ຄົນລາວຢູ່ຕ່າງປະເທດຫລາຍຄົນ ກໍຄົງມີຄວາມດີໃຈ ທີ່ທາງການໄດ້ເລີ້ມເປີດໃຫ້ຄົນຢູ່ຕ່າງປະເທດໄປຢ້ຽມຢາມລາວໄດ້ອີກນັບວັນທີ 1 ມັງກອນເປັນຕົ້ນມາ. ແຕ່ແນວໃດກໍຕາມການເປີດປະເທດທີ່ວ່ານີ້ ຍັງເປັນການເປີດເປັນໄລຍະຢູ່ ຊຶ່ງກໍຄື ໄລຍະທີ 1 ແຕ່ວັນທີ 1 ມັງກອນຫາ 30 ມີນາ; ໄລຍະທີ 2 ແຕ່ວັນທີ 1 ເມສາຫາ 30 ມິຖຸນາ; ໄລຍະທີ 3 ແຕ່ວັນທີ 1 ກໍລະກົດ 2022 ເປັນຕົ້ນໄປ. ໃນໄລຍະທີ 1 ນີ້ ກໍເປັນການເປີດໃຫ້ ສໍາລັບແຕ່ເຂດທ່ອງທ່ຽວສີຂຽວທີ່ມີ 3 ເຂດ ຄືນະຄອນຫລວງວຽງຈັນ, ຫລວງພະບາງແລະ ເມືອງວັງວຽງ ເທົ່ານັ້ນ ແລະການເດີນທາງເຂົ້າໄປລາວ ກໍຍັງມີຂໍ້ຈຳກັດຫລາຍຢູ່. ມີແຕ່ນັກທ່ອງທ່ຽວທີ່ໄດ້ຮັບວີຊາສີຂຽວທີ່ເຂົ້າໄປລາວຜ່ານການບໍລິການຂອງບໍລິສັດທ່ອງທ່ຽວເທົ່ານັ້ນຈຶ່ງເຂົ້າໄດ້ ດັ່ງທີ່ທ່ານອາດາມ ແດໂຣ, ຊາວອາເມຣິກັນຄົນນຶ່ງ ທີ່ຍັງອາໄສຢູ່ລາວ ແລະໄດ້ຕິດຕາມເລື້ອງນີ້ຕະຫລອດມາເວົ້າສູ່ຟັງວ່າ:
Your browser doesn’t support HTML5
ສຽງທ່ານອາດາມ ແດໂຣກ່າວກ່ຽວກັບການເປີດປະເທດແບບຈຳກັດຢູ່ລາວ
“ວີຊາສີຂຽວແມ່ນວີຊາແຮງທີ່ຈູງໃຈນັກທ່ອງທ່ຽວປະເພດນຶ່ງ ຂອງວິທີການເປີດປະເທດຄືນ ແບບເປັນໄລຍະຢູ່ນີ້. ພວກເຂົາເຈົ້າມີຂໍ້ຈຳຈັດ ມີພຽງແຕ່ນັກທ່ອງ ທ່ຽວເປັນກຸ່ມເທົ່ານັ້ ນທີ່ຈະເຂົ້າມາໄດ້ ແລະພວກເຂົາເຈົ້າຖືກອະນຸຍາດໃຫ້ໄປ ໄດ້ແຕ່ບາງບ່ອນເທົ່ານັ້ນໃນລາວ. ເຂົາເຈົ້າຍັງບໍ່ທັນໃຫ້ວີຊານັກທ່ອງທ່ຽວແບບປົກກະຕິເລີຍ. ຂ້າພະເຈົ້າຄິດວ່າ ກໍລະນີຂອງໄລຍະທີສອງກໍຈະເປັນແບບດຽວກັນນີ້, ຊຶ່ງເຂົາເຈົ້າໄດ້ວາງແຜນໄວ້ແລ້ວ, ແຕ່ວ່າມັນຍັງບໍ່ທັນເປັນການເປີດຫມົດເທື່ອ.”
ສະນັ້ນ ມັນກໍຍັງເປັນການຍາກຫລາຍສຳລັບຄົນເຊື້ອສາຍລາວທີ່ຖືສັນຊາດອື່ນຈະໄດ້ກັບໄປຢ້ຽມຢາມບ້ານເກີດເມືອງນອນໄດ້ ໃນໄລຍະນີ້ ຫລັງຈາກປະເທດໄດ້ປິດເປັນບາງສ່ວນ ຫລືທັງໝົດມາໄດ້ເກືອບ 2 ປີແລ້ວ ຍ້ອນການລະບາດຂອງໂຄວິດ.
ສຳລັບພວກທີ່ຈະເດີນທາງເຂົ້າລາວ ແບບທຸລະກິດ ຫລືເຮັດວຽກເຮັດການນັ້ນກໍຕ້ອງໄດ້ຮັບວີຊາທຸລະກິດ ແລະມີການຮັບປະກັນ ຈາກບໍລິສັດທີ່ຈະໄປພົວພັນຢູ່ລາວນັ້ນ ຮັບປະກັນ ແລະກໍຕ້ອງໄດ້ຮັບອະນຸຍາດ ຈາກໜ່ວຍສະເພາະກິດເພື່ອປ້ອງກັນ, ຄວບຄຸມແລະແກ້ໄຂການລະບາດຂອງພະຍາດໂຄວິດ-19 ກ່ອນແລະ ກໍຕ້ອງໄດ້ຜ່ານກັກກັນຕົວ 14 ວັນຈຶ່ງອອກໄປປະຕິບັດວຽກງານຕາມແຜນການ ໄດ້, ອີງຕາມຄຳແນະນຳ ຂອງໝ່ວຍສະເພາະກິດດັ່ງກ່າວ ສະບັບເລກທີ 4881 ລົງວັນທີ 31 ທັນວາ 2021.