ພາກບໍລິການຂອງລາວ ສ້າງລາຍຮັບຈາກການທ່ອງທ່ຽວໄດ້ຫຼາຍກວ່າ 1 ຕື້ໂດລາ ໃນຕະຫຼອດປີ 2024 ໂດຍທີ່ເມືອງມໍລະດົກໂລກ ຫຼວງພະບາງ ຍັງຄົງເປັນຈຸດໝາຍປາຍທາງອັນດັບ 1 ຂອງນັກທ່ອງທ່ຽວຕ່າງຊາດ.
Your browser doesn’t support HTML5
ພາກບໍລິການຂອງລາວ ສ້າງລາຍຮັບຈາກການທ່ອງທ່ຽວໄດ້ຫຼາຍກວ່າ 1 ຕື້ໂດລາ ໃນຕະຫຼອດປີ 2024
ທ່ານສອນໄຊ ສີພັນດອນ ນາຍົກລັດຖະມົນຕີ ຖະແຫລງວ່າ ທຸລະກິດບໍລິການ ແລະ ທ່ອງທ່ຽວຄືພາກສ່ວນໜຶ່ງທີ່ມີບົດບາດຢ່າງສຳຄັນໃນການເຮັດໃຫ້ເສດຖະກິດລາວ ເຕີບໂຕເຖິງ 4.6% ໃນປີ 2024 ທຽບໃສ່ປີ 2023, ເມື່ອສົມທົບກັບລາວເປັນປະທານອາຊຽນ ໃນປີ 2024 ແລະ ຍັງໄດ້ປະກາດໃຫ້ເປັນປີທ່ອງທ່ຽວລາວ 2024 ດ້ວຍນັ້ນ ກໍຄືປັດໄຈສຳຄັນທີ່ຊຸກຍູ້ການຂະຫຍາຍການທ່ອງທ່ຽວຂອງລາວ ແລະເຮັດໃຫ້ພາກບໍລິການໃນລາວ ມີລາຍຮັບຫຼາຍກວ່າ 1 ຕື້ໂດລາສະຫະລັດຈາກນັກທ່ອງທ່ຽວທັງ ຄົນລາວ ແລະຊາວຕ່າງປະເທດກວ່າ 5 ລ້ານຄົນ, ດັ່ງທີ່ ທ່ານສອນໄຊ ໄດ້ໃຫ້ການຢືນຍັນວ່າ “GDP ຂອງປະເທດເຮົາຂະຫຍາຍຕົວໃນອັດຕາສະເລ່ຍ 4.6%, ປັດໄຈຕົ້ນຕໍທີ່ເຮັດໃຫ້ເສດຖະກິດມີການຂະຫຍາຍຕົວ ແມ່ນຂະແຫນງການບໍລິການ, ການຂົນສົ່ງ, ການຂາຍຍົກ-ຂາຍຍ່ອຍ ໃນນັ້ນ ເພີ່ມຂຶ້ນຫຼາຍກວ່າໝູ່ ແມ່ນຈາກການເປັນເຈົ້າພາບຈັດກອງປະຊຸມສຸດຍອດອາຊຽນ ແລະການເປີດປີທ່ອງທ່ຽວລາວ ຊຶ່ງເຮັດໃຫ້ມີນັກທ່ອງທ່ຽວຈາກພາຍໃນ ແລະຕ່າງປະເທດ ເດີນທາງເຂົ້າມາທ່ອງທ່ຽວ ສປປ ລາວ ລວມທັງໝົດຫຼາຍກວ່າ 5 ລ້ານເທື່ອຄົນ ສ້າງລາຍຮັບໝູນວຽນໄດ້ຫຼາຍກວ່າ 1 ຕື້ໂດລາສະຫະລັດ ໂດຍສະເພາະແມ່ນນັກທ່ອງທ່ຽວພາຍໃນປະເທດນັ້ນ ບັນລຸເກີນແຜນການ ຖືວ່າໄດ້ເຖິງ 127%.”
