ລັດຖະບານລາວ ຈະຍົກເລີກສິດສໍາປະທານທີ່ດິນ 337 ໂຄງການ ທີ່ຍັງບໍ່ມີຄວາມຄືບໜ້າ ແລະບໍ່ໄດ້ປະຕິບັດຕາມສັນຍາການລົງທຶນ ຊຶ່ງສ່ວນໃຫຍ່ເປັນການຖືສິດສໍາປະທານໄວ້ ເພື່ອຂາຍຕໍ່ໃຫ້ກັບບໍລິສັດອື່ນນັ້ນ.
Your browser doesn’t support HTML5
ລັດຖະບານລາວ ຈະຍົກເລີກສິດສໍາປະທານທີ່ດິນ 337 ໂຄງການ ທີ່ຍັງບໍ່ມີຄວາມຄືບໜ້າ ແລະບໍ່ໄດ້ປະຕິບັດຕາມສັນຍາ
ເຈົ້າໜ້າທີ່ຂັ້ນສູງໃນກະຊວງຊັບພະຍາກອນທຳມະຊາດແລະສິ່ງແວດລ້ອມ ເປີດເຜີຍວ່າ ຄະນະສະເພາະກິດຂອງກະຊວງຊັບພະຍາກອນທຳມະຊາດແລະສິ່ງແວດລ້ອມ ໄດ້ດຳເນີນມາດຕະການກວດກາສິດສຳປະທານທີ່ດິນ ຕາມຄຳສັ່ງຂອງນາຍົກລັດຖະມົນຕີ ໃນປີ 2024 ທີ່ຜ່ານມາ ໂດຍສາມາດກວດກາໄດ້ທັງໝົດ 438 ໂຄງການ ທີ່ພົບວ່າ ຜູ້ຖືສິດສຳປະທານນັ້ນ ບໍ່ໄດ້ປະຕິບັດຕາມສັນຍາການລົງທຶນ ແລະບໍ່ມີຄວາມຄືບໜ້າແຕ່ຍ່າງໃດ ເມື່ອສົມທົບດ້ວຍການຮ້ອງຮຽນຈາກປະຊາຊົນທີ່ໄດ້ຮັບຜົນກະທົບຈາກໂຄງການສຳປະທານທີ່ດິນຢ່າງກວ້າງຂວາງດ້ວຍແລ້ວ ຈຶ່ງໄດ້ມີຄຳສັ່ງໃຫ້ຍົກເລີກສິດສຳປະທານທີ່ດິນໄປແລ້ວ 101 ໂຄງການ ແລະຍັງຈະສືບຕໍ່ກວດກາໂຄງການທີ່ຍັງເຫຼືອ 337 ໂຄງການ ເພື່ອມີຄຳສັ່ງໃຫ້ຍົກເລີກການສຳປະທານຢ່າງເປັນທາງການພາຍໃນໄຕມາດທີ 1 ຂອງປີ 2025 ນີ້.
ໂດຍນາຍົກລັດຖະມົນຕີ ໄດ້ມີຄຳສັ່ງໃຫ້ດຳເນິນການກວດກາສໍາປະທານທີ່ດິນ 438 ໂຄງ ການດັ່ງກ່າວ ໃນຕົ້ນປີ 2024 ຢ້ອນໄດ້ຮັບການຮ້ອງຮຽນຈາກປະຊາຊົນລາວໂດຍຜ່ານຄະນະປະຈຳສະພາແຫ່ງຊາດ ເນື່ອງຈາກເຫັນວ່າ ຜູ້ລົງທຶນບໍ່ໄດ້ປະຕິບັດຕາມສັນຍາ ແລະໂຄງການບໍ່ຄືບໜ້າ ຫຼືວ່າ ເປັນລັກສະນະການຖືຄອງສຳປະທານໄວ້ ເພື່ອຂາຍຕໍ່ໃຫ້ກັບນັກລົງທຶນລາຍອື່ນນັ້ນ ຈຶ່ງໄດ້ມີການຍົກເລິກສຳປະທານ 101 ໂຄງການດັ່ງກ່າວ. ສ່ວນໂຄງການທີ່ຍັງເຫຼືອນັ້ນ ກໍຍັງສືບຕໍ່ດຳເນີນການກວດກາເລື່ອຍມາຈົນຮອດປັດຈຸບັນນີ້ ເຊິ່ງສ່ວນຫຼາຍກໍໄດ້ມອບໝາຍໃຫ້ເປັນຄວາມຮັບຜິດຊອບຂອງອຳນາດການປົກຄອງທ້ອງຖິ່ນໄປແລ້ວ.
