ທ່ານລາດຊະນິວົງ ອຳມະລາທິທາດາ ຫົວໜ້າພະແນກກະສິກໍາ-ປ່າໄມ້ເຂດນະຄອນວຽງຈັນໄດ້ຖະແຫລງຍອມ ຮັບວ່າສະພາບການກ່ຽວກັບການແພ່ລະບາດຂອງພະຍາດໝູຫູກໍ່າ ຫລືເຊື້ອໂຣກ PRRS ໃນເຂດນະຄອນວຽງຈັນທີ່ໄດ້ເລີ່ມເກີດຂື້ນນັບຈາກກາງເດືອນມິຖຸນາເປັນຕົ້ນມານັ້ນ ໄດ້ມີການແພ່ລະບາດກວ້າງຂວາງຫລາຍຂື້ນນັບມື້ ແລະກໍເຮັດໃຫ້ໝູທີ່ຕິດເຊື້ອໂຣກດັ່ງກ່າວຕ້ອງລົ້ມຕາຍໄປຫລາຍຂື້ນນັບມື້ເຊັ່ນກັນ.
ທັ້ງນີ້ໂດຍຈາກການເກັບຂໍ້ມູນໃນໄລຍະນັບຈາກກາງເດືອນມິຖຸນາເປັນຕົ້ນມາຈົນເຖິງຂະໜະນີ້ກໍພົບວ່າມີໝູທີ່ຕາຍໄປຍ້ອນຕິດເຊື້ອໂຣກດັ່ງກ່າວນີ້ແລ້ວຫລາຍກວ່າ 200 ຕົວ ແລະຍັງມີໝູອີກຫລາຍກວ່າ 4,000 ຕົວທີ່ຕິດເຊື້ອໂຣກທີ່ຈະຕ້ອງໄດ້ຣັບການປິ່ນປົວແລະຈະຕ້ອງແຍກອອກຈາກໝູຕົວອື່ນໆຢ່າງຮີບດ່ວນທີ່ສຸດ ເພື່ອ ປ້ອງກັນບໍ່ໃຫ້ມີການແພ່ລະຍາດເພີ່ມຂື້ນອີກ.
ຍິ່ງໄປກວ່ານັ້ນ ເພື່ອເປັນການປ້ອງກັນບໍ່ໃຫ້ເຊື້ອໂຣກດັ່ງກ່າວນີ້ເກີດການແພ່ລະບາດໄປຍັງພື້ນທີ່ອື່ນໆໃນເຂດ ນະຄອນວຽງຈັນ ແລະເຂດແຂວງຕ່າງໆຂອງລາວດ້ວຍນັ້ນ ທາງການລາວກໍຍັງໄດ້ປະກາດກຳໜົດໃຫ້ເມືອງສີ ສັດຕະນາກ ເມືອງສີໂຄດຕະ ບອງ ແລະເມືອງຫາດຊາຍຟອງເປັນເຂດຄວບຄຸມການແພ່ລະບາດຂອງພະຍາດ ໝູຫູກໍ່າດັ່ງກ່າວອີກດ້ວຍ. ນອກຈາກນີ້ ເນຶ່ອງຈາກວ່າໃນທົ່ວເຂດຂະຄອນວຽງຈັນມີຟາມລ້ຽງໝູຢູ່ຫລາຍກວ່າ 120 ແຫ່ງໂດຍມີຈຳນວນ ໝູລວມກັນຫລາຍກວ່າ 66,000 ຕົວ ແລະເຖິງແມ່ນວ່າຈະມີການແພ່ລະບາດຂອງພະຍາດໝູຫູກໍ່າເກີດຂື້ນໃນ ຟາມລ້ຽງໝູພຽງແຕ່ 9 ແຫ່ງເທົ່ານັ້ນກໍຕາມ ຫາກແຕ່ຍ້ອນວ່າການແພ່ລະບາດທີ່ເກີດຂື້ນນັ້ນ ເປັນການແພ່ພັນລະບາດຢ່າງວ່ອງໄວຈຶ່ງເຮັດໃຫ້ທາງການລາວຕ້ອງກຳໜົດໃຫ້ອີກ 6 ເມືອງທີ່ເຫລືອ ຊຶ່ງກໍຄືເມືອງໄຊທານີ ເມືອງໄຊເສດຖາ ເມືອງຈັນທະບູລີ ເມືອງນາຊາຍທອງ ເມືອງປາກງື່ມ ແລະເມືອງສັງທອງນັ້ນ ເປັນເຂດທີ່ຈະຕ້ອງເຝົ້າລະວັງຢ່າງໄກ້ຊິດດ້ວຍ ດັ່ງທີ່ ທ່ານລາດຊະນິວົງ ໄດ້ຖະແຫລງຊີ້ແຈງວ່າ
