ອິນໂດເນເຊຍ ໄດ້ກາຍເປັນບ້ານຊົ່ວຄາວສຳລັບອົບພະຍົບຫຼາຍພັນຄົນຈາກເອເຊຍ ແລະ ອາຟຣິກາ. ນົກຂ່າວວີໂອເອ ເດຟ ກຣູນໂບມ ມີລາຍງານຈາກເມືອງ ຊີຊາຣົວ, ຂອງ ອິນໂດເນເຊຍ, ກ່ຽວກັບ ໂຄງການທີ່ກຳລັງຊ່ວຍເຫຼືອຄົນຈຳນວນນຶ່ງໃນນັ້ນກະກຽມສຳລັບຊີວິດທີ່ລໍຖ້າຢູ່ໃນອະນາຄົດເຂົາເຈົ້າ.
Your browser doesn’t support HTML5
ສູນຮຽນຮູ້ໃນ ອິນໂດເນເຊຍ ກະກຽມຄວາມພ້ອມເພື່ອການຕັ້ງຖິ່ນຖານໃໝ່ໃຫ້ຊາວອົບພະຍົບ
ໃນຫ້ອງຮຽນທີ່ວ່ານີ້ໃນເມືອງ ຊີຊາຣົວ, ອິນໂດເອເຊຍ, ອົບພະຍົບໄວໜຸ່ມ 85 ຄົນໄດ້ຮຽນວິຊາຕ່າງໆນັບຈາກວິທະຍາສາດ, ອັງກິດ ແລະ ເລກ.
ບັນດານັກຮຽນທີ່ມີຄວາມເໝາະສົມທາງການສຶກສາແມ່ນສາມາດເຂົ້າຮ່ວມໂຄງການອອນໄລນ໌ ແລະ ເຮັດວຽກໄປສູ່ການໄດ້ຮັບໃບປະກາດຈົບຊັ້ນມັດທະຍົມ ສະຫະລັດໄດ້.
ມັນກຳລັງເກີດຂຶ້ນຢູ່ສູນຮຽນຮູ້ຂອງສູນອົບພະຍົບ ຊີຊາຣົວ. ສູນດັ່ງກ່າວແມ່ນພຽງ 2, 3 ຊົ່ວໂມງຂັບລົດໄປຈາກນະຄອນຫຼວງ ຈາກາຕ້າ ຂອງ ອິນໂດເນເຊຍ, ແລະ ມີອົບພະຍົບປະມານ 1,300 ຄົນ, ອີງຕາມອົງການອົບພະຍົບສະຫະປະຊາຊາດ.
ນາງ ອັຟນານ ກູລີດ ມີອາຍຸ 13 ປີເຊິ່ງຄອບຄົວຂອງລາວໄດ້ຫຼົບໜີອອກຈາກປະເທດ ໂຊມາເລຍ. ນາງໄດ້ກ່າວວ່າຄອບຄົວຂອງລາວເປັນຫ່ວງ ກ່ຽວກັບ ຄວາມຮຸນແຮງຢູ່ໃນປະເທດບ້ານເກີດຂອງເຂົາເຈົ້າ. ແຕ່ຢູ່ທີ່ນີ້, ລາວສາມາດເພັ່ງໃສ່ຄວາມຝັນຂອງລາວ.
ນາງ ອັຟນານ ກູລີ ນັກສຶກສາອົບພະຍົບຈາກ ໂຊມາເລຍ ກ່າວວ່າ “ຂ້ອຍຢາກເປັນນັກວິທະຍາສາດເວລາຂ້ອຍໃຫຍ່ຂຶ້ນ ເພາະວ່າຂ້ອຍມັນການທົດລອງ ແລະ ຄົ້ນພົບສິ່ງຕ່າງໆດ້ວຍຕົນເອງ.”
ສະຖານທີ່ດັ່ງກ່າວແມ່ນພື້ນຖານຫຼາຍ. ສູນຮຽນຮູ້ແຫ່ງນີ້ແມ່ນໄດ້ຮັບທຶນທັງໝົດຈາກການບໍລິຈາກສ່ວນຕົວ, ເຊິ່ງສ່ວນໃຫຍ່ຈາກຜູ້ບໍລິຈາກສາກົນ. ນາຍຄູທຸກຄົນແມ່ນອາສາສະໝັກ, ແລະ ອົບພະຍົບເອງ.
