນເຮືອນັ້ນ ພວກນາຍໜ້າເອົາປາຢູ່ໃນກະປ໋ອງ
ໃຫ້ຂ້ອຍກິນ ຂ້ອຍກິນບໍ່ລົງ ເພາະຂ້ອຍປວດຮາກ. ຂ້ອຍເຫັນຜູ້ຊາຍສອງຄົນ
ຖືກພວກນາຍໜ້າຍິງຕາຍ ແລະຂ້ອຍເຫັນອີກຄົນໜຶ່ງນອນຕາຍຢູ່ເທິງເຮືອ.”
ເມື່ອປີກາຍນີ້ ເຈົ້າໜ້າທີ່ສະຫະລັດໄດ້ຫລຸດລະດັບປະເທດໄທ ລົງສູ່ຂີດຕ່ຳສຸດ ສຳຫລັບ
ຄວາມພະຍາຍາມຂອງໄທໃນການຕໍ່ສູ້ກັບການຄ້າມະນຸດນັ້ນ. ແຕ່ວ່າການຄົ້ນພົບຫລ້າ
ສຸດນີ້ ຊີ້ໃຫ້ເຫັນວ່າ ບັນຫາແມ່ນອາດຮ້າຍແຮງ ຫລາຍກ່ວາພວກເຈົ້າໜ້າທີ່ຢ້ານກັນຊ້ຳ.