ທາງການລາວ ມີສະຖານຄຸມຂັງບໍ່ພຽງພໍສຳລັບ ຂັງນັກໂທດທີ່ກະທຳຄວາມຜິດໃນຄະດີກ່ຽວກັບຢາເສບຕິດ ທີ່ເພີ້ມຂຶ້ນນັບມື້ ຊຶ່ງເຮັດໃຫ້ຈະຕ້ອງສ້າງສະຖານທີ່ຄຸມຂັງເພີ້ມຕື່ມອີກ ໃນທົ່ວປະເທດ.
Your browser doesn’t support HTML5
ທາງການລາວມີສະຖານຄຸມຂັງບໍ່ພຽງພໍສຳລັບ ຂັງນັກໂທດທີ່ກະທຳຄວາມຜິດໃນຄະດີກ່ຽວກັບຢາເສບຕິດ
ເຈົ້າໜ້າທີ່ຂັ້ນສູງໃນກະຊວງປ້ອງກັນຄວາມສະຫງົບ ໄດ້ໃຫ້ທັດສະນະວ່າ ການທີ່ທາງການລາວ ສາມາດສະກັດຈັບການລັກລອບຄ້າຢາເສບຕິດໄດ້ຫລາຍກວ່າ 12,000 ກໍລະນີ ແລະ ຈັບຜູ້ຕ້ອງສົງໄສໄດ້ຫລາຍກວ່າ 20,000 ຄົນ ພ້ອມທັງຢຶດຢາບ້າໄດ້ຫລາຍກວ່າ 37 ໂຕນ, ສານເຄມີກວ່າ 290 ໂຕນ ແລະອຸປະກອນສື່ສານທັນສະໄໝເກີນກວ່າ 37,000 ລາຍການໃນຮອບ 22 ເດືອນຜ່ານມານີ້ ນອກຈາກສະແດງໃຫ້ເຫັນວ່າ ການກະທໍາຜິດກ່ຽວກັບຢາເສບຕິດໃນລາວມີທ່າອຽງເພີ້ມຂຶ້ນນັບມື້ ແລ້ວກໍຍັງສະແດງໃຫ້ເຫັນດ້ວຍວ່າ ແກັ່ງຢາເສບຕິດໃນລາວໄດ້ເປັນສ່ວນນຶ່ງຂອງຂະບວນການຄ້າຢາເສບຕິດຂ້າມຊາດແລ້ວ ໂດຍສະເພາະໃນເຂດສາມຫລ່ຽມຄຳ ລະຫວ່າງ ມຽນມາ-ລາວ-ໄທ ກໍຍັງເປັນເຂດທີ່ມີການຜະລິດຢາບ້າ ແລະຍາໄອສ໌ຫຼາຍທີ່ສຸດໃນໂລກອີກດ້ວຍ.