ພວກນັກຮຽນ ແລະ ຄອບຄົວຂອງເຂົາເຈົ້າໄດ້ຫຼົບໜີຈາກຄວາມຮຸນແຮງ ຫຼື ການປະຫັດປະຫານໃນບັນດາປະເທດໃນເອເຊຍ ແລະ ອາຟຣິກາ.
ທ່ານ ເຣຊາ ຮັສເຊນີ, ຜູ້ອຳນວຍສູນຮຽນຮູ້ ກ່າວວ່າ “ນັກຮຽນຫຼາຍຄົນມາຈາກຫຼາຍວັດທະນະທຳແຕກຕ່າງກັນ. ນັກຫຼາຍຄົນມາຈາກຫຼາຍສາສະໜາແຕກຕ່າງກັນ. ນັກຮຽກຫຼາຍຄົນມາຈາກຫຼາຍປະເທດແຕກຕ່າງກັນ. ເວລາເຂົາເຈົ້າມາທີ່ນີ້, ຂ້າພະເຈົ້າແນ່ໃຈວ່າມັນມີຄວາມຫຼາກຫຼາຍຂອງວັດທະນະຢູ່ທີ່ນີ້.”
ນາງ ຊາຣາ ຊາຄາວັດ ແມ່ນນັກຮຽນອາຍຸ 12 ປີຈາກ ອັຟການິສຖານ. ລາວເວົ້າວ່າສູນຮຽນຮູ້ນີ້ໄດ້ສ້າງຄວາມຮູ້ສຶກ ກ່ຽວກັບ ຊຸມຊົນ.
ນາງ ຊາຣາ ຊາຄາວັດ ກ່າວວ່າ “ຊຸມຊົນນີ້ແມ່ນດີຫຼາຍ ເພາະວ່າທຸກຄົນແມ່ນໃຈດີຫຼາຍ ແລະ ຮັກແພງກັນແລະກັນ.”
ອົງການອົບພະຍົບສະຫະປະຊາຊາດກ່າວວ່າ ປັດຈຸບັນນີ້, ສະຫະລັດ, ການາດາ, ອອສເຕຣເລຍ ແລະ ນິວຊີແລນ ແມ່ນກຳລັງຮັບເອົາອົບພະຍົບຜູ້ທີ່ອາໄສຢູ່ໃນ ອິນໂດເນເຊຍ ແຕ່ຂັ້ນຕອນຈະໃຊ້ເວລາຢ່າງໜ້ອຍ 7 ປີ ແລະ ການກຳນົດສະຖານທີ່ແມ່ນບໍ່ມີການຮັບປະກັນ.
ໃນຂະນະທີ່ ອິນໂດເນເຊຍ ອະນຸຍາດໃຫ້ອົບພະຍົບທີ່ຈະລົງທະບຽນຮຽນຢູ່ໂຮງຮຽນລັດນັ້ນ, ສູນຮຽນຮູ້ອົບພະຍົບ ຊີຊາຣົວ ໄດ້ສະໜອງໂອງກາດໃຫ້ນັກຮຽນຂອງເຂົາເຈົ້າເພັ່ງເລັງໃສ່ພາສາອັງກິດຂອງເຂົາເຈົ້າ ຊຶ່ງແມ່ນທັກສະທີ່ເຂົາເຈົ້າຕ້ອງການຖ້າເຂົາເຈົ້າໄດ້ໄປຕັ້ງຖິ່ນຖານໃໝ່.
ທ່ານ ເຣຊາ ຮັສເຊນີ ກ່າວວ່າ “ພວກເຮົາກຳລັງພະຍາຍາມທີ່ຈະກະກຽມເຂົາເຈົ້າສຳລັບປະເທດຕໍ່ໄປທີ່ເຂົາເຈົ້າກຳລັງຈະໄປ.”
ສູນຮຽນຮູ້ອົບພະຍົບ ຊີຊາຣົວ ໄດ້ໄຂຂຶ້ນເມື່ອນຶ່ງທົດສະວັດທີ່ຜ່ານມາ ແລະ ໄດ້ກາຍເປັນແບບຢ່າງສຳລັບໂຄງການອົບພະຍົບທີ່ຄ້າຍຄືກັນ ທີ່ໄດ້ເລີ່ມຂຶ້ນຢູ່ບ່ອນອື່ນໃນປະເທດດັ່ງກ່າວ ເພື່ອຊ່ວຍເຫຼືອອົບພະຍົບໄວໜຸ່ມກຽມພ້ອມສຳລັບອະນາຄົດ.