ດັ່ງທີ່ ທ່ານນາງບຸນຄຳ ວໍລະຈິດ ລັດຖະມົນຕີກະຊວງຊັບພະຍາກອນທຳມະຊາດ ແລະສິ່ງແວດລ້ອມ ໃຫ້ການຢືນຢັນວ່າ “ສຳລັບການກວດກາການເຊົ່າສຳປະທານທີ່ດິນ ລັດຖະບານໄດ້ມີຄຳສັ່ງໃຫ້ເລັ່ງກວດກາໂຄງການເປົ້າຫມາຍ 438 ໂຄງການ ແລະໃນນັ້ນ ກໍໄດ້ລາຍງານຕໍ່ກອງປະຊູມສະພາ ແລ້ວກໍໄດ້ມີການຕົກລົງໃນການຍົກເລີກໂຄງການທີ່ບໍ່ມີປະສິດທິຜົນ. ໃນປັດຈຸບັນ ແມ່ນໄດ້ຍົກເລິກໄປແລ້ວ 101 ໂຄງການ ແລະຢັງຈະສືບຕໍ່ການພິຈາລະນາ ກວດກາໂຄງການທີ່ເຫລືອ ເພື່ອຍົກເລີກຕາມເງື່ອນໄຂ ອັນນີ້ແມ່ນພວກເຮົາສືບຕໍ່ຊຸກຍູ້ໃຫ້ທ້ອງຖິ່ນ ແລະຂະແໜງການໃນການຕິດຕາມການຍົກເລີກສັນຍາໂຄງການທີ່ບໍ່ມີປະສິດທິພາບນັ້ນ.”
ສ່ວນເຈົ້າຫນ້າທີ່ຄະນະກວດກາພັກ-ລັດ ເປີດເຜີຍວ່າ ການອະນຸຍາດໃຫ້ສໍາປະທານທີ່ດິນແກ່ບໍຣິສັດເອກະຊົນລາວ ແລະ ຕ່າງຊາດທີ່ຂາດການປະສານງານລະຫວ່າງສູນກາງກັບທ້ອງຖິ່ນ ໄດ້ສ້າງບັນຫາຫຍຸ້ງຍາກໃຫ້ແກ່ການພັດທະນາທາງເສດຖະກິດໃນລາວຫລາຍຂຶ້ນນັບມື້ ເພາະວ່າ ໄດ້ມີການໃຫ້ສໍາປະທານທີ່ບໍ່ໄດ້ປະສານງານກັນໄປແລ້ວເຖິງ 2,325 ໂຄງການ ມີເນື້ອທີ່ສຳປະທານລວມກວ່າ 11 ລ້ານເຮັກຕາ ຄິດເປັນ 46% ຂອງເນື້ອທີ່ທັງໝົດຂອງລາວ ທັ້ງຍັງມີການດໍາເນີນງານຢ່າງເປັນຂະບວນການດຽວກັນດ້ວຍແລ້ວ ຈຶ່ງເປັນໄປບໍ່ໄດ້ເລີຍທີ່ການຈັດຕັ້ງປະຕິບັດດັ່ງກ່າວ ຈະດໍາເນີນໄປໄດ້ຢ່າງມີປະສິດທິພາບແລະ ໂປ່ງໃສ ດັ່ງເຈ້າຫນ້າທີ່ໃນຄະນະກວດກາພັກ-ລັດ ໄດ້ຢືນຢັນວ່າ “ຄຸນນະພາບຂອງຖັນແຖວພະນັກງານຍັງມີຄວາມຈໍາກັດ ແລະຕອບສະຫນອງບໍ່ທັນໄດ້ ນີ້ກໍ່ເປັນບັນຫາທີ່ທ້າທາຍສໍາລັບພວກເຮົາ ຄືພວກເຮົາວ່າ ຢາກໃຫ້ຜູ້ຫນຶ່ງສາມາດເຮັດໄດ້ຫຼາຍວຽກ ກໍຍັງບໍ່ທັນເປັນລະບົບເທົ່າທີ່ຄວນ ການຈັດຕັ້ງປະຕິບັດວຽກງານການຈົດທະບຽນປະເພດຕ່າງໆ ຍັງບໍ່ທັນບັນລຸໄດ້ຕາມເປົ້າໝາຍ ຍັງເປັນລັກສະນະຈົງຈຽມ ເອົາອົກເອົາໃຈກັນ ແລະມີທ່າອຽງອິງໃສ່ຜູ້ທີ່ມີຖານະຫຼາຍກວ່າ ຍັງມີປະກົດການຫຼາຍ.”
ເຈ້າຫນ້າທີ່ໃນຄະນະກວດກາພັກ-ລັດ ຢືນຢັນດ້ວຍວ່າ ບັນຫາຫຍຸ້ງຍາກທີ່ສຸດໃນການກວດກາສຳປະທານທີ່ດິນ ກໍຄືໃນຈຳນວນສຳປະທານທັງໝົດນັ້ນ ມີຫລາຍກວ່າ 1,300 ໂຄງການ ເປັນການອະນຸຍາດໂດຍອຳນາດການປົກຄອງຂັ້ນທ້ອງຖິ່ນ ຈຶ່ງເຮັດໃຫ້ການ ກວດກາໂດຍອຳນາດຈາກຂັ້ນສູນກາງສາມາດຈັດຕັ້ງປະຕິບັດໄດ້ຢ່າງຈຳກັດ ເພາະວ່າ ບໍ່ໄດ້ຮັບການຮ່ວມມືຈາກອຳນາດການປົກຄອງທ້ອງຖິ່ນນັ້ນເອງ.