ລັດຖະບານໄທ ກຳລັງພິຈາລະນາແຜນການເພີ່ມຄ່າຈ້າງຂັ້ນຕ່ຳເປັນ 400 ບາດຕໍ່ມື້ຄືນໃໝ່ ເພາະເຫັນວ່າຈະສົ່ງຜົນກະທົບຢ່າງຮ້າຍແຮງຕໍ່ບັນດາວິສາຫະກິດຂະໜາດນ້ອຍ ແລະຂະໜາດກາງຂອງໄທ.
Your browser doesn’t support HTML5
ລັດຖະບານໄທ ກຳລັງທົບທວນການຂຶ້ນຄ່າຈ້າງຂັ້ນຕໍ່າ 400 ບາດ ຄືນໃໝ່
ທ່ານພິພັດ ລັດຖະກິດປະການ, ລັດຖະມົນຕີກະຊວງແຮງງານໄທ ຖະແຫຼງວ່າລັດຖະບານໄທກຳລັງພິຈາລະນາຢ່າງລະມັດລະວັງຕໍ່ແຜນການທີ່ຈະເພີ່ມຄ່າຈ້າງຂັ້ນຕ່ຳໃນເວລານີ້. ທັງນີ້ເຖິງວ່າໄດ້ຕົກລົງກັນກ່ອນໜ້ານີ້ທີ່ຈະເພີ່ມອັດຕາຄ່າຈ້າງຂັ້ນຕ່ຳໃຫ້ຄົນງານເປັນ 400 ບາດຕໍ່ມື້ ນັບແຕ່ວັນທີ 1 ຕຸລາ 2024 ເປັນຕົ້ນໄປ ແຕ່ເມື່ອຖືກຄັດຄ້ານຈາກອົງການນາຍຈ້າງແຫ່ງຊາດໄທ ດ້ວຍເຫດຜົນວ່າ ການຂຶ້ນຄ່າຈ້າງຂອງຄົນງານທັງໝົດ ລວມທັງຄົນງານລາວ. ມຽນມາ ແລະ ກໍາປູເຈຍ ທີ່ເຮັດວຽກຢ່າງຖືກຕ້ອງຕາມກົດໝາຍ ຈະສົ່ງຜົນກະທົບຢ່າງກວ້າງຂວາງຕໍ່ຜູ້ປະກອບການທີ່ຜະລິດສິນຄ້າໃນປະເທດໄທ. ໂດຍສະເພາະວິສາຫະກິດຂະໜາດນ້ອຍ ແລະ ຂະໜາດກາງ (SMEs) ທີ່ມີທຶນຈຳກັດ ນອກຈາກບໍ່ມີເງິນຈ້າງຄົນງານແລ້ວ. ຍັງຈະມີການປົດພະນັກງານຕື່ມອີກ, ສະນັ້ນ, ແຜນການເພີ່ມອັດຕາຄ່າຈ້າງຂັ້ນຕ່ຳ ຕ້ອງໄດ້ມີການພິຈາລະນາ ແລະ ທົບທວນຄືນໃນເທື່ອນີ້, ເຊິ່ງອາດຈະເປັນການເພີ່ມອັດຕາຄ່າຈ້າງຕາມລະດັບສີມືແຮງງານຂອງແຕ່ລະຄົນເປັນສຳຄັນ. ດັ່ງທີ່ ທ່ານ ພິພັດ ຢືນຢັນວ່າ:
“ພວກເຮົາຈະບໍ່ປະກາດຄ່າຈ້າງຂັ້ນຕໍ່າ. ເມື່ອມີການປະກາດຄ່າຈ້າງຂັ້ນຕໍ່າສຸດ ຂ້າພະເຈົ້າເຊື່ອວ່າຝ່າຍຜູ້ຈ້າງອາດຈະບໍ່ສາມາດແບກຫາບພາລະ ທີ່ສໍາຄັນທີ່ສຸດແມ່ນພວກເຮົາຕ້ອງຈ່າຍຄ່າສີມືແຮງງານ ຖ້າບໍ່ດັ່ງນັ້ນ ຄົນງານທີ່ບໍ່ມີຄວາມສາມາດ ເຂາເຈົ້າໄດ້ຂ້າມຈາກປະເທດເພື່ອນບ້ານເຂົ້າມາປະເທດໄທ ຢ່າງໜ້ອຍພວກເຂາຕ້ອງໄດ້ຝຶກອົບຮົມແຕ່ 6 ເດືອນຫາ 1 ປີ ພວກເຂາຈະໄດ້ຮັບຄ່າແຮງງານຂັ້ນຕ່ຳເທ່າກັບຄົນທີ່ມີຄວາມຮູ້ຄວາມສາມາດແລ້ວໄດ້ແນວໃດ? ໃນກໍລະນີນີ້, ພວກເຮົາຕ້ອງມີຄວາມຍຸຕິທໍາກັບຜູ້ປະກອບການແລະຜູ້ຈ້າງແຮງງານ.”
