ບໍລິສັດຜະລິດກະແສໄຟຟ້າລາວ (ມະຫາຊົນ) ຫຼື EDL-GEN
ວາງແຜນການ ທີ່ຈະລະດົມເງິນທຶນຈາກຕະຫລາດທຶນໃນອາຊ່ຽນ
ໃຫ້ໄດ້ເຖິງ 1,000 ລ້ານດອນລາ ເພື່ອນຳໃຊ້ໃນໂຄງການລົງທຶນ
ໃນຊ່ວງປີ 2015-2020.
Your browser doesn’t support HTML5
ຟັງລາຍງານ ບໍລິສັດຜະລິດກະແສໄຟຟ້າລາວ ວາງແຜນ ທີ່ຈະລະດົມເງິນທຶນ ຈາກຕະຫລາດທຶນ ໃນອາຊ່ຽນ.
ທາງການກະຊວງການເງິນ ໄດ້ອະນຸມັດແຜນການລະດົມເງິນທຶນ ຂອງບໍລິສັດຜະລິດກະແສໄຟຟ້າລາວ (ມະຫາຊົນ) ຫຼື EDL-GEN ຢ່າງເປັນ ທາງການເມື່ອບໍ່ນານມານີ້ ຊຶ່ງກໍຈະເປັນຜົນເຮັດໃຫ້ EDL-GEN ສາມາດທີ່ຈະອອກພັນທະບັດ ເພື່ອຂໍກູ້ຢືມເງິນທຶນ ຈາກຕະຫລາດທຶນ ໃນບັນດາປະເທດສະມາຊິກ ໃນກຸ່ມອາຊ່ຽນດ້ວຍກັນ ໄດ້ຢ່າງຖືກຕ້ອງຕາມ ກົດໝາຍຕໍ່ໄປ.
ໂດຍພາຍໃຕ້ແຜນການດັ່ງກ່າວນີ້ EDL-GEN ໄດ້ວາງເປົ້າໝາຍ ທີ່ຈະລະດົມເງິນທຶນ
ໃຫ້ໄດ້ ໃນມູນຄ່າລວມບໍ່ນ້ອຍກວ່າ 1,000 ລ້ານດອນລາ ເພື່ອຈະໄດ້ນຳມາໃຊ້ ໃນໂຄງການ
ພັດທະນາແຫລ່ງພະລັງງານໄຟຟ້າໃນລາວ ທີ່ຢູ່ໃນການຄຸ້ມຄອງຂອງ EDL-GEN ໃຫ້ເພີ້ມ ຂຶ້ນຈາກ 881 ເມກກາວັດ ໃນປັດຈຸບັນ ເປັນບໍ່ນ້ອຍກວ່າ 2,272 ເມກກາວັດ ພາຍໃນ
ປີ 2020.
ສຳຫລັບເປົ້າໝາຍທຳອິດ EDL-GEN ຈະລະດົມເງິນທຶນໃຫ້ໄດ້ໃນມູນຄ່າ 6,500 ລ້ານບາດ ຫຼື ບໍ່ນ້ອຍກວ່າ 200 ລ້ານດອນລານັ້ນ ກໍຄືຕະຫລາດຫລັກຊັບແຫ່ງປະເທດໄທ ຊຶ່ງໃນປັດຈຸບັນ ນີ້ ກຳລັງຢູ່ໃນຂັ້ນຕອນການພິຈາລະນາ ຂອງຄະນະກຳມະການບໍລິຫານໜີ້ສິນສາທາລະນະແຫ່ງຊາດໄທ ແລະ ກໍຄາດໝາຍວ່າ ຈະໄດ້ຮັບການອະນຸມັດໃນມໍ່ໆນີ້ ໂດຍຫຼັງຈາກນັ້ນ EDL-GEN ກໍຈະສາມາດສະເໜີຂາຍພັນທະບັດ ໃນຕະຫລາດຫຼັກຊັບ
ແຫ່ງປະເທດໄທ ໄດ້ຢ່າງເປັນທາງການ ຊຶ່ງຄາດວ່າ ຈະເປັນໃນຊ່ວງເດືອນທັນວານີ້.
ໂຄງສ້າງເຂືອຂ່າຍ ສາຍສົ່ງກະແສໄຟຟ້າ ເພື່ອເຊື່ອມຕໍ່ ກັບບັນດາປະເທດເພື່ອນບ້ານ ໃນກຸ່ມອາຊ່ຽນ.
ໂດຍສາເຫດສຳຄັນ ທີ່ຈະເຮັດໃຫ້ EDL-GEN ໄດ້ຮັບການ
ອະນຸມັດດັ່ງກ່າວນີ້ ກໍເພາະວ່າ EDL-GEN ເປັນບໍລິສັດ ໃນ
ຕະຫລາດຫຼັກຊັບແຫ່ງຊາດລາວ ທີ່ມີຜົນປະກອບການ ເປັນທີ່
ໜ້າເຊື່ອຖືໃນສາຍຕາ ຂອງນັກລົງທຶນຊາວຕ່າງຊາດ ກໍຄືມີທຶນ
ຈົດທະບຽນເຖຶງ 4,900 ຕື້ກີບ ຫຼື ເກີນກວ່າ 612 ລ້ານດອນລາ
ແລະ ໃນນີ້ກໍເປັນການຖືຮຸ້ນໂດຍລັດວິສາຫະກິດ ໄຟຟ້າລາວ
(EDL) ເຖິງ 75 ເປີເຊັນ ສ່ວນລາຍໄດ້ໃນປີ 2013 ກໍມີມູນຄ່າ
ເຖິງ 1,320 ຕື້ກີບ ຊຶ່ງຄິດເປັນຜົນກຳໄລເກີນກວ່າ 971 ຕື້ກີບ
ແລະ ໃນປີ 2014 ນີ້ ກໍຄາດວ່າ ຈະສ້າງລາຍຮັບ ແລະ ມີຜົນກຳ
ໄລເພີ້ມຂຶ້ນຈາກປີທີ່ແລ້ວ.