ພາຍໃຕ້ສະພາບການດັ່ງກ່າວ ຍັງໄດ້ສົ່ງຜົນກະທົບຕໍ່ເປົ້າໝາຍຂອງລັດຖະບານລາວ ທີ່ຈະສ້າງຕັ້ງບ້ານ ແລະ ໂຮງຮຽນປອດຢາເສບຕິດໃຫ້ໄດ້ 80 ເປີເຊັນ ແລະ 95 ເປີເຊັນ ຂອງບ້ານແລະໂຮງຮຽນທັ້ງໝົດໃນປີ 2025 ດ້ວຍເຊັ່ນກັນ ເພາະວ່າ ການດຳເນີນມາດຕະການສະກັດກັ້ນ ແລະປາບປາມການຄ້າຂາຍຢາເສບຕິດໃນປັດຈຸບັນຍັງມີປະສິດທິພາບຕໍ່າ ເນື່ອງຈາກວ່າ ພາກສ່ວນທີ່ກ່ຽວຂ້ອງຍັງບໍ່ທັນໄດ້ໃຫ້ການຮ່ວມມືຢ່າງຈິງຈັງ ຊຶ່ງເຫັນໄດ້ຈາກຈໍານວນອາຊະຍາກໍາ ແລະຜູ້ກະທໍາຜິດໃນຄະດີຢາເສບຕິດທີ່ເພີ້ມສູງຂຶ້ນ ຈົນວ່າສະຖານທີ່ຄຸມຂັງບໍ່ສາມາດຮອງຮັບໄດ້ທັນ ແລະຈະຕ້ອງມີການກໍ່ສ້າງເພີ້ມຂຶ້ນຢ່າງຮີບດ່ວນ ໃນທຸກພາກອີກດ້ວຍ ດັ່ງທີ່ ພົນເອກວິໄລ ຫລ້າຄຳຟອງ ຮອງນາຍົກລັດຖະມົນຕີ - ລັດຖະມົນຕີກະຊວງປ້ອງກັນຄວາມສະຫງົບ ຢືນຢັນວ່າ:
“ສະຖານທີ່ກັກຂັງທີ່ມີດຽວນີ້ ແອອັດແທ້ ບໍ່ແມ່ນແອອັດລ້າໆ ດຽວນີ້ເກີດຮອດຂີ້ຮິດຢ້ອນວ່າ ມີນໍ້າບໍ່ພຽງພໍ ບ່ອນຢູ່ບ່ອນນອນບໍ່ໄດ້ຊັກ ການກິນ ການຢູ່ ມັນບໍ່ຮັບປະກັນ ອະນາໄມ. ແຕ່ວ່າ ພວກເຮົາໄດ້ມີທິດແລ້ວ ດຽວນີ້. ພວກເຮົາສ້າງສູນຄຸມຂັງເປັນພາກພາກຫນຶ່ງ ໄດ້ກ່ວາ 10,000 ແຕ່ກ່ອນນີ້, ຂັງນຳກັນໝົດຜູ້ຕ້ອງຫາ ເປັນນັກໂທດກະຂັງນຳກັນ. ຜູ້ຕິດຢາເສບຕິດກະຂັງນຳກັນ ຜູ້ຄະດີອື່ນໆ ກະຂັງນຳກັນ ບາດມາດຽວນີ້ ພາຍຫຼັງມີວາລະແຫ່ງຊາດ ພວກເຮົາກະໄດ້ວາງເນາະ ຢູ່ພາກເໜືອກະໄດ້ກວດມາຢູ່ທີ່ຫຼວງພະບາງ ທັງໝົດ ສຳຫລັບນັກໂທດ ສ່ວນຂອງແຂວງຫັ່ນ ກໍເອົາໄວ້ເປັນພາກສ່ວນຜູ້ຕ້ອງຫາ ບໍ່ແມ່ນການເປັນນັກໂທດເທື່ອ.”
