ປະທານາທິບໍດີຝຣັ່ງ ທ່ານເອມມານູຍແອລ ມາກຣົງ ກ່າວໃນວັນພຸດ ວານນີ້ວ່າ ທ່ານ
ເຊື່ອວ່າ ປະທານາທິບໍດີສະຫະລັດ ທ່ານດໍໂນລ ທຣຳຈະໃຫ້ສະຫະລັດຖອນໂຕອອກ ຈາກຂໍ້ຕົກລົງນິວເຄລຍ ກັບອີຣ່ານ ທີ່ໃຫ້ລັດຖະບານເຕຫະຣ່ານ ຈຳກັດການພັດທະ ນາອາວຸດນິວເຄລຍນັ້ນ.
ທ່ານມາກຣົງ ໄດ້ກ່າວຢູ່ໃນກອງປະຊຸມຖະແຫລງຂ່າວ ໃນຕອນປິດທ້າຍ ການຢ້ຽມ
ຢາມສະຫະລັດ ຢ່າງເປັນທາງການເປັນເວລາ 3 ວັນນັ້ນວ່າ "ຂ້າພະເຈົ້າບໍ່ຮູ້ວ່າ ປະ
ຊາຊົນອາເມຣິກັນຈະຕັດສິນໃຈແບບໃດ ແຕ່ອີງຕາມການວິເຄາະ ທຸກຖ້ອຍຄໍາຂອງ
ປະທານາທິບໍດີທຣໍາ ບໍ່ໄດ້ເຮັດໃຫ້ຂ້າພະເຈົ້າເຊື່ອໄດ້ເລີຍວ່າ ທ່ານຈະເຮັດທຸກສິ່ງ ທຸກ
ຢ່າງເທົ່າທີ່ເຮັດໄດ້ ເພື່ອຈະສືບຕໍ່ ຢູ່ໃນຂໍ້ຕົກລົງ JCPOA ຊຶ່ງເປັນຂໍ້ຕົກລົງນິວເຄລຍ
ກັບອີຣ່ານນັ້ນ."
ທ. ເອມມານູຍແອລ ມາກຣົງກ່າວຄຳປາໄສຕໍ່ລັດຖະສະພາ ສຫລ ຄົບຄະນະໃນວັນທີ 25 ເມສາ 2018
ເມື່ອຖືກຖາມວ່າ ການຕັດສິນໃຈເຊັ່ນນັ້ນຈະເປັນການສະແດງໃຫ້ເຫັນເຖິງຄວາມຫລົ້ມ
ແຫລວຂອງສ່ວນຕົວບຸກຄົນຫລືບໍ່ນັ້ນ ທ່ານມາກຣົງ ເວົ້າວ່າ ບົດບາດຂອງທ່ານ ບໍ່ແມ່ນ
ເພື່ອໂນ້ມນ້າວໃຈທ່ານທຣໍາໃຫ້ "ຍ່າງຫັນຫລັງໃຫ້ຄໍາໝັ້ນ ໝາຍທີ່ທ່ານໄດ້ໃຫ້ໄວ້ ໃນ
ເວລາໂຄສະນາຫາສຽງດອກ, ແຕ່ກົງກັນຂ້າມ ຢາກໃຫ້ທ່ານພິສູດໃຫ້ຄົນຮູ້ວ່າ ຂໍ້ຕົກລົງ
ດັ່ງກ່າວກໍດີຢູ່.”
ກ່ອນໜ້ານັ້ນໃນວັນພຸດວານນີ້ ທ່ານມາກຣົງໄດ້ປະກາດໃນຄຳປາໄສຕໍ່ລັດຖະສະພາ
ຄົບຄະນະເປັນເວລາຍາວ 49 ນາທີວ່າ “ອີຣ່ານບໍ່ຄວນມີອາວຸດນີວເຄລຍ ຢູ່ໃນຄວາມ
ຄອບຄອງຈັກເທື່ອເລີຍ, ບໍ່ຄວນມີໃນ 5 ປີ, ໃນ 10 ປີ ຕໍ່ໜ້ານີ້, ບໍ່ຄວນມີເລີຍ.”
ທ່ານທຣໍາມີກໍານົດທີ່ຈະຕັດສິນໃຈວ່າ ຈະໃຫ້ການຍົກເລີກການລົງໂທດຕໍ່ອີຣ່ານ ອີກຕໍ່
ໄປຫລືບໍ່ໃນເດືອນໜ້ານີ້. ຂໍ້ຕົກລົງດັ່ງກ່າວໄດ້ຍົກເລີກການລົງໂທດແກ່ເຕ ຫະຣ່ານເພື່ອ
ເປັນການແລກປ່ຽນກັບການຈໍາກັດການພັດທະນາອາວຸດນິວເຄລຍຂອງປະເທດນັ້ນ.
ປະທານາທິບໍດີສະຫະລັດເອີ້ນຂໍ້ຕົກລົງດັ່ງກ່າວວ່າ “ບໍ່ສົມເຫດສົມຜົນ” ແລະ "ເປັນຕາ
ຢາກຫົວ" ແລະທ່ານກໍໄດ້ນາບຂູ່ວ່າ ຈະຖອນຕົວອອກຈາກຂໍ້ຕົກລົງດັ່ງກ່າວນັ້ນ.
ປ. ມາກຣົງ ເດ່ມືໄປຈັບ ປ. ທຣໍາ ໃນຂະນະທີ່ທ່ານກ່າວຢູ່ໃນກອງປະຊຸມຖະແຫລງຂ່າວຮ່ວມກັນ ຢູ່ທໍານຽບຂາວ ໃນວັນທີ 24 ເມສາ, 2018
ກົງກັນຂ້າມ ທ່ານມາກຣົງ ກັບໄດ້ຮຽກຮ້ອງໃຫ້ມີການເຈລະຈາຂໍ້ຕົກລົງຄັ້ງໃໝ່ກັບອີຣ່ານ
ອີກ ກ່ຽວກັບການທົດລອງລູກສອນໄປ ຂີປະນາວຸດຂອງເຕຫະຣ່ານ ແລະການທີ່ປະເທດ
ດັ່ງກ່າວເຂົ້າໄປກ່ຽວຂ້ອງທາງທະຫານຢູ່ໃນຊີເຣຍ, ເຢເມນ,ເລບານອນ ແລະອີຣັກນັ້ນ.
ສະມາຊິກຈາກທັງສອງພັກຢູ່ໃນລັດຖະສະພາໄດ້ຊົມເຊີຍໃນທັນທີທັນໃດໃນຂະນະທີ່ທ່ານ
ມາກຣົງໄດ້ກ່າວຍົກຍ້ອງປະຫວັດຂອງສະຫະລັດໃນເລື່ອງສົ່ງເສີມການພົວພັນຫລາຍຝ່າຍ
ໂດຍໄດ້ເວົ້າວ່າ ຢູໂຣບແລະສະຫະລັດຕ້ອງໄດ້ຕໍ່ສູ້ຮ່ວມກັນກັບ “ໄພຂົ່ມຂູ່ແລະບັນຫາທ້າ
ທາຍໃໝ່” ຂອງສັດຕະວັດທີ 21 ນີ້.
ທ່ານມາກຣົງຈັບມືກັບບນດາສະມາຊິກສະພາ ພາຍຫລັງກອງປະຊຸມຖະແຫລງຂ່າວ ຢູ່ໃນຕຶກຫ້ອງການ ລັດຖະສະພາ ສຫລ ໃນວັນທີ 25 ເມສາ 2018