ລົດຕູ້ຄັນນຶ່ງໄດ້ຕຳກັບພວກຜູ້ຄົນຍ່າງຂ້າມຖະໜົນ ຢູ່ນອກວັດສາສະໜາອິສລາມທີ່
ນະຄອນລອນດອນປະເທດອັງກິດ ໃນເຊົ້າວັນຈັນວານນີ້ ເຮັດໃຫ້ມີ 10 ໄດ້ຮັບບາດເຈັບ
ຊຶ່ງນາຍົກ ລັດຖະມົນຕີ ທ່ານນາງ Theresa May ໄດ້ເອີ້ນການກະທຳນີ້ວ່າ “ເປັນການ
ໂຈມຕີກໍ່ການຮ້າຍ ທີ່ປ່າເຖື່ອນ ຕໍ່ຊາວມຸສລິມ.”
ລົດຕູ້ທີ່ວ່ານີ້ ແມ່ນແລ່ນພຸ່ງໃສ່ຜູ້ຄົນ ບໍ່ດົນຫຼັງຈາກທີ່ພວກເຂົາເຈົ້າ ໄດ້ກັບອອກມາຈາກ
ການພາວະນາ ໃນຕອນກາງຄືນ ທີ່ວັດມຸສລິມ Welfare House ແລະໃກ້ໆກັບວັດ
Finsbury Park ທາງພາກເໜືອຂອງນະຄອນລອນດອນ ຊຶ່ງເປັນນຶ່ງຂອງວັດອິສລາມ
ທີ່ີໃຫຍ່ທີ່ສຸດ ໃນອັງກິດ.
ມີຜູ້ເສຍຊີວິດຄາທີ່ນຶ່ງຄົນ ແຕ່ຍັງບໍ່ທັນເປັນທີ່ຈະແຈ້ງເທື່ອວ່າ ລາວເສຍຊີວິດ
ຍ້ອນສາເຫດຈາກການໂຈມຕີຫລືຈາກສິ່ງອື່ນກັນແທ້.
ຕຳຫຼວດຈະຊັ່ງຊາເບິ່ງເລື່ອງຄວາມປອດໄພ ຕໍ່ວັດດັ່ງກ່າວ ແລະໃຫ້ການຊ່ອຍເຫຼືອທີ່
ຈຳເປັນ ກ່ອນໜ້າການສະຫຼອງ ທີ່ເປັນສັນຍາລັກຂອງການສິ້ນສຸດລົງຂອງເດືອນສັກສິດ Ramadan ຊຶ່ງທ່ານນາງ May ໄດ້ກ່າວປະກາດອອກໄປນັ້ນ.
ໂບດສາສະໜາອິສລາມ Finsbury Park, London
“ນີ້ແມ່ນການໂຈມຕີ ຕໍ່ຊາວມຸສລິມ ຊຶ່ງໃກ້ໆກັບສະຖານທີ່ທາງສະສະໜາທີ່ພວກເຂົາ
ເຈົ້າໄປສັກກາລະນັ້ນ,” ຊຶ່ງນັ້ນແມ່ນຄຳເວົ້າຂອງທ່ານນາງ May ທີ່ກ່າວຕໍ່ປະຊາຊົນ
ຜ່ານທາງໂທ ລະພາບ ແລະທ່ານນາງຍັງກ່າວຕື່ມວ່າ “ແລະຄືກັນກັບການກໍ່ການຮ້າຍ
ອື່ນໆ, ບໍ່ວ່າໃນຮູບໃດກໍຕາມແຕ່, ມັນມີຈຸດປະສົງແບບດຽວກັນ. ມັນຕ້ອງການທີ່
ຈະແບ່ງແຍກພວກເຮົາອອກຈາກກັນ ແລະທຳລາຍສາຍພົວພັນອັນໝັ້ນຄົງ ຄວາມ
ເປັນນ້ຳນຶ່ງໃຈດຽວກັນແລະປະຊາຊົນ ທີ່ມີຮ່ວມກັນໃນປະເທດນີ້. ພວກເຮົາຈະບໍ່
ເຮັດໃຫ້ສິ່ງນີ້ເກີດຂຶ້ນ.”
ເຈົ້າຄອງນະຄອນລອນດອນ ທ່ານ Sadiq Khan ໄດ້ເອີ້ນເຫດຮ້າຍດັ່ງກ່າວວ່າ
“ນີ້ແມ່ນການກໍ່ການຮ້າຍທີ່ໂຫດຮ້າຍປ່າເຖື່ອນ ຕໍ່ປະເທດຂອງພວກເຮົາ.”
ເຈົ້າໜ້າທີ່ກ່າວວ່າ ຕົນໄດ້ຈັບກຸມຄົນຂັບລົດຕູ້ ໄວ 48 ປີ ຜູ້ຊຶ່ງໄດ້ຖືກຄຸມຕົວ
ໂດຍປະຊາຊົນໃນບ່ອນທີ່ເກີດເຫດ.
ຮອງຜູ້ບັນຊາການຕຳຫຼວດ ທ່ານ Neil Basu ທີ່ເປັນຜູ້ປະງານຂັ້ນອາວຸໂສ ໃນການກໍ່
ການຮ້າຍ ໄດ້ກ່າວວ່າ ເບິ່ງຄືວ່າ ຄົນຂັບທີ່ວ່ານີ້ ໄດ້ກະທຳຜູ້ດຽວຕາມລຳພັງ. ທ່ານໄດ້
ກ່າວສັນລະເສີນພວກທີ່ຈັບກຸມຊາຍຄົນນີ້ໄວ້ ໂດຍເອີ້ນວ່າ ເປັນທີ່ໜ້າຍົກຍ້ອງ.
ອ່ານຂ່າວນີ້ເພີ້ມຕື່ມເປັນພາສາອັງກິດ
ຕຳຫຼວດ ລາດຕະເວັນ ທີ່ຖະໜົນ Fonthillໃກ້ໆກັບສະຖານີ Finsbury Park ຫຼັງຈາກເຫດລົດຕູ້ແລ່ນຕຳຜູ້ຄົນ ໃນພາກເໜືອຂອງລອນດອນ, 19 ມິຖຸນາ , 2017.