ທັງນີ້ ລັດຖະບານລາວ ໄດ້ວາງເປົ້າໝາຍຈະຕ້ອນຮັບນັກທ່ອງທ່ຽວຕ່າງປະເທດໃຫ້ໄດ້ 5 ລ້ານກວ່າຄົນ ໃນປີ 2024, ໂດຍໃນນີ້ຄາດວ່າ 70% ຈະເດີນທາງຜ່ານຂົວມິດຕະພາບ ລາວ-ໄທ ແຫ່ງທີ 1 ແລະນັກທ່ອງທ່ຽວທີ່ຈະມາລາວຫລາຍທີ່ສຸດກໍຄືນັກທ່ອງທ່ຽວຈາກ ໄທແລະບັນດາປະເທດໃນອາຊຽນດ້ວຍກັນ ຕິດຕາມດ້ວຍນັກທ່ອງທ່ຽວຈາກຈີນ ຊຶ່ງສາມາດຈະເດີນທາງມາລາວໄດ້ ທັງທາງລົດຍົນ, ລົດໄຟ ແລະ ເຄື່ອງບິນ. ໂດຍເມືອງມໍລະດົກໂລກຫຼວງພະບາງ ກໍຄືຈຸດໝາຍປາຍທາງອັນດັບ 1 ຂອງນັກທ່ອງທ່ຽວຕ່າງປະເທດ. ຊຶ່ງໃນປັດຈຸບັນນີ້ ສາມາດຮອງຮັບນັກທ່ອງທ່ຽວໄດ້ຕະຫຼອດທັງປີແລ້ວ ດັ່ງທີ່ ນັກທຸລະກິດລາວ ທີ່ເມືອງຫລວງພະບາງ ໄດ້ໃຫ້ການຍືນຢັນວ່າ “ຫຼວງພະບາງຕອນນີ້ຫັ່ນໜາ ການທ່ອງທ່ຽວຫັ່ນກໍຖືວ່າ ແມ່ນໄດ້ຕະຫຼອດປີ, ຄືໃນຊ່ວງ High Season ຈາກເດືອນ 10 ຮອດເດືອນ 3 ຫັ່ນ ກໍແມ່ນເອີຣົບ ຫຼືວ່າມາຈາກອາເມຣິກາ ແລະ ຊ່ວງ Low Season ເດືອນ 7 ເດືອນ 8 ກໍເປັນແຂກມາຈາກເກົາຫຼີ ຫຼັງຈາກນັ້ນ, ກໍແມ່ນເດືອນ 2 ກໍຈະແມ່ນແຂກຈີນ ແລ້ວກະໄທ ກໍແມ່ນງານເທດສະການຊຶ່ງເຮົາຈະມີຄວາມພ້ອມໃນຫຼາຍດ້ານ ຫຼືວ່າເລື່ອງສະຖາປັດຕະຍະກໍາຕ່າງໆ ຊຶ່ງວ່າ ນັກທ່ອງທ່ຽວທົ່ວໂລກເຂົາເຈົ້າມາແລ້ວ ເຂົາເຈົ້າກໍປະທັບໃຈ, ເພາະສະນັ້ນ ຈຶ່ງຄ່ອຍເຮັດໃຫ້ການທ່ອງທ່ຽວຂອງຫຼວງພະບາງນີ້ ເພີ່ມຂຶ້ນ.”
ແຕ່ຢ່າງໃດກໍຕາມ ພາກການທ່ອງທ່ຽວໂດຍລວມໃນລາວ ຍັງມີບັນຫາຫລາຍດ້ານໃນປັດຈຸບັນ ເຊັ່ນ ເມື່ອນັກທ່ອງທ່ຽວເດີນທາງມາເຖິງລາວແລ້ວນັ້ນ ຍັງຕ້ອງປະສົບກັບຄວາມບໍ່ສະດວກສະບາຍໃນການເດີນທາງທ່ອງທ່ຽວໃນລາວ ເພາະວ່າຖະໜົນສ່ວນໃຫຍ່ຕົກຢູ່ໃນສະພາບທີ່ເປ່ເພຢ່າງໜັກໜ່ວງ ຍ້ອນການບັນທຸກນ້ຳໜັກເກີນອັດຕາ ຂອງບັນດາລົດຂົນສົ່ງແຮ່ທາດຈາກລາວໄປຈີນ ໃນຂະນະທີ່ລັດຖະບານລາວ ກໍມີງົບປະມານຢ່າງຈໍາກັດດ້ວຍແລ້ວ ຈຶ່ງບໍ່ສາມາດດຳເນິນການຊ່ອມແປງເພື່ອເຮັດໃຫ້ເອື້ອອໍານວຍຕໍ່ການທ່ອງທ່ຽວໄດ້ເລີຍ ເຊັ່ນ ໃນປີ 2024 ການສ້ອມແປງເສັ້ນທາງໄປຫາສະຖານທີ່ທ່ອງທ່ຽວຈະຕ້ອງໃຊ້ງົບປະມານຫຼາຍກວ່າ 2,500 ຕື້ກີບ, ແຕ່ລັດຖະບານລາວສາມາດຕອບສະໜອງໄດ້ພຽງແຕ່ 25 ຕື້ກີບ ຫຼື 10% ເທົ່ານັ້ນ ຂອງຄວາມຕ້ອງການຕົວຈິງ.