ທາງການລາວເລັ່ງປັບປຸງ ລະບົບຄອງຊົນລະປະທານ ໃນທົ່ວ
ປະເທດ ເພື່ອເພີ້ມປະສິດທິພາບ ໃນການຕອບສະໜອງນ້ຳ ໃຫ້
ກັບເນື້ອທີ່ນາ ໃຫ້ໄດ້ເຖິງ 580,000 ເຮັກຕາ ໃນຕະຫລອດ
ລະດູການ 2014-2015 ນີ້.
Your browser doesn’t support HTML5
ຟັງລາຍງານ ລາວ ປັບປຸງ ຄອງຊົນລະປະທານ ເພື່ອສະໜອງນ້ຳ ໃຫ້ເນື້ອທີ່ນາ ໃຫ້ໄດ້ເຖິງ 580,000 ເຮັກຕາ.
ທ່ານໄມກອງ ພອນພົມມະວົງ ຫົວໜ້າກົມຊົນລະປະທານ ກະຊວງກະສິກຳ ແລະປ່າໄມ້
ຖະແຫລງວ່າ ເປົ້າໝາຍສຳຄົນທີ່ສຸດ ຂອງການພັດທະນາປັບປຸງ ລະບົບຄອງຊົນລະປະທານ ໃນທົ່ວປະເທດລາວ ທີ່ກຳລັງດຳເນີນການຢ່າງຕັ້ງໜ້າ ໃນເວລານີ້ ກໍຄືການເພີ້ມລະດັບປະສິດທິພາບ ໃນການຕອບສະໜອງນ້ຳ ໃຫ້ກັບເນື້ອທີ່ນາ ໃຫ້ໄດ້ໃນເນື້ອທີ່ລວມ 580,000 ເຮັກຕາ ໃນລະດູການປີ 2014-2015 ຊຶ່ງໃນນີ້ ແບ່ງເປັນການຕອບສະໜອງນ້ຳໃຫ້ເນື້ອທີ່ ນາປີ 400,000 ເຮັກຕາ ແລະ ນາແຊງ 180,000 ເຮັກຕາ ຕາມລຳດັບ.
ໂດຍຖ້າຫາກການດຳເນີນງານເປັນໄປຕາມແຜນການ ທີ່ວາງໄວ້ ດັ່ງກ່າວກໍຈະເປັນສິ່ງ
ທີ່ຮັບປະກັນໄດ້ວ່າ ຜົນຜະລິດເຂົ້າໃນທົ່ວປະເທດລາວ ຈະມີປະລິມານລວມເຖິງ 4 ລ້ານ
2 ແສນ ໂຕນໃນປີ 2015 ຊຶ່ງນອກຈາກຈະພຽງພໍ ກັບການບໍລິໂພກ ພາຍໃນປະເທດແລ້ວ ກໍຍັງຈະມີຜົນຜະລິດເຂົ້າ ສຳຫລັບສົ່ງອອກ ຕ່າງປະເທດ ໃນປະລິມານລວມບໍ່ນ້ອຍກວ່າ
6 ແສນໂຕນອີກດ້ວຍ.
ແຕ່ຢ່າງໃດກໍຕາມ ທ່ານວິໄລວັນ ພົມເຂ ລັດຖະມົນຕີວ່າການ ກະຊວງກະສິກຳ ປ່າໄມ້
ກໍຍອມຮັບວ່າຊາວນາລາວ ຍັງມີລະດັບ ຄວາມອາດສາມາດຕ່ຳ ທັງໃນດ້ານວິຊາການ
ແລະ ເທັກນິກ ເມື່ອປຽບທຽບກັບຊາວນາ ໃນປະເທດໄທ ແລະ ຫວຽດນາມ ສ່ວນຄວາມ
ອາດສາມາດ ໃນການຂະຫຍາຍພື້ນທີ່ ປູກເຂົ້ານັ້ນ ກໍຍັງຕ່ຳກວ່າຊາວນາ ໃນກຳປູເຈຍ
ແລະ ສະຫະພາບມຽນມາດ້ວຍ.
ທ່ານ ວິໄລວັນ ໄດ້ໃຫ້ການຢືນຢັນວ່າ "ພວກເຮົາຈະລົງເລິກເຖິງເຂົ້າ ທີ່ເປັນເອກະລັກ ຂອງຄົນລາວ ຍົກຕົວຢ່າງ ເຂົ້າໄກ່ນ້ອຍ ໄດ້ປຽບທີ່ສຸດ ຜະລິດ ອອກເທົ່າໃດ ກໍແມ່ນບັນດາປະເທດ ເພື່ອນບ້ານມາຊື້ເອົາໝົດ.”
