ບັນດາພະນັກງານກູ້ໄພໃນມາເລເຊຍພວມດິ້ນຮົນ ເພື່ອຈະ
ເຂົ້າໄປໃຫ້ເຖິງຫຼາຍພັນຄົນ ທີ່ໄດ້ຮັບຜົນກະທົບຈາກໄພ
ນ້ຳຖ້ວມອັນຮ້າຍແຮງທີ່ສຸດຂອງປະເທດ ໃນຮອບຫຼາຍໆ
ທົດສະວັດ ເພື່ອນຳເອົາເຂົ້າປາອາຫານ ແລະການຊ່ວຍ
ເຫລືອດ້ານການແພດ ໄປໃຫ້.
ມາຮອດວັນອາທິດມື້ນີ້ ຫຼາຍກວ່າ 160,000 ຄົນ ຕ້ອງໄດ້
ຍົກຍ້າຍອອກຈາກບ້ານເຮືອນ ຍ້ອນລະດັບນ້ຳທີ່ສູງຂຶ້ນ
ເລື້ອຍໆ ແລະໄດ້ຖ້ວມຢ່າງນ້ອຍ 8 ລັດແລ້ວ.
ນາຍົກລັດຖະມົນຕີມາເລເຊຍ ທ່ານ Najib Razak ທີ່ໄດ້ຕັດ
ເວລາການພັກຜ່ອນ ຢູ່ລັດຮາວາຍລົງ ເພື່ອກັບຄືນເມືອ ນຳພາການຮັບມືກັບໄພນ້ຳຖ້ວມ
ແຫ່ງຊາດ ໄດ້ໄປຢ້ຽມຢາມລັດ Kelantan ທີ່ໄດ້ຮັບຜົນກະທົບໜັກກວ່າໝູ່ ເມື່ອວັນເສົາ
ວານນີ້ ແລະໄດ້ຮັບແຈ້ງໃຫ້ຊາບໂດຍສັງເຂບ ກ່ຽວກັບສະຖານະການ ທີ່ກຳລັງຮ້າຍແຮງ
ຂຶ້ນຕື່ມອີກນັ້ນ.
ຜູ້ນຳມາເລເຊຍ ໄດ້ປະກາດໃຫ້ທຶນບັນເທົາທຸກແກ່ຜູ້ປະສົບໄພນ້ຳຖ້ວມໃນທົ່ວປະເທດ
ມູນຄ່າຫລາຍລ້ານດອລລ່າ ຊຶ່ງຈະບໍລິຫານງານ ໂດຍຄະນະຄວາມໝັ້ນຄົງແຫ່ງຊາດ.
ອັນນັ້ນເປັນການຊ່ວຍເຫຼືອຊຸດເພີ້ມເຕີມ ຈາກການປະກາດກ່ອນໜ້ານີ້ໄປແລ້ວ.
ທ່ານ Najib ໄດ້ຖືກຕຳນິຕິຕຽນຢ່າງໜັກ ໃນອາທິດແລ້ວນີ້ ຫຼັງຈາກມີຮູບພາບເຜີຍແຜ່
ອອກມາ ທີ່ສະແດງໃຫ້ເຫັນ ທ່ານກຳລັງຕີກອຟ ກັບປະທານາທິບໍດີສະຫະລັດ ທ່ານບາຣັກ ໂອບາມາ ຢູ່ທີ່ລັດຮາວາຍ. ຫຼາຍໆຄົນໄດ້ພາກັນຂຽນຄຳເຫັນລົງ ໜ້າ Facebook ຂອງທ່ານ ຮຽກຮ້ອງໃຫ້ທ່ານ ກັບຄືນປະເທດ ຍ້ອນວ່ານ້ຳຖ້ວມກຳລັງ ຮ້າຍແຮງຂຶ້ນ ນັ້ນ.
ບັນດານັກພະຍາກອນອາກາດມາເລເຊຍ ກ່າວວ່າ ຈະຍັງສືບຕໍ່ມີຝົນຕົກໜັກຢູ່ອີກ ໃນ
ສອງສາມມື້ຂ້າງໜ້ານີ້ ຊຶ່ງຈະແຜ່ລາມອອກໄປໃສ່ລັດຕ່າງໆ ທາງພາກໃຕ້ ທີ່ກ່ອນໜ້ານີ້
ຍັງບໍ່ໄດ້ຮັບຜົນກະທົບເທື່ອ.
ຫລາຍໆປະເທດເພື່ອນບ້ານຂອງມາເລເຊຍ ກໍໄດ້ປະສົບກັບບັນຫານ້ຳຖ້ວມຢ່າງຮ້າຍແຮງ ເຊັ່ນກັນ.
Your browser doesn’t support HTML5
MALAYSIA FLOODS VO