ໂດຍໃນປັດຈຸບັນນີ້ມີ 3 ບໍລິສັດທີ່ຈົດທະບຽນ ໃນຕະຫລາດ
ຫຼັກຊັບແຫ່ງຊາດລາວ ກໍຄື EDL-GEN ທະນາຄານການຄ້າຕ່າງປະເທດ (ມະຫາຊົນ)
ຫຼື BCEL ແລະ ບໍລິສັດ Lao World ຈຳກັດ (ມະຫາຊົນ) ຊຶ່ງໃນລະຍະກວ່າ 10 ເດືອນ
ຂອງປີ 2014 ນີ້ຮຸ້ນຂອງ EDL-GEN ມີລາຄາຊື້ຂາຍສະເລ່ຍ 7,100 ກີບຕໍ່ຮຸ້ນ ສ່ວນ
ລາຄາຮຸ້ນຂອງ BCEL ແລະ ບໍລິສັດ Lao World ນັ້ນ ມີລາຄາຊື້ຂາຍສະເລ່ຍ 7,400
ກີບກັບ 8,000 ກີບ ຕໍ່ຮຸ້ນຕາມລຳດັບ.
ນອກຈາກນີ້ ຕະຫລາດຫຼັກຊັບແຫ່ງຊາດລາວ ຍັງມີແຜນການທີ່ຈະຈົດທະບຽນ ບໍລິສັດ
ເພີ້ມຂຶ້ນອີກ ໃນມໍ່ໆນີ້ ໂດຍມີເງື່ອນໄຂວ່າ ບໍລິສັດທີ່ຈະຈົດທະບຽນນັ້ນ ຈະຕ້ອງມີການ
ພັດທະນາ ລະບົບບັນຊີ ແລະ ມີລະບົບການບໍລິຫານງານທີ່ໄດ້ມາດຕະຖານສາກົນ ດັ່ງທີ່
ທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳຂົງເຂດເສດຖະກິດ
ການຜະລິດ ແລະ ການຈະລາຈອນ ໃນຖານະປະທານຄະນະກຳມະການຄຸ້ມຄອງ
ຕະຫລາດ ຫຼັກຊັບແຫ່ງຊາດລາວ ກໍໄດ້ໃຫ້ການຢືນຢັນກັບ ວີໂອເອ ວ່າ:
“ແຕ່ວ່າຄັນຖ້າພວກເຂົາບໍ່ກຽມພ້ອມໄດ້ຕາມອັນນີ້ນິຂ້ອຍກະບໍ່ຮັບ ຍົກຕົວຢ່າງ
ບໍລິສັດອັນນີ້ ທີ່ເຈົ້າມານີ້ ຄັນເຈົ້າມີໜີ້ສິນມະຫາສານແລ້ວ ຍັງຈະເອົາເຂົ້າມາ
ແມ່ນຈະມາຊື້ກັບເຈົ້າ ຫຼື ວ່າຢູ່ໃນບໍລິສັດ ໂຄງສ້າງການຈັດຕັ້ງຂອງເຈົ້າກໍບໍ່ດີ
ຜູ້ອຳນວຍການນີ້ເດ້ ເຂົງສົງໄສວ່າໝໍນີ້ ມີປາກົດການສໍ້ໂກງ ແລ້ວຄົນທັງຫຼາຍ
ເຂົາກໍຮູ້ກັນເດ້ເນາະ ອັນນີ້ໄດ້ເວົ້າກັນລະອຽດສົມຄວນ.”
ໂດຍກ່ອນໜ້ານີ້ ຄະນະກຳມະການຄຸ້ມຄອງຕະຫລາດຫຼັກຊັບແຫ່ງຊາດລາວ ໄດ້ດຳເນີນ
ການສຳຫລວດ ບັນດາບໍລິສັດໃນລາວຈຳນວນ 1,087 ລາຍ ຊຶ່ງກໍພົບວ່າ ມີຢູ່ 38 ບໍລິສັດ
ທີ່ມີເງື່ອນໄຂ ທີ່ສາມາດຈະຂໍຈົດທະບຽນໃນຕະຫລາດຫຼັກຊັບໄດ້ ຫາກແຕ່ວ່າພາຍຫຼັງຈາກ
ທີ່ໄດ້ທຳການກວດກາຢ່າງຮອບດ້ານອີກເທື່ອໃໝ່ ກໍປາກົດວ່າມີຢູ່ 20 ບໍລິສັດ ທີ່ໄດ້ສະແດງ ເຈດຈຳນົງ ທີ່ຈະຂໍຈົດທະບຽນໃນຕະຫລາດຫຼັກຊັບ ໂດຍໃນນີ້ກໍລວມເຖິງ ວິສາຫະກິດໂທລະຄົມມະນາຄົມລາວ (ETL) ບໍລິສັດລາວໂທລະຄົມມະນາຄົມ (Lao Telecom) ກຸ່ມບໍລິສັດດາວເຮືອງການຄ້າຂາອອກຂາເຂົ້າ ລັດວິສາຫະກິດການບິນລາວ (Lao Airline) ທະນາຄານພົງສະຫວັນ ແລະ ບໍລິສັດນ້ຳມັນເຊື້ອໄຟ ເປັນຕົ້ນ.