ສ່ວນເຈົ້າຫນ້າທີ່ຄະນະກຳມະການປ້ອງກັນ ແລະປາບປາມຢາເສບຕິດແຫ່ງຊາດໄທ ຢືນຢັນວ່າ ກຸ່ມຄ້າຢາເສບຕິດໃນລາວ ໄດ້ໃຊ້ drones ໃນການລັກລອບຂົນສົ່ງຢາເສບຕິດ ຂ້າມແມ່ນໍ້າຂອງຈາກລາວ ມາໄທເພີ້ມຂຶ້ນນັບມື້. ໂດຍສະເພາະບັນດາແຂວງທີ່ຕັ້ງຢູ່ກົງກັນຂ້າມກັບບັນດາແຂວງໃນພາກຕາເວັນອອກສຽງເໜືອ (ອີສານ) ຂອງໄທເປັນເຂດທີ່ມີການລັກລອບຂົນສົ່ງຢາບ້າ ແລະ ຢາໄອສ໌ຈາກລາວ ມາໄທຫຼາຍທີ່ສຸດ ຊຶ່ງເຫັນໄດ້ຈາກການຈັບກຸມ ແລະຢຶດຢາເສບຕິດທີ່ເພີ້ມຂຶ້ນນັບມື້ ດ້ວຍເຫດນີ້ ຈຶ່ງເຮັດໃຫ້ທາງການໄທຕ້ອງເພີ້ມພື້ນທີ່ໃນການກວດກາການຄ້າຢາເສບຕິດຢ່າງເຂັ້ມງວດທັ້ງ 8 ຈັງຫວັດ ໃນພາກອີສານທີ່ມີຊາຍແດນຕິດຕໍ່ກັບລາວ ທັງຍັງຈະຂະຫຍາຍໄປສູ່ການຮ່ວມມືໃນການປາບປາມການຟອກເງິນໃນໄວໆນີ້ ດັ່ງເຈົ້າໜ້າທີ່ໄທ ຢືນຢັນວ່າ:
“ປັດຈຸບັນ ອົງກອນອາຊະຍາກຳທີ່ສ້າງລາຍໄດ້ສູງສຸດໃຫ້ແກ່ອົງກອນອາຊະຍາກຳທົ່ວໂລກນີ້ ກໍຄືການຄ້າຢາເສບຕິດ ຮອງລົງມາແມ່ນການຄ້າມະນຸດ. ໃນສ່ວນຂອງການຄ້າຢາເສບຕິດນີ້ ນານາຊາດເຫັນຮ່ວມກັນວ່າ ການຈະແກ້ໄຂບັນຫາທີ່ສໍາຄັນ ຄືຕ້ອງຈັດການເລື່ອງເງິນຫຼືຊັບສິນ ເພາະວ່າຜູ້ບົງການ ຫລືຜູ້ຄ້າຍາເສບຕິດລາຍສຳຄັນທີ່ເປັນຜູ້ສັ່ງການນັ້ນ ໄດ້ເອົາເງິນໄປຊື້ຊັບສິນຫລືທີ່ເອີ້ນວ່າຟອກເງິນນັ້ນ.”
ທັງນີ້ໂດຍການເພີ້ມມາດຕະການເຂັ້ມງວດໃນການຕິດຕາມກວດກາດ່ານຊາຍແດນໄທ-ລາວ ໃນໄລຍະເກືອບ 2 ປີມານີ້ ເຮັດໃຫ້ທາງການໄທ ຈັບກຸມການລັກລອບຄ້າຢາເສບຕິດຈາກລາວ ໄປໄທໄດ້ເພີ້ມຂື້ນຫຼາຍກວ່າ 130 ເທົ່າ ທຽບໃສ່ໄລຍະດຽວກັນໃນປີກ່ອນຫນ້າ ໂດຍເຂດທີ່ຢຶດໄດ້ຢາເສບຕິດຫຼາຍທີ່ສຸດ ຄືເຂດຊາຍແດນຕິດກັບແມ່ນໍ້າຂອງ ລະຫວ່າງແຂວງບໍລິຄໍາໄຊ ກັບນະຄອນພະນົມ ຊຶ່ງໃນຊ່ວງປີ 2023 ຫາ ເດືອນ ສິງຫາ 2024, ທາງການໄທຈັບຕົວຜູ້ຄ້າຢາເສບຕິດ ໄດ້ກວ່າ 145,000 ຄົນ ຢຶດຊັບສິນຂອງຜູ້ຄ້າຢາເສບຕິດໄດ້ກວ່າ 32 ຕື້ບາດ, ຢຶດຢາບ້າ ແລະ ຢາໄອສ໌ໄດ້ກວ່າ 40 ໂຕນ ໃນຂະນະທີ່ທາງການມຽນມາ ກໍໄດ້ຈູດເຜົາທຳລາຍຢາເສບຕິດກວ່າ 610 ໂຕນ.