ຮອງນາຍົກລັດຖະມົນຕີລາວ ຊີ້ແຈງວ່າມີປະຊາຊົນຫລາຍກວ່າ 300 ຄົນທີ່ໄດ້ຮັບເຄາະຈາກລະເບີດບໍ່ທັນແຕກ UXO ໃນແຕ່ລະປີ ໂດຍກຸ່ມທີ່ໄດ້ຮັບຜົນກະຫລາຍທີ່ສຸດນັ້ນ ກໍຄືເດັກນ້ອຍແລະຊາວໄຮ່ຊາວນາ.
ຜູ້ຊາຍລາວຄົນນຶ່ງທີ່ໄດ້ຮັບເຄາະຈາກລະເບີດບໍ່ທັນແຕກ
ພົນໂທດວງໃຈ ພິຈິດ ຮອງນາຍົກລັດຖະມົນຕີ ແລະລັດຖະມົນຕີປ້ອງກັນປະເທດ ໃນຖານະປະທານ ຄະນະກຳມະການເກັບກູ້ຣະເບີດແຫ່ງຊາດລາວຖະແຫລງຍອມ ຮັບວ່າການທີ່ຍັງມີລະເບີດບໍ່ທັນແຕກ ຫລືລະເບີດ UXO ຕົກຄ້າງຢູ່ໃນລາວຢ່າງຫລວງຫລາຍໃນທຸກມື້ນີ້ ບໍ່ພຽງແຕ່ຈະເປັນອຸປສັກຕໍ່ການປະຕິບັດແຜນການພັທະນາເສດຖະກິດ ສັງຄົມໃນລາວເທົ່ານັ້ນ ຫາກແຕ່ຍັງໄດ້ສົ່ງຜົນກະທົບຕໍ່ສະພາບຊີວິດແລະຮ່າງກາຍຂອງປະຊາຊົນລາວຢ່າງກວ້າງຂວາງອີກດ້ວຍ ຊຶ່ງກໍຄືນັບຈາກປີ 1964 ເປັນຕົ້ນມາກໍປາກົດວ່າມີປະຊາຊົນລາວທີ່ໄດ້ຮັບເຄາະຈາກລະເບີດບໍ່ທັນແຕກຫລາຍທີ່ສຸດກໍຄືເດັກນ້ອຍແລະປະຊາຊົນບັນດາເຜົ່າທີ່ຢູ່ໃນເຂດຊົນນະບົດ ດັ່ງທີ່ພົນໂທດວງໃຈ ໄດ້ກ່າວເນັ້ນຍ້ຳໃນຕອນນຶ່ງວ່າ:
“ລາວເປັນປະເທດທີ່ມີຜົນກະທົບຫລາຍທີ່ສຸດຈາກລະເບີດບໍ່ມັນແຕກ ເລີ່ມແຕ່ປີ 1964 ເປັນຕົ້ນມາ ພວກເດັກນ້ອຍ ແລະປະຊາຊົນລາວບັນດາເຜົ່າໄດ້ເສຍຊີວິດ ແລະໄດ້ຮັບບາດເຈັບຈາກລະເບີດບໍ່ທັນແຕກຈຳນວນ 50,000 ຄົນ ໂດຍໃນແຕ່ລະ ປີຈະມີເດັກນ້ອຍແລະຜູ້ໃຫຍ່ຈຳນວນ 300 ຄົນໄດ້ເສຍຊີວິດ ແລະບາດເຈັບຈົນ ເຖິງປັດຈຸບັນນີ້ ລະເບີດບໍ່ທັນແຕກຍັງເປັນສິ່ງກີດຂວາງຕໍ່ການພັທະນາພື້ນຖານໂຄງລ່າງ ການພັທະນາເສດຖະກິດ ສັງຄົມ ແລະເປັນອຸບປະສັກໃຫ້ແກ່ການຈັດຕັ້ງປະຕິບັດແຜນການລົບລ້າງຄວາມທຸກຈົນໃຫ້ບັນລຸເປົ້າໝາຍໃນປີ 2020“
ການເກັບກູ້ລະເບີດບໍ່ທັນແຕກຢູ່ໃນລາວ ໃນລະຍະນັບຈາກປີ 1996 ເປັນຕົ້ນມາ ເຖິງທ້າຍປີ 2009 ນັ້ນ ກໍປາກົດວ່າສາມາດເກັບກູ້ໄດ້ພຽງແຕ່ໃນພື້ນທີ່ 195 ກິໂລເມດມົນທົນເທົ່ານັ້ນ ໃນຂະນະທີ່ມີລະເບີດບໍ່ທັນແຕກຍັງຕົກຄ້າງຢູ່ໃນດິນລາວພື້ນທີ່ກວ້າງກວ່າ 87,000 ກິໂລເມັດມົນທົນ ຫລື 1 ໃນ 3 ຂອງພື້ນທີ່ທັງໝົດຂອງປະເທດລາວ. ຍິ່ງໄປກວ່ານັ້ນ ຍັງປາກົດດ້ວຍວ່າ ໃນຈຳນວນລະເບີດທີ່ຕົກຄ້າງຢູ່ໃນລາວທີ່ເຊື່ອວ່າຍັງຢູ່ຫລາຍກວ່າ 270 ລ້ານນ່ວຍນັ້ນ ກໍຍັງເປັນລະເບີດທີ່ບໍ່ທັນແຕກຄິດເປັນ ປະລິມານທີ່ສູງເຖິງ 30 ເປີເຊັນຂອງຈຳນວນລະເບີດທັງໝົດດັ່ງກ່າວອີກດ້ວຍ.