ທ່ານ ຈູມມູລີ ໄຊຍະສອນ ເລຂາທິການໃຫຍ່ພັກປະຊາຊົນລາວ ໃນຖານະປະທານປະເທດລາວ ໄດ້ຖະແຫລງໃນໂອກາດສະເຫລີມສະຫລອງ ບຸນສົງການປີໃໝ່ລາວປະຈຳປີ ພ.ສ. 2553 ທີ່ໄດ້ດຳເນີນການສະເຫລີມສະຫລອງຢ່າງເປັນທາງການໃນລະວ່າງວັນທີ່ 14-16 ເດືອນເມສານີ້ ວ່າການພັທະນາລາວໃນ ໄລຍະທີ່ຜ່ານມາໄດ້ປະສົບຜົນສຳເລັດຢ່າງດີ ໃນຫລາຍໆດ້ານ. ໂດຍສະເພາະແມ່ນການພັທະນາທາງເສດ ຖະກິດນັ້ນ ກໍໄດ້ສະແດງອອກດ້ວຍການທີ່ປາກົດ ວ່າຍອດຜະລິດຕະພັນລວມພາຍໃນ ຫລືມູນຄ່າ GDP ສາມາດຕົກຢູ່ໃນສະເລັ່ຍເປັນລາຍໄດ້ຂອງ ປະຊາ ຊົນໄດ້ເຖິງ 906 ໂດລາ ຕໍ່ຄົນ ໃນໄລຍະແຜນ ການປີ 2008-2009 ທີ່ ຜ່ານມາ ແລະກໍຍັງເຊື່ອວ່າມູນຄ່າ GDP ໃນແຜນການປີ 2009-2010 ນີ້ ຈະສາມາດ ຕົກ ເປັນໂດຍສະເລັ່ຍເປັນລາຍໄດ້ຂອງປະຊາກອນລາວໄດ້ເພີ່ມຂື້ນຈາກປີຜ່ານມາ ຢ່າງແນ່ນອນອີກດ້ວຍ.
ແຕ່ຢ່າງໃດກໍຕາມ ທ່ານຈູມມູລີກໍຍອມຮັບວ່າການທີ່ລາວຈະສາມາດຜ່ານຜ່າສິ່ງທີ່ເອີ້ນວ່າ ບັນຫາວິກິດການ ທາງເສດຖະກິດການເງິນໂລກໄດ້ ໃນໄລຍະຕໍ່ໄປນັ້ນ ກໍບໍ່ແມ່ນເລື່ອງງ່າຍເພາະວ່າມັນຈະຕ້ອງໄດ້ຮັບການ ຮ່ວມມືຈາກທຸກພາກສ່ວນ ທັງພາຍໃນລາວແລະຈາກຕ່າງປະເທດຢ່າງແທ້ຈິງ ທັ້ງນີ້ໂດຍສະເພາະ ແມ່ນ ການເສີມສ້າງສາຍພົວພັນແລະການຮ່ວມມືລະວ່າງຄົນລາວໃນປະເທດ ກັບຄົນລາວໃນຕ່າງປະເທດນັ້ນ ຖືເປັນປັດໃຈ ສຳຄັນຢ່າງຍິ່ງ ທີ່ຈະເຮັດໃຫ້ການພັທະນາລາວໄປສູ່ຄວາມຈະເຣີນຮຸ່ງເຮືອງໄດ້ໃນອະນາຄົດ ຊຶ່ງດ້ວຍການເຫັນຄວາມສຳຄັນຂອງປັດໃຈດັ່ງກ່າວ ຈຶ່ງເຮັດໃຫ້ທ່ານຈູມມະລີ ໄດ້ຖືໂອກາດບຸນສົງການປີໃໝ່ລາວໃນປີນີ້ ຮຽກຮ້ອງຂໍໃຫ້ຄົນລາວໃນປະເທດ ແລະ ຄົນລາວໃນຕ່າງປະເທດຈົ່ງໄດ້ເຫັນຄວາມສຳຄັນຂອງການເສີມສ້າງສາຍພົວພັນ ແລະຮ່ວມມືກັນເຂົ້າໃນການພັດທະນາປະເທດລາວໃຫ້ຫລາຍຂື້ນ ກັບທັງຍັງໄດ້ຖືໂອກາດສົ່ງພອນໄຊອັນປະເສີດໄປເຖິງຄົນລາວທັງຊາດ ແລະຄົນລາວໃນຕ່າງປະເທດດ້ວຍວ່າ
“ຂ້າພະເຈົ້າຂໍຮຽກຮ້ອງມາຍັງພີ່ນ້ອງຮ່ວມຊາດໃນທົ່ວປະເທດ ກໍຄືຄົນລາວໃນຕ່າງ ປະເທດ ຈົ່ງເພີ່ມທະວີຄວາມສາມະຄີເປັນປືກແຜ່ນແໜ້ນໜາ ເຊີດຊູຈິດໃຈຮັກຊາດ ຢ່າງສຸດຂີດ ສົມທົບກັບການຍາດແຍ່ງເອົາຄວາມຮ່ວມມື ແລະການຊ່ວຍເຫລືອຈາກ ຕ່າງປະເທດຢ່າງຕັ້ງໜ້າ.
ກ່ອນໜ້ານີ້ ທ່ານຈູມມະລີ ໄດ້ອອກຄຳສັ່ງເພື່ອບັງຄັບໃຊ້ກົດໝາຍວ່າດ້ວຍການສົ່ງເສີມການລົງທືນສະບັບແກ້ໄຂໃໝ່ຢ່າງເປັນທາງການ ຫລັງຈາກກົດໝາຍດັ່ງກ່າວ ໄດ້ຜ່ານການເຫັນຊອບຂອງສະມາຊິກສະພາແຫ່ງຊາດແລ້ວ ເມື່ອເດືອນ ກໍລະກົດປີຜ່ານມາ ໂດຍເປົ້າໝາຍສຳຄັນຂອງການປະກາດບັງຄັບໃຊ້ກົດໝາຍດັ່ງກ່າວ ກໍຄືການດຶງດູດ ເອົາການລົງທຶນຈາກຕ່າງປະເທດໃຫ້ໄດ້ຫລາຍຂື້ນ ໂດຍສະເພາະແມ່ນຄົນລາວຢູ່ ຕ່າງປະເທດທີ່ຈະເຂົ້າມາລົງທືນໃນລາວຕັ້ງແຕ່ 5ແສນໂດລາຂື້ນໄປນັ້ນ ກໍຍັງມີສິດທີ່ຈະຊື້ແລະເປັນເຈົ້າຂອງທີ່ດິນ ແລະອະສັງຫາລິມະຊັບໃນລາວ ລວມທັງຍັງມີສິດທີ່ຈະພັກອາໃສຢູ່ໃນລາວເປັນການຖາວອນໄດ້ອີກດ້ວຍ.