ສ່ວນທ່ານ ຊະນິນ ຊະລິດສາພົງ, ສະມາຊິກສະພາການຄ້າແຫ່ງຊາດໄທ ຢືນຢັນວ່າອົງການນາຍຈ້າງທີ່ປະກອບດ້ວຍ 92 ສະມາຄົມທີ່ຕາງໜ້າໃຫ້ວິສາຫະກິດຂະໜາດກາງ ແລະ ຂະໜາດນ້ອຍ 15,000 ກວ່າແຫ່ງທີ່ມາຈາກ 76 ແຂວງໃນທົ່ວປະເທດໄທ ໄດ້ຍື່ນຈົດໝາຍເຖິງລັດຖະມົນຕີວ່າການກະຊວງແຮງງານໄທ. ເພື່ອສະແດງຄວາມຄັດຄ້ານຕໍ່ແຜນການຂອງລັດຖະບານໄທທີ່ຈະເພີ່ມອັດຕາຄ່າແຮງງານຕ່ຳຢູ່ໄທຈາກ 345 ບາດເປັນ 400 ບາດຕໍ່ວັນແຕ່ວັນທີ 1 ຕຸລາ 2024 ເປັນຕົ້ນໄປ. ດ້ວຍເຫດຜົນວ່າ ການຂຶ້ນອັດຕາຄ່າຈ້າງຂັ້ນຕ່ຳຈະສົ່ງຜົນກະທົບຢ່າງໜັກໜ່ວງຕໍ່ຜູ້ປະກອບການ SME ໃນໄທ. ເນື່ອງຈາກວ່າມັນຈະເພີ່ມຄ່າໃຊ້ຈ່າຍໃນການຜະລິດຜະລິດຕະພັນ. ພ້ອມກັນນັ້ນ, ລາຍຮັບຂອງຜູ້ປະກອບການ SME ຍັງບໍ່ທັນເພີ່ມຂຶ້ນເລີຍ. ຜົນໄດ້ຮັບແມ່ນຕ້ອງປະເຊີນໜ້າກັບສະພາບການສູນເສຍ ແລະ ໃນທີ່ສຸດແມ່ນຕ້ອງຍຸດກິດຈະການ ດັ່ງທີ່ທ່ານ ຊະນິນ ຢືນຢັນວ່າ:
“ມື້ນີ້ ເພີ່ມຂຶ້ນເຖິງ 400 ຄົນ. ພວກເຂົາເວົ້າວ່າ 80% ບໍ່ສາມາດຢູ່ລອດໄດ້. ທ່ານສາມາດຖາມຜູ້ປະກອບການຂະຫນາດນ້ອຍ. ສ່ວນປະຊາຊົນທີ່ໄດ້ຮັບຜົນກະທົບຢ່າງໜັກໜ່ວງແມ່ນແມ່ຄ້າ-ນັກຂາຍ ກ່ອສ້າງ ຕະຫຼາດສົດ, ຂາຍຍ່ອຍແລະຂາຍສົ່ງ SME ລ້ວນແຕ່ໄດ້ຮັບຜົນກະທົບ ເປັນຄັ້ງທຳອິດທີ່ສະພາການຄ້າ 76 ແຂວງໄດ້ຍື່ນຄັດຄ້ານ ໃນເວລາດຽວກັນ. ແລະ ມີ 92 ສະມາຄົມການຄ້າທີ່ເປັນເຈົ້າຂອງໂຮງງານ. ແລະມີຜູ້ປະກອບການຂະໜາດນ້ອຍ 15.000 ກວ່າລາຍ, ພວກຂ້າພະເຈົ້າຮຽກຮ້ອງໃຫ້ປັບລະດັບລາຍໄດ້ຕາມຄະນະກຳມະການສາມຝ່າຍ ແລະ ອະນຸກຳມະການໃນແຕ່ລະແຂວງ.”
ກ່ອນໜ້ານີ້ ຣັຖບານໄທ ໄດ້ອະນຸມັດ ໃຫ້ຄົນງານ ລາວ, ມຽນມາ, ແລະ ກຳພູຊາ ຫຼາຍກວ່າ 3 ແສນຄົນ ໄປເຮັດວຽກ ຢູ່ໄທ ຈົນຮອດ ວັນທີ 13 ກຸມພາ 2025. ຣັຖບານໄທ ກໍໄດ້ຫຼຸດ ຄ່າວີຊາ ໃຫ້ຄົນງານລາວ. ຄົນພະມ້າ ແລະ ກັມພູຊາ ທີ່ໄປເຮັດວຽກ ຢູ່ໄທ ແບບຖືກຕ້ອງ ຕາມກົດໝາຍ ເຊັ່ນດຽວກັນ, ຫລຸດລົງ ຈາກ 2,000 ບາດ ເຫລືອພຽງ 500 ບາດ. ດ້ວຍເຫດນີ້, ຄາດວ່າຈະສືບຕໍ່ມີຄົນງານໄປເຮັດວຽກຢູ່ໄທຕື່ມອີກ, ລວມທັງຄົນງານລາວເຊັ່ນກັນ ສິ່ງດັ່ງກ່າວຈະເຮັດໃຫ້ຂະແຫນງການຜະລິດໃນລາວປະເຊີນກັບການຂາດແຄນແຮງງານຫຼາຍກວ່າ 700,000 ຄົນ, ໂດຍສະເພາະແມ່ນທຸລະກິດໃນຂະແຫນງການບໍລິການແລະການທ່ອງທ່ຽວ.