ຊຶ່ງດ້ວຍເງື່ອນໄຂ ແລະປັດໄຈດັ່ງກ່າວ ຈຶ່ງເປັນການຍາກຢ່າງຍິ່ງ
ທີ່ຊາວນາ ໃນລາວຈະສາມາດເພີ້ມຜົນຜະລິດເຂົ້າ ເພື່ອໃຫ້ກາຍ
ເປັນຜູ້ສົ່ງອອກລາຍໃຫຍ່ຂອງໂລກໄດ້ ຄືກັບໄທ ແລະຫວຽດນາມ
ລວມເຖິງມຽນມາ ແລະກຳປູເຈຍ ທີ່ກຳລັງເພີ້ມການຜະລິດເຂົ້າ
ເພື່ອສົ່ງອອກຢ່າງຕັ້ງໜ້າ ດ້ວຍເຫດນີ້ ຈຶ່ງມີພຽງການແນໃສ່ການ
ຜະລິດເຂົ້າ ທີ່ເປັນແນວພັນພື້ນເມືອງ ຄຸນນະພາບດີ ເທົ່ານັ້ນ ທີ່
ຈະເຮັດໃຫ້ຊາວນາລາວ ສາມາດແຂ່ງຂັນ ໃນຕະຫລາດໂລກໄດ້
ດັ່ງທີ່ ທ່ານ ວິໄລວັນ ໄດ້ໃຫ້ການຢືນຢັນວ່າ: “ສິຖືປັດໄຈເຂົ້ານີ້
ເປັນສິນຄ້າລາຍໃຫຍ່ນີ້ ຄືສິເປັນໄປໄດ້ຍາກ ເນື່ອງຈາກວ່າ
ພວກເຮົາກໍມີຫຼາຍອັນຈຳກັດ ແລະ ພວກເຮົານີ້ ຖືສຳຄັນ
ຍຸດທະສາດ ການຜະລິດເຂົ້ານີ້ ໃຫ້ເປັນສະບຽງເອີ້ນວ່າ
ໃຫ້ກຸ້ມກິນພາຍໃນແລ້ວ ກໍມີອັນສ່ວນແຮ່ໄວ້ ສ່ວນເປັນ
ສິນຄ້ານີ້ ພວກເຮົາຈະລົງເລິກເຖິງເຂົ້າ ທີ່ເປັນເອກະລັກ ຂອງຄົນລາວ ຍົກຕົວ
ຢ່າງ ເຂົ້າໄກ່ນ້ອຍ ໄດ້ປຽບທີ່ສຸດ ຜະລິດອອກເທົ່າໃດ ກໍແມ່ນບັນດາປະເທດ
ເພື່ອນບ້ານມາຊື້ເອົາໝົດ.”
ທາງດ້ານກະຊວງອຸດສາຫະກຳ ແລະການຄ້າ ກໍລາຍງານວ່າ ພາກທຸລະກິດການສົ່ງອອກ
ຜະລິດຕະພັນເຂົ້າລາວ ໄປຕ່າງປະເທດ ຍັງບໍ່ສາມາດແຂ່ງຂັນໃນຕະລາດໂລກ ໄດ້ຢ່າງ
ແທ້ຈິງ ເພາະສ່ວນໃຫຍ່ ກໍຍັງເປັນຜົນຜະລິດ ທີ່ມີລະດັບຄຸນນະພາບຕ່ຳກວ່າ ຜະລິດຕະພັນ ເຂົ້າຂອງໄທ ຫວຽດນາມ ກຳປູເຈຍ ແລະ ມຽນມາ.
ທັງນີ້ ກໍເນື່ອງຈາກວ່າ ການປູກເຂົ້າໃນລາວ ກໍຍັງຂາດຫຼັກວິຊາການສະໄໝໃໝ່ ແລະ
ການຫີບຫໍ່ ກໍຍັງບໍ່ມີລະບົບ ການຄັດເລືອກປະເພດ ຂອງເຂົ້າອອກຈາກກັນ ກ່ອນທີ່ຈະ
ສົ່ງອອກໄປຕ່າງປະເທດ ສະນັ້ນ ຈຶ່ງເຮັດໃຫ້ຜະລິດຕະພັນເຂົ້າ ຂອງລາວບໍ່ເປັນທີ່ຕ້ອງການ
ຂອງຕະຫລາດ ໃນຕ່າງປະເທດ ເພາະຖືກມອງເຫັນວ່າ ເປັນຜະລິດຕະພັນເຂົ້າ ທີ່ມີຄຸນ
ນະພາບຕ່ຳນັ້ນເອງ.
ດັ່ງຈະເຫັນໄດ້ຈາກປີ 2013 ທີ່ລັດຖະບານລາວ ໄດ້ຕັ້ງເປົ້າໝາຍ ການສົ່ງອອກເຂົ້າໄປ
ຕ່າງປະເທດ ໃຫ້ໄດ້ 3 ແສນໂຕນ ແຕ່ກໍປະຕິບັດໄດ້ແທ້ຈິງ ພຽງ 25,000 ກວ່າໂຕນ ຄິດ
ເປັນມູນຄ່າ 10 ລ້ານດອນລາ ເທົ່ານັ້ນ ໂດຍທີ່ເຂົ້າລາວມີລາຄາ ຊື້ຂາຍບໍ່ເຖິງ 400 ດອນ
ລາຕໍ່ໂຕນ ໃນຂະນະທີ່ເຂົ້າໄທ ຊື້ຂາຍຂັ້ນຕ່ຳ 480 ດອນລາຕໍ່ໂຕນ ສ່ວນເຂົ້າຂອງກຳປູເຈຍ ຫວຽດນາມ ແລະ ມຽນມານັ້ນ ເຖິງແມ່ນວ່າ ຈະມີລາຄາ ຊື້ຂາຍຕ່ຳກວ່າເຂົ້າ ຂອງໄທກໍຕາມ ຫາກແຕ່ກໍຍັງມີການຊື້ຂາຍ ໃນລາຄາສະເລ່ຍ ບໍ່ຕ່ຳກວ່າ 440 ດອນລາຕໍ່ໂຕນ.