ລັດຖະບານຜູ້ນໍາລີເບຍ ທ່ານກາດດາຟີ ຂົ່ມຂູ່ຈະປະຫານຊີວິດພົນລະເມືອງຄົນໃດກໍຕາມ
ທີ່ພົບເຫັນວ່າໃຊ້ໂທລະສັບດາວທຽມ ໂດຍບໍ່ໄດ້ຮັບອະນຸຍດຈາກລັດຖະບານ.
ລາຍງານສື່ມວນຊົນແຫ່ງລັດກ່າວວ່າ ການປາບປາມທີ່ວ່ານີ້ມີວັດຖຸປະສົງເພື່ອຫ້າມບໍ່ໃຫ້ປະຊາຊົນໃຊ້ໂທລະສັບ ເພື່ອຊ່ອຍກຸ່ມເນໂຕ້ນັ້ນ.ພັນທະມິດເນໂຕ້ໄດ້ແນເປົ້າໝາຍໃສ່ທີ່ໝັ້ນແຫ່ງຕ່າງໆຂອງລັດຖະບານໃນການຖິ້ມລະເບີດໂຈມຕີລີເບຍນັ້ນ.
ອົງການຂ່າວ JANA ອ້າງຄໍາເວົ້າຂອງພວກເຈົ້າໜ້າທີ່ທີ່ເວົ້າວ່າ ການໃຊ້ໂທລະສັບໂດຍບໍ່ໄດ້ຮັບອະນຸຍາດນັ້ນຖືເປັນການທໍລະຍົດຕໍ່ຊາດ. ລາຍງານຂ່າວເວົ້າວ່າ ພວກສາຍລັບໄດ້ພາກັນໃຊ້ໂທລະສັບດາວທຽມເພື່ອສົ່ງຂ່າວຂໍ້ມູນໃຫ້ກຸ່ມເນໂຕ້ ທີ່ກຸ່ມເນໂຕ້ໄດ້ໃຊ້ຂ່າວຂໍ້ມູນດັ່ງກ່າວເພື່ອທໍາການຖິ້ມລະເບີດໂຈມຕີທີ່ໄດ້ສັງຫານພວກພົນລະເຮືອນທີ່ບໍ່ມີຄວາມຜິດໃດໆໄປຈໍານວນນຶ່ງນັ້ນ.
ໃນວັນອັງຄານຜ່ານມານີ້ ລັດຖະບານໄດ້ກ່າວຫາກຸ່ມເນໂຕ້ວ່າທໍາການສັງຫານປະຊາຊົນ 85 ຄົນໃນໝູ່ບ້ານແຫ່ງນຶ່ງໃກ້ໆກັບເມືອງ Zlitan ໃນພາກຕາເວັນຕົກຂອງປະເທດ. ກຸ່ມເນໂຕ້ກ່າວວ່າ ພວກເຮືອບິນລົບ
ຂອງຕົນໄດ້ໂຈມຕີເປົ້າໝາຍຕ່າງໆໃນເຂດເມືອງ Zlitan ໃນວັນຈັນ ແຕ່ປະຕິເສດຕໍ່ຫລັກຖານກ່ຽວກັບຄວາມເສຍຫາຍຜູ້ບາດເຈັບລົ້ມຕາຍພວກພົນລະເຮືອນັ້ນ.
ປະຊາຊົນລີເບຍຫລາຍຄົນພາກັນອາໄສກາງຕໍ່ພວກໂທລະສັບດາວທຽມຍ້ອນການໃຫ້ການບໍລິການໂທລະສັບມືຖືນັ້ນມີຢ່າງຈໍາກັດໃນບາງພາກພື້ນຂອງປະເທດນັ້ນ.
ໃນການເຄື່ອນໄຫວນຶ່ງຕ່າງຫາກໃນວັນສຸກວານນີ້ ພວກນັກຕໍ່ສູ້ຝ່າຍຄ້ານລາຍງານວ່າໄດ້ທໍາຄວາມຄືບໜ້າໃນ 2 ດ້ານ ຊຶ່ງພວກເຂົາເຈົ້າກ່າວວ່າໄດ້ທໍາຄວາມຄືບໜ້າເຂົ້າໄປເລິກອີກໄປຫາເມືອງ Brega ເມືອງທ່າຍຸດທະສາດນໍ້າມັນ ຊຶ່ງໄດ້ປ່ຽນມືກັນຄວບຄຸມມາຫລາຍຄັ້ງນັບແຕ່ການລຸກຮືຂຶ້ນຕໍ່ຕ້ານລັດຖະບານໄດ້ເລີ້ມຂຶ້ນມາໃນເດືອນກຸມພານັ້ນ.
ແຕ່ພວກນັກຕໍ່ສູ້ຝ່າຍຄ້ານກ່າວວ່າ ຢ່າງໜ້ອຍພວກນັກຕໍ່ສູ້ຝ່າຍກະບົດໄດເສຍຊີວິດໄປ 11 ຄົນໃນເມືອງທ່າເຮືອດັ່ງກ່າວໃນລະຍະ 2 ມື້ຜ່ານມານີ້ ໃນການປະທະກັນກັບພວກກໍາລັງທີ່ຈົງຮັກພັກດີຕໍ່ລັດຖະບານທ່ານກາດດາຟີນັ້ນ.