“ສາມເມືອງທີ່ເປັນເຂດລະບາດ ພວກເຣົາກໍໄດ້ກຳໜົດແລະແຈ້ງການໄປຍັງອຳນາດການປົກຄອງວ່າໃຫ້ມີເຂດ ລະບາດແລະເຂດເຝົ້າລະວັງ ສ່ວນຈຸດກວດການັ້ນກໍຈະຕ້ອງການກວດກາຢູ່ຕາມດ່ານຕ່າງໆນອກນັ້ນກໍແມ່ນຢູ່ ຕາມໂຮງຂ້າສັດ ແລະບ່ອນປຸງແຕ່ງ ອາຫານສັດ ສ່ວນຢູ່ຟາມທີ່ເກີດການລະບາດນັ້ນ ກໍໄດ້ມີການແນະນຳໃຫ້ ແຍກໝູທີ່ເຈັບເປັນອອກຕ່າງຫາກ ໝູທີ່ຕາຍແລ້ວກໍຕ້ອງທຳລາຍດ້ວຍການເອົາໄປຝັງ ສ່ວນໝູທີ່ເຈັບເປັນກໍໄດ້ ປິ່ນປົວດ້ວຍຢາຕ້ານເຊື້ອໂຣກດັ່ງກ່າວ”
ໂດຍສຳລັບເຂດຄວບຄຸມນັ້ນ ທາງການລາຍຈະຫ້າມບໍ່ໃຫ້ມີການເຄຶ່ອນຍ້າຍໝູອອກຈາກຟາມໄປພື້ນທີ່ອື່ນໆ ເປັນເວລາຢ່າງໜ້ອຍ 30 ວັນ ສ່ວນຢູ່ໃນເຂດເຝົ້າລະວັງນັ້ນ ຖ້າຫາກມີການກວດພົບວ່າມີໝູທີ່ສົງໃສວ່າໄດ້ ຕິດເຊື້ອໂຣກດັ່ງກ່າວແລ້ວກໍຈະຕ້ອງກຳຈັດໃນທັນທີ ລວມທັງຍັງໄດ້ມີການສັ່ງຫ້າມນຳເຂົ້າໝູຈາກຕ່າງແຂວງ ແລະຈາກຕ່າງປະເທດດ້ວຍ.
ແຕ່ຢ່າງໃດກໍຕາມ ເນຶ່ອງຈາກຍັງຄົງບໍ່ມີຄວາມແຈ່ມແຈ້ມວ່າເຊື້ອໂຣກໝູຫູກໍ່າດັ່ງກ່າວນີ້ຈະສາມາດຕິດຕໍ່ຈາກໝູ ເຖິງຄົນໄດ້ໂດຍກົງຫລືບໍ່ນັ້ນ ກໍໄດ້ເປັນຜົນເຮັດໃຫ້ທາງການລາວຕ້ອງດຳເນີນການໂຄສະນາປະຊາສຳພັນ ແລະປຸກລະດົມໃຫ້ປະຊາຊົນລາວປ້ອງກັນຕົນເອງດ້ວຍການບໍລິໂພກສະເພາະຊີ້ນໝູທີ່ໄດ້ຜ່ານການກວດໂຣກແລ້ວແລະຈະຕ້ອງບໍລິໂພກຊິ້ນໝູທີ່ສຸກແລ້ວເທົ່ານັ້ນ. ທັງນີ້ກໍເນຶ່ອງຈາກວ່າພະຍາດໝູຫູກໍ່ານີ້ເປັນພະຍາດທີ່ເລີ່ມຈາກການຕິດເຊື້ອໂຣກທີ່ຫູຂອງໝູແລ້ວຕິດຕໍ່ໄປຍັງອະໄວຍະວະທີ່ກ່ຽວ ກັບລະບົບການຫາຍໃຈຂອງໝູ ແລະດ້ວຍການເປັນພະຍາດທີ່ມີຄວາມຮ້າຍແຮງຈ່ຶງເຮັດໃຫ້ໝູ ທີ່ຕິດເຊື້ອໂຣກດັ່ງກ່າວຕ້ອງລົ້ມຕາຍໄປຢ່າງໄວວານັ້ນເອງ. ນອກຈາກນີ້ເພື່ອເປັນການຮັບປະກັນວ່າການດຳເນີນມາດຕະການຕ່າງໆດັ່ງກ່າວຈະດຳເນີນໄປຢ່າງມີປະສິດທິພາບນັ້ນ ທາງການເຂດນະຄອນວຽງຈັນກໍໄດ້ ອອກຄຳສັ່ງແຕ່ງຕັ້ງຄະນະກຳມະການສະເພາະກິດເພື່ອຄວບຄຸມພະຍາດດ່ັງກ່າວຂື້ນຢ່າງເປັນທາງການແລ້ວ ໂດຍຄະນະກຳມະການດັ່ງກ່າວນີ້ກໍຍັງມີພາລະໜ້າທີ່ໃນການໂຄສະນາອົບລົມເພື່ອໃຫ້ຄວາມຮູ້ແກ່ປະຊາຊົນ ແລະບັນດາເຈົ້າຂອງຟາມລ້ຽງໝູກ່ຽວກັບວິທີການປ້ອງກັນການແພ່ລະບາດຂອງເຊື້ອໂຣກດັ່ງກ່າວນີ້ຢ່າງຖືກວິທີ ອີກດ